ފަސްއެނބުރި ބެލުމެއް ނެތި ޕީޕީއެމް/ޕީއެންސީ ދާނީ ރައީސް ޑރ. މުހައްމަދު މުއިއްޒާއެކު ކުރިއަށް ކަމަށް ޕީއެންސީގެ ޗެއާޕާސަން އަބްދުއްރަހީމް އަބްދުﷲ މިރޭ ވިދާޅުވެއްޖެއެވެ.
ރައީސް މުއިއްޒާ އެކީގައި ހުންނެވި ކަން އަބްދުއްރަހީމް ހާމަކުރެއްވީ ޕީޕީއެމްގެ ލީޑަޝިޕާއި ކުރީގެ ރައީސް އަބްދުﷲ ޔާމީން އާ ދެމެދު ހިޔާލު ތަފާތުވުން ބޮޑުވެ، ޔާމީން ޕީޕީއެމުން ވަކިވެވަޑައިގެން އާ ޕާާޓީއެއް އުފެއްދުމާ ދިމާލަށް މިސްރާބު ޖަހާފައިވާ ދަނޑިވަޅެއްގައެވެ. ޔާމީން ފަހަތްޕުޅުގައި މިވަގުތު އެންމެ އިސްކޮށް ތިއްބެވީ އެމަނިކުފާނުގެ އެންމެ އިސް ވަކީލް އަދި ކުރީގެ ނައިބު ރައީސް ޑރ. މުހައްމަދު ޖަމީލް އަހުމަދާއި ކުރީގެ ވަޒީރު އަދި ޖަމީލަށް ބޮޑުބޭބެ ވިދާޅުވާ މުހައްމަދު މަލީހް ޖަމާލެވެ.
ވ. އާރަށް ކުއްޔަށް ދޫކުރުމުގެ ރިޝްވަތާއި މަނީ ލޯންޑްރިންގެ ކުށް ސާބިތުވެ 11 އަހަރުގެ ޖަލު ހުކުމެއް ތަންފީޒު ކުރައްވާތީ އާ ޕާޓީ އުފެއްދުމާ ގުޅޭ ވާހަކަތައް ޔާމީންގެ ފަރާތްޕުޅުން މީޑިއާގައި ދައްކަވަނީ ޖަމީލާއި މަލީހެވެ.
ޕީޕީއެމް/ޕީއެންސީގެ ލީޑަޝިޕަށް އަދި ރައީސް މުއިއްޒަށް ބަހުގެ ހަމަލާތަކެއް ދެއްވަމުން ގެންދަވާތީ ރައީސް މުއިއްޒުގެ ދިފާއުގައި މި ސަރުކާރުގެ އެކިއެކި މަގާމުތަކުގައި ތިއްބެވި ބޭފުޅުން ވަނީ ނުކުންނަވަން ފައްޓަވައިފައެވެ. އޭގެ ތެރޭގައި ރައީސް ޔާމީނަށް ތާއީދުކޮށް، އެމަނިކުފާނުގެ ފަހަތްޕުޅުގައި މިއަދާ ހަމައަށް މަސައްކަތް ކުރެއްވި ވަރަށް ގިނަ ބޭފުޅުން ވެސް ހިމެނިވަޑައިގަންނަވައެވެ. އެބޭފުޅުން ވެސް މިހާރު ބޭނުންވަނީ ރައީސް މުއިއްޒާ އެކީގައި ކުރިއަށް ވަޑައިގަތުމަށެވެ.
އަބްދުއްރަހީމް ސޯޝަލް މީޑިއާގައި ކުރެއްވި ޕޯސްޓެއްގައި ވިދާޅުވީ ޕީޕީއެމް/ޕީއެންސީއަކީ އެންމެ ފުރަތަމަ ގައުމު އިސް ކުރާ ދެ ޕާޓީ ކަމަށެވެ. އަދި އެ ދެ ޕާޓީ އޮތީ ދިވެހި ރައްޔިތުންގެ ނިންމުމާ އެއްގޮތަށް ރައީސް މުއިއްޒާއެކު ފިސާރި ސާބިތުވެ ކަމަށް ވެސް އޭނާ ވިދާޅުވިއެވެ.
"މާތް ﷲ ގެ ވާގިފުޅާ އެކު ރައީސް ޑރ. މުއިއްޒުގެ ސަރުކާރު ވެގެން ދާނީ ދިވެހި ގައުމާއި ރައްޔިތުންނަށް އުފާ ފާގަތިކަން ގެނެސްދޭނެ ސަރުކާރަކަށް. ފަސް އެނބުރި ބެލުމެއް ނެތި އަޅުގަނޑުމެން ދާނީ ކުރިއަށް،" ރައީސް މުއިއްޒުގެ ހާއްސަ މުޝީރެއްގެ ގޮތުގައި ހުންނެވި އަބްދުއްރަހީމް ވިދާޅުވިއެވެ.
އަބްދުއްރަހީމް ވިދާޅުވީ ދިވެހި ރައްޔިތުން ރައީސް މުއިއްޒާ އެކުގައި ސާބިތުވެ ތިއްބެވުމަކީ ގައުމާއި ރައްޔިތުންނަށް އޮތް އެންމެ ރަނގަޅު ގޮތް ކަމަށެވެ.
"އަޅުގަނޑުމެން ކޮންމެ މީހަކަށް ވުރެ މި ގައުމު މާ ބޮޑު،" އަބްދުއްރަހީމް ވިދާޅުވިއެވެ.
