ރައީސް ޔާމިން ރަޖިސްޓްރީ ކުރުމަށް މަސައްކަތް ކުރައްވަމުން ގެންދަވާ ޕާޓީ ޕީޕަލްސް ނޭޝަނަލް ފްރޮންޓު (ޕީއެންއެފް) ރަޖިސްޓްރީ ކުރުމަށް ބޭނުންވާ 3000 ސޮއި ހަމަކޮށްފި ކަމަށް އެޕާޓީ ރަޖިސްޓްރީ ކުރުމުގައި އިސްކޮށް ހަރަލާތްތެރި ވަމުންދާ މަލީހު ޖަމާލް ވިދާޅުވެއްޖެއެވެ.
ޕީއެންއެފް ރަޖިސްޓްރީ ކުރުމުގެ ހުއްދަ ދޫކޮށްފައިވަނީ ފާއިތުވި ނޮވެމްބަރުމަހުގެ 19 ވަނަ ދުވަހުއެވެ.
ޕާޓީ އުފެއްދުމުގެ ހުއްދައާއި ހަވާލުވީ އެޕާޓީ އުފެއްދުމުގައި އިސްކޮށް ހަރަކާތްތެރިވަމުންދާ ޓީމުގެ މެމްބަންނެވެ. އޭގެ ތެރޭގައި ކުރީގެ ނާއިބު ރައީސް ޑރ. ޖަމީލްއާއި، ކުރީގެ މިނިސްޓަރ މަލީހުއާއި ކުރީގެ ކޮމިޝަނަރ އޮފް ޕޮލިސް ހުސެއިން ވަހީދުގެ އިތުރުން ޕީޕީއެމްގައި ކުރިން އިސްކޮށް ހަރަކާތްތެރިވި ބައެއް ފަރާތްތައްވެސް ހިމެނެއެވެ. ރައީސް ޔާމިން ގާނޫނީ ބަންދެއްގައި ހުންނެވުމާއި ގުޅިގެން ޕާޓީ އުފެއްދުމުގެ ހުއްދަ ދޫކޮށްފައިވަނީ ރައީސް ޔާމިންގެ ދަރިކަލުނ ޒެއިންގެ ނަމުގައެވެ.
