ޕީޕަލްސް ނެޝަނަލް ފްރަންޓް (ޕީއެންއެފް) އަށް އެންމެ ފުރަތަމަ ސޮއިކުރެއްވި ބޭފުޅަކަށް ކުރީގެ ރައީސް އަބްދުﷲ ޔާމީން ވެއްޖެއެވެ.
ޕީއެންއެފް އުފެއްދެވުމުގައި އިސްކޮށް މަސައްކަތް ކުރައްވާ ބައެއް ބޭފުޅުން "ހަބަރު އޮންލައިން" އަށް ވިދާޅުވީ އެ ޕާޓީއަށް އެންމެ ފުރަތަމަ ވެސް ސޮއި ކުރެއްވީ ރައީސް ޔާމީން ކަމަށެވެ. އޭގެ ފަހުގައި އެ ޕާޓީ އަށް އާންމު މެމްބަރުން ސޮއިކުރަމުންދާ ކަމަށް ވެސް އެ ބޭފުޅުން ވިދާޅުވިއެވެ.
"ވަރަށް ތަރުހީބު ބޮޑު. އަޅުގަނޑުމެން ހީކުރި ވަރަށް ވުރެ ވެސް ބޮޑު ތަރުހީބެއް ދަނީ ލިބެމުން،" އެ ތަނުން ބޭފުޅަކު ވިދާޅުވިއެވެ.
އޭނާ ވިދާޅުވީ މާދަމާ ވެސް ޕާޓީ އަށް ފޯމް ފުރުމުގެ ކަންކަން ކުރިއަށް ގެންދާނެ ކަމަށެވެ.
ޕީޕީއެމް އޮފީސް މީގެ ކުރިން ހިންގި ހ.ހުރަފާގެއަށް ޔާމީން ވަޑައިގެން މިރޭ އިންނެވި ފޮޓޯއެއް ކުރީގެ ޓެކްނޮލޮޖީ މިނިސްޓަރު މުހައްމަދު މަލީހް ޖަމާލް ވަނީ "އެކްސް" ގައި ޕޯސްޓް ކުރައްވައިފައެވެ. ރައީސް ޔާމީންގެ އަރިހުގައި ޔާމީންގެ ގާނޫނީ ވަކީލް ޑރ. މުހައްމަދު ޖަމީލް އަހްމަދު އިންނެވިއެވެ.
ވ. އާރަށް ކުއްޔަށް ދޫކުރުމުގައި ރިޝްވަތާއި މަނީ ލޯންޑްރިންގެ ކުށުގައި ޖަލު ހުކުމެއް ތަންފީޒު ކުރައްވަމުން ގެންދަވާ ބޭފުޅަކު ސިޔާސީ ހަރަކާތެއްގައި ބައިވެރިވެވަޑައިގަންނަވާ މައްސަލައިގައި ސުވާލު ކުރުމުން ކަރެކްޝަނަލް ސާވިސްގެ މީޑިއާ އޮފިޝަލަކު މިރޭ ވިދާޅުވީ އެކަން އެ އިދާރާގެ ސަމާލު ކަމަށް އައިސްފައިވާ ކަމަށެވެ. އަދި މިކަމުގައި ފިޔަވަޅު އަޅަން ޖެހިއްޖެ ނަމަ، އެކަން ބަލާފައި ފިޔަވަޅު އަޅުއްވާނެ ކަމަށް އޭނާ ވިދާޅުވިއެވެ.
ރައީސް ޔާމީން އާ ޕާޓީ އުފައްދަވަނީ ދަރިކަލުން ޒޭން ޢަބްދުﷲ ޔާމީންގެ ނަންފުޅުގައެވެ.
ރައީސް ޔާމީން އަދިވެސް ހުންނެވީ 11 އަހަރުގެ ޖަލު ހުކުމެއްގައެވެ. ނަމަވެސް ކަސްރަތުކުރުމަށް އެމަނިކުފާނުގެ ސިއްޙީ ހާލުކޮޅު ހުރިގޮތުން ވަނީ ރަށު ބަންދަށް ބަދަލުުކުރައްވާފައެވެ. ނަމަވެސް ޖަލު ހުކުމެއްގައި ހުރުމުން ސިޔާސީ ހަރަކާތްތަކުގައި ބައިވެރިވެވަޑައި ނުގެންނެވޭނެއެވެ. ކްރިމިނަލް ކޯޓުން އެމަނިކުފާނުގެ މައްޗަށް އިއްވާފައިވާ ޖަލު ހުކުމުގެ އިސްތިއުނާފީ އަޑުއެހުންތައް ނިމިފައިވާ އިރު، އެ މައްސަލަ މިހާރު އޮތީ ހުކުމަކާ ހިސާބުގައެވެ.
