އިނގުރައިދޫ ދާއިރާގެ ކުރީގެ މެމްބަރު އިބުރާހިމް ފަލާހު އަނެއްކާވެސް ޕީއެންސީއަށް ސޮއި ކޮށްފައިވާ ގިނަ އަދަދެއްގެ ފޯމުތަކެއް އެޕާޓީއާއި ހަވާލު ކޮށްފިއެވެ. ޕީއެންސީއަށް ސޮއިކޮށްފައި އެތައްސަތޭގެ މެމްބަރުންގެ ފޯމު މިއަދު ފަލާހު ހަވާލުކޮށްފައިވަނީ ރައީސް އޮފީހުގެ ސީނިއަރ މިނިސްޓަރ އަދި ޕީއެންސީގެ ޗެއަރޕާސަން އަބުދުއްރަހީމްއާއެވެ.
ޕީއެންސީއަށް ސޮއިކޮށްފައިވާ ގިނަ އަދަދެއްގެ ފޯމުތައް މިއަދު ޕާޓީއާއި ހަވާލުރުމަށްފަހު ފަލާޙު ވިދާޅުވެފައިވަނީ ކުރިޔަށް އޮތް ދުވަސްތަކުގައި މުޅި ރ. އަތޮޅު "ޕީއެންސީ ކޮށްލާނެ" ކަމުގައެވެ.
ރ. އަތޮޅުގެ މެޖޯރިޓީ ތައީދު މިހާރު އޮތީ ޕީއެންސީއަށް. ކުރިޔަށް އޮތް މަދު ދުވަސްކޮޅެއްގެ ތެރޭގައި މުޅި ރ. އަތޮޅު ޕީއެންސީ ވެގެންދާނެ. މި އަތޮޅުގައި ޕީއެންސީ ނޫން ޕާޓީއަކަށް މިހާރު ތާއިދެއް ނެތް.
ރ. އަތޮޅުގެ ބޮޑު ތާއީދެއް ސަރުކާރު ހިންގާ މައި ޕާޓީ ޕީއެންސީއަށް އޮތްކަން ފާހަކަ ކުރައްވަމުން ފަލާހު ވިދާޅުވިއެވެ.
ދާދިފަހުން ވެރިކަންކުރާ މައި ޕާޓީ، ޕީއެންސީއާ ގުޅިވަޑައިގެންނެވުމަށްފަހު ފަލާހު ވިދާޅުވީ، ރައީސް މުޢިއްޒުގެ ވެރިކަން ދިފާއުކުރަން މޭ އައްޑަނައަކަށް ހަދާނެކަމަށާއި، ސިޔަސީ ގޮތުންނާއި ހުރިހާ ގޮތަކުންވެސް ރައީސް މުޢިއްޒުގެ ސަރުކާރު ދިފާޢު ކުރުމުގައި ވަފާތެރިކަންމަތީ ދެމިހުންނަވާނެކަމުގެ ޔަޤީންކަން ދެއްވާކަމަށެވެ. އަދި މުޅި ރ. އަތޮޅުވެސް ވަނީ ރައީސް މުޢިއްޒުގެ ފަހަތްޕުޅުގައިކަމަށާއި، މުޅި ރ. އަތޮޅުގެ 15 ރަށުގެ ރައްޔިތުންވެސް ތިބީ ރައީސް މުޢިއްޒުގެ ސަރުކާރު ދިފާޢުކޮށް އެމަނިކުފާނުގެ ލަފަޔާ އިރުޝާދުގެ މަތިން ކުރިއަށް ދާންކަމަށްވެސް ފަލާހު ވިދާޅުވިއެވެ.
ޕީއެންސީއަށް ސޮއި ކޮށްފައިވާ ގިނަ އަދަދެއްގެ ފޯމުތަކެއް ފަލާހު މިއަދު އެޕާޓީއާއި ހަވާލުކޮށްފައިވާއިރު އޭނާ ގެންދަވަނީ ޕީއެންސީގެ ޓިކެޓުގައި، ކުރިޔަށް އޮތް ރައްޔިތުންގެ މަޖިލިހުގެ އިންތިޚާބުގައި އިގުރައިދޫ ދާއިރާއަށް ވާދަކުރެއްވުމަށް ކެމްޕޭން ކުރައްވަމުންނެވެ. އަދި އިނގުރައިދޫ ދާއިރާގައި ފަލާހުއަށް ބޮޑު ތާއީދެއް އޮތްކަންވެސް ފާހަގަ ކޮށްލެވެއެވެ.
ރައްޔިތުންގެ މަޖިލިހުގެ ކެމްޕޭން ފެއްޓެވުމަށްފަހު ފަލާހު ވިދާޅުވެފައިވަނީ މަޖިލިހުގެ ކުރިޔަށް އޮތް ދައުރަށް ކުރިމަތިލައްވަން ގަސްތު ކުރެއްވީ ދާއިރާގެ ގިނަ އަދަދެއްގެ ރައްޔިތުންގެ އެދުމުގެ މަތިންކަމަށާއި، ދާއިރާގެ ބޮޑު ތާއީދަކާއެކީ އިންތިޚާބުކުރި ޕީޕީއެމް/ޕީއެންސީގެ ސަރުކާރަށް ރައްޔިތުންގެ މަޖިލިހުގެ ތެރެއިން އެއްބާރުލުން ދިނުމަށްވެސް ރައްޔިތުން ބޭނުންވާ ކަމުގައެވެ.
ފަލާހު ކުރިޔަށް އޮތް ދައުރުގައި އެދާއިރާގެ މަޖިލިސް އިންތިޚާބުގައި ވާދަކުރައްވަން ނިންމެވިއިރު އޭނާވަނީ ފާއިތުވި ރިޔާސީ އިންތިޚާބު ޑރ. މުއިއްޒުއަށް ކާމިޔާބު ކޮށްދިނުމުގައި އިސްދައުރެއް އަދާކޮށްފައެވެ. މިގޮތުން އޭނާވަނީ "ދިވެހީންގެ ރާއްޖެ" ކެމްޕޭންގެ ރ. އަތޮޅުގެ އެންމެ އިސްފަރާތެއްގެ ގޮތުގައި މަސައްކަތް ކޮށްފައެވެ.
18 ވަނަ ރައްޔިތުންގެ މަޖިލިހުގައި އިނގުރައިދޫ ދާއިރާގެ މެމްބަރުކަން ކުރެއްވި އިބުރާހިމް ފަލާހުއަކީ ރައީސް ޑރ. މުއިއްޒުގެ ވަރަށް އަރިސް ފަރާތެއްކަން ފާހަގަ ކޮށްލެވެއެވެ.
