އައިލެންޑް އޭވިއޭޝަންގެ ވަޒީފާ އިން ވަކި ކުރި މައްސަލާގައި މިސަރުކާރުގެ ޓްރާންސްޕޯޓް އެންޑް ސިވިލްޭވިއޭޝަން މިނިސްޓަރު މުހައްމަދު އަމީނަށް ދެ މިލިއަން ރުފިޔާގެ ބަދަލެއް ދޭން އެއްބަސްވެ، ކޯޓުން ބޭރުގައި މައްސަލަ ހައްލުކޮށްފިއެވެ.
2019 ވަނަ އަހަރު އައިލެންޑް އޭވިއޭޝަންގެ ޑިރެކްޓަރ ފްލައިޓް އޮޕަރޭޝަންގެ މަޤާމުން އަމީން ވަކިޮށް ވަނީ އެއަށްވުރެ ދަށް މަޤާމަކަށް ވަޒީފާއަށް ނުކުތުމަށް އަންގާފައެވެ. ނަމަވެސް އެއީ ވަޒީފާގެ އެއްބަސްވުމާ ޚިލާފުކަމެއްކަމަށްބުނެ އަމީންގެ ފަރާތުން މައްސަލަ ސިވިލް ކޯޓަށް ހުށައެޅިއެވެ.
މި މައްސަލާގައި މިސިވިލް ކޯޓުން މިދިޔަ އަހަރު އިއްވި ހުކުމްގައި ވަނީ އަމީން ވަޒީފާއިން ވަކިކޮށްފައިވަނީ ގޯސްކޮށް ކަމަށް ބުނެފައެވެ. އެހެންކަމުން 15 ދުވަހުގެ ތެރޭގައިމަޤާމު އިޔާދަކޮށްދިނުމަށާއި ނޫނީ އެފެންވަރުގެ އެހެން މަގާމެއް ދިނުމަށް ކޯޓުން އެންގިއެވެ. އަދި ބަދަލުގެ ގޮތުގައި ވަޒީފާއިން ވަކިކުރި ތާރީހުން ފެށިގެން ވަޒީފާ އަނބުރާ ހަމަޖައްސައިދޭ ދުވަހާ ހަމައަށް ލިބެންޖެހޭ މުސާރަ އާއި އިނާޔަތްތަކާއި އެލެވެންސް ދިނުމަށް ދިނުމަށްވެސް ސިވިލް ކޯޓުގެ ހުކުމުގައިވެއެވެ. ނަމަވެސް އަމީނަށް ވަޒީފާ ނުދީ އައިލެންޑު އޭވިއޭޝަނުން އެ މައްސަލަ ހައިކޯޓުގައި އިސްތިއުނާފްކުރިއެވެ.
އިސްތިއުނާފް ހައިކޯޓުގައި ކުރިއަށް ދަނިކޮށް، އައިލެންޑް އޭވިއޭޝަނާއި އަމީން ވަނީ ކޯޓުން ބޭރުގައި މައްސަލަ ހައްލުކޮށް، އިސްތިއުނާފު މައްސަލަ ބާތިލްކޮށްދޭން އެދިފައެވެ. މިއާއެކު ހައި ކޯޓުން މައްސަލަ ބާތިލްކުރި ރިޕޯޓްގައި ވަނީ އަމީންގެ ވަޒީފާ އިޔާދަކޮށް ބަދަލުގެ ގޮތުގައި 2،202،508 ރުފިޔާ ދޭން ކޯޓުން ބޭރުގައި އައިލެންޑް އޭވިއޭޝަނުން އެއްބަސްވެފައިވާކަމަށް ބުނެފައެވެ.
ކޮމެންޓު ފޮނުވާ