މޫސުމީ ކަންކަމަށް ސީދާ ހޭދަކުރެވޭނެ މާލިއްޔަތެއް ކަނޑައަޅައިގެން، އެކަމަށް އެކަށީގެންވާ ފިޔަވަޅުތަކެއް އެޅުމަށް އިސްކަންދެވޭނެ އައު ގޮތްތަކެއް ބޭނުންވާ ކަމުގައި ރައީސް މުއިއްޒު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ، 28 ވަނަ ކޮންފަރެންސް އޮފް ދަ ޕާޓީސް ޓު ދަ ޔުނައިޓެޑް ނޭޝަންސް ފްރޭމްވަރކް ކޮންވެންޝަން އޮން ކްލައިމެޓް ޗޭންޖް (ކޮޕް28) ގެ ވަރލްޑް ލީޑަރސް ސަމިޓުގައި މިއަދު ތަގުރީރު ކުރައްވަމުންނެވެ.
ކޮޕް28 ސަމިޓުގައި ވާހަކަ ދައްކަވަމުން ރައީސް ވިދާޅުވީ ދުނިޔޭގެ މާލީ ކަންކަން ހިނގާ އުޞޫލާ އޮނިގަނޑަށް ބޮޑު ބަދަލެއް ގެންނަން ޖެހޭ ކަމަށާއި، މީގެ ކުރީން ދުވަހަކުވެސް ނާންނަހައި އަވަހަށް މޫސުމަށް ބަދަލު އަންނަ ދުނިޔެއެއްގައި، ވަކި ހަމަތަކަކާ ގަވާއިދުތަކެއްގެ ތެރެއިން ކަންކަން ހަމަޖެހެންދެން އިންތިޒާރުކުރެވޭކަށް ނެތް ކަމުގައެވެ.
ފައިސާގެ ޤާބިލްކަމާ ކަންކުރެވޭނެ ޤާބިލްކަން ވަޒަންކޮށްކޮށް ތިބޭކަށް ވަގުތެއް ނެތް. ފައިސާ ލިބޭނެ ގޮތްތައް ފަސޭހަވާން ޖެހޭ. އަދި ފައިސާ ދިނުމުގައި ބަލާ މިންގަނޑުތައްވެސް އަލުން މުރާޖަޢާކުރަން ޖެހޭ.
ރައީސް މުއިއްޒު ވިދާޅުވިއެވެ.
މި ސަމިޓުގައި އިތުރަށް ވާހަކަ ދައްކަވަމުން ރައީސް ވިދާޅުވީ މޫސުމަށް އަންނަބަދަލުތަކުން ލިބޭ ގެއްލުންތަކުން އަރައިގަތުމަށް އެހީތެރިވާ، 'ލޮސް އެންޑް ޑޭމަޖް ފަންޑު' ގެ ބޭނުން ހިފަން ފަށައިގަތުމަށް، އިއްޔެ ނިންމި ނިންމުމާމެދު އުފާކުރައްވާ ކަމުގައެވެ.
ޔޫއޭއިން މިކަމުގައި އިސްނަންގަވައި މަގު ދެއްކެވީތީ، އަދި ޤައުމުތަކުން މިކަމަށް ތާއީދުކުރައްވައި އެއްބާރުލުންދެއްވައި، މި ފަންޑަށް ބޮޑެތި އެހީތަކެއް ވެދެއްވާނެކަމުގެ ޔަޤީންކަން ދެއްވީތީ އަޅުގަނޑު ޝުކުރު ދަންނަވަން. އަދި ކުރިއަށް އޮތް ތަނުގައި، އިތުރު ގިނަ ފަރާތްތަކުން މި ކަމުގައި ބައިވެރިވާނެކަމަށް އަޅުގަނޑު އުންމީދުކުރަން.
ރައީސް ވިދާޅުވިއެވެ.
އިތުރަށް ރައީސް ވިދާޅުވީ ރާއްޖެފަދަ ކުރި ޖަޒީރާ ޤައުމުތަކުގައި، ކޮންމެ މުރަކަކޮޅެއް، ކޮންމެ ވެލިފުކެއް، ކޮންމެ މަހެއް، އަދި ކޮންމެ ރުކެއްގެވެސް އަގެއްވާކަމުގައެވެ. އެގޮތުން އެއިން ކޮންމެ އެއްޗަކަށް ލިބޭ ކޮންމެ ގެއްލުމަކީވެސް ޤައުމަށް، އަދި މުޅި އިޤްތިޞާދަށް ލިބޭ ގެއްލުމެއްކަން ފާހަގަ ކުރައްވަމުން ރައީސް ވިދާޅުވީ ދިވެހިންގެ ދިރިތިބުމަށާ، ދިރިއުޅުން ބިނާކުރުމަށްވެސް، މި ނާޒުކު ތިމާވެށި ރައްކައުތެރިކަމާއެކު ދަމަހައްޓަން ބޭނުންވާ ކަމުގައެވެ.
އަވަސްއަވަހަށާ ލަސްލަހުންވެސް، މި ނާޒުކު ވެށްޓަށް ލިބެމުންދާ ކޮންމެ ގެއްލުމަކުން އަރައިގަތުމަށްޓަކައި އެހީތެރިކަން ބޭނުންވޭ. މި ފަންޑުގެ ބޭނުން އެންމެ އެދެވޭގޮތުގައި ހިފޭނެކަމަށް އަޅުގަނޑުމެން އުންމީދުކުރަމު. އަދި އެންމެ ބޮޑަށް ބޭނުން ޖެހިފައިވާ ފަރާތްތަކަށް މި ފަންޑުގެ މަދަދު ފަސޭހައިން ހޯދޭނެކަމަށްވެސް އުންމީދުކުރަމު.
ރައީސް މުުއިއްޒު ވިދާޅުވިއެވެ.
ދުނިޔޭގެ ފަރުދެއްގެ ޙައިޘިއްޔަތުން، ދުނިޔޭގެ ވެށްޓަށްޓަކައި ކޮންމެ މީހަކުވެސް އުފުލަން ޖެހޭ ޒިންމާތަކެއްވާކަން ރައީސުލްޖުމްހޫރިއްޔާގެ ވާހަކަފުޅުގައި ވަނީ ހަނދުމަކޮށްދެއްވާފައެވެ. މީގެ އިތުރުން، އުޖާލާ މުސްތަޤްބަލެއް ބިނާކުރުމަށްޓަކައި ގުޅިގެން މަސައްކަތްކޮށް، އަމަލުތަކުން އެކަން ޔަޤީންކޮށްދެއްވުމަށް ރައީސުލްޖުމްހޫރިއްޔާ އެދިވަޑައިގެންފައިވެއެވެ.
ކޮމެންޓު ފޮނުވާ