މިއަދު ރާއްޖޭގެ ރައީސުލްޖުމުހުރިއްޔާގެ މަގާމުގެ ހުވާކުރެއްވުމަށް ހަމަޖެހިފައިވާ، އިންތިޚާބީ ރައީސް ޑރ. މުއިއްޒު މާލޭ ސިޓީގެ މޭޔަރުކަމުން އިސްތިއުފާ ދެއްވައިފިއެވެ.
މާލޭ ސިޓީގެ މޭޔަރުކަމުން އިސްތިއުފާ ދެއްވުމަށްފަހު ކުރެއްވި ޓުވީޓުގައި މުއިއްޒު ވިދާޅުވެފައިވަނީ މާލެ ސިޓީ ކައުންސިލްގެ އެންމެހާ ކައުންސިލަރުންނާއި، ވެރިންނާއި، މުވައްޒަފުން އެމަނިކުފާނަށް ދެއްވި ފުރިހަމަ އެއްބާރުލެއްވުމަށާއި، ކުރެއްވި ބުރަ މަސައްކަތްޕުޅަށް ނުހަނު އިޚްލާސްތެރިކަމާއެކު ޝުކުރު ދަންނަވާކަމުގައެވެ. އަދި، މާލެ ސިޓީގެ ލޮބުވެތި ރައްޔިތުން އެމަނިކުފާނު މޭޔަރ ކަމަށް ހޮވުމަށް ކުރެއްވި ތާޢީދަށާއި، މޭޔަރ ކަމުގައި ޚިދުމަތް ކުރުމުގައި ދެއްވި ތާޢީދާއި އެއްބާރުލެއްވުމަށް ފަށްފަށުން ޝުކުރު ދަންނަވާކަމަށްވެސް މުއިއްޒު ވިދާޅުވެފައި ވެއެވެ.
މުއިއްޒު އިތުރަށް ވިދާޅުވެފައިވަނީ، މާލެ ސިޓީގެ ރައްޔިތުންގެ އުއްމީދުތައް ޙާސިލް ކޮށްދިނުމުގައި ވަރުގަދަ ޢަޒުމުގައި މަސައްކަތްކޮށް، އެ އުއްމީދުތައް ޙަޤީޤަތަކަށް ހަދައިދޭނެ ކަމުގައެވެ.
މާލެ ސިޓީގެ މޭޔަރ ކަމުން މިއަދު އަޅުގަނޑު އިސްތިޢުފާ ދީފީމެވެ. މި ފުރުސަތުގައި، މާލެ ސިޓީ ކައުންސިލްގެ އެންމެހާ ކައުންސިލަރުންނާއި، ވެރިންނާއި، މުވައްޒަފުން އަޅުގަނޑަށް ދެއްވި ފުރިހަމަ އެއްބާރުލެއްވުމަށާއި، ކުރެއްވި ބުރަ މަސައްކަތްޕުޅަށް ނުހަނު އިޚްލާސްތެރިކަމާއެކު ޝުކުރު…
— Dr Mohamed Muizzu (@MMuizzu) November 17, 2023
ރާއްޖޭގެ ދެވަނަ ޖުމުހޫރިއްޔާގެ 8 ވަނަ ރައީސްކަމާއި ޑރ. މުއިއްޒު ހަވާލުވެވަޑައިގަންނަވާނީ މިއަދު ހަވީރު 4:45 ގައި ޖުމުހޫރީ މައިދާނުގައި ބާއްވާ ޚާއްސަ ރަސްމިއްޔާތެއްގައެވެ.
ފާއިތުވި ރިޔސީ އިންތިޚާބު ކާމިޔާބު ކުރެއްވުމަށްފަހު، މިހާތަނަށް މުއިއްޒު ހުންނެވީ ސިޓީ ކައުންސިލުން ޗުއްޓީ ނަންގަވައިގެންނެވެ.
