ކުޅުދުއްފުށި ސިޓީ ޒިގްޒެގް ކުލަބަކީ އެރަށުގެ ޒުވާނުން ތަކެއް އިސްނަގައިގެން އުފައްދާފައިވާ ރަށުގެ ކުރިއެރުމާއި ރަށުގެ އިޖުތިމާއީ އަދި އެއްބައިވަންތަކަން ދެމެހެއްޓުމުގެ މަގުސަދުގައި އުފެއްދި ކުލަބެކެވެ.

ޒިގްޒެގުން ރަށުގެ އެކި ކަންކަމުގައި ބައިވެރިވެ އަމަލީ ގޮތުން ގިނަކަންކަން ރާވައި ހިންގައި ރަށުގެ ނަމާއި ޝަރަފް ދެމެހެއްޓުމަށް މާޒީގައިވެސް ވަނީ އެކި ފެންވަރުގައި ގިނަ ކަންތައްތަކެއް ކޮށްފައެވެ. ކުޅިވަރު މުބާރާތްތަކާއި އިޖުތިމާއި އަދި ރަށުގެ ކުރިއެރުމާއި ގުޅިފައިވާ ކަންކަމުގައި އެކި ފެންވަރުގައި އެކުލަބުގެ ބައިވެރިވުން އޮވެއެވެ.

ކުޅުދުއްފުށި ސިޓީގައި ރޭ ނިމިގެންދިޔަ އެސްޓީއޯ ޒިގްޒެގް އިންޓަރ އޮފީސް ނުވަވަނަ ފުޓްސަލް މުބާރާތަކީ މިހާތަނަށް އެކުލަބުން އިސްނަގައިގެން ބޭއްވި އެންމެ ކާމިޔާބު އެއް މުބާރާތެވެ. މުބާރާތުގެ ހުރިހާ ކަމެއްވެސް ފެނިގެން ގޮސްފައިވަނީ ވަރަށް ބޮޑަށް އިންތިޒާމުވެ ފުރިހަމައަށް ނިމިގެން ދިޔަތަނެވެ. މުބާރާތުގައި ޒިގްޒެގުން ހަރަކާތްތެރިވި ޓީމު ކިތަންމެ ކުޑަ ނަމަވެސް ކާމިޔާބު މުބާރާތަކަށް ހެދުމަށް ދެއްކި ހިތްވަރާއި، ކުރި މަސައްކަތަކީ މުބާރާތް ކާމިޔާބު ކަމާއިއެކު ނިމިގެން ދިޔަ އެންމެ ބޮޑު އެއް ސަބަބެވެ.

މުބާރާތުގައި ރާއްޖޭގެ އެންމެ މަތީ ފަންތީގެ ކުޅުންތެރިން ވަނީ ފެނިގެން ގޮސްފައެވެ. އަދި މުބާރާތް އިންސާފުކުރި ރެފްރީންނަކީވެސް ރާއްޖޭގެ އެންމެ މަތީ ފަންތީފައި ރެފްރީކަން ކުރަމުންދާ ރެފްރީންނެވެ. މި މުބާރާތް ޒިގްޒެގުން ވަނީ މުޅި ރާއްޖެއަށް ލައިވްކޮށް ދައްކާފައެވެ. ޔެސްޓީވީންނާއި، ޒިގްޒެގް ފޭސްބުކް ކުލަބުން މުބާރާތް ލައިވްކޮށްފައިވާއިރު، މުބާރާތުގެ ހުރިހާ މެޗެއްގެ ޚަބަރުތައް، ޚަބަރު އޮންނާއި، ވަގުތު އަދި ޕީއެސްއެމްއިން ވަނީ ގެނެސްދީފައެވެ.

މުބާރާތް ކާމިޔާބު މުބާރާތަކަށް ވެގެންދިޔައީ ވަރަށް ގިނަ ބައެއްގެ އެހީތެރި ކަމާއިއެކުގައިކަން ޒިގްޒެގުން ފާހަގަ ކުރެއެވެ. މުބާރާތުގެ އެކްސްކްލޫސިވް ޕާޓްނަރަކީ އެސްޓީއޯއެވެ. ބޭންކިން ޕާޓްނަރަކީ ބީއެމްއެލްއެވެ. ޑިޖިޓަންލް ޕާޓްނަރަކީ ދިރާގެވެ. މުބާރާތުގެ ބްރޯޑްކާސްޓިން ޕާޓްނަރަކީ ޔެސްޓީވީއެވެ. އަދި އޮންލައިން ޕާޓްނަރުންނަކީ ޚަބަރު އޮންލައިނާއި ވަގުތެވެ. ޕްރިންޓިން ޕާޓްނަރަކަށް ޑަބްލިއު ކްރާފްޓް ސެންޓަރ ހަމަޖައްސާފައިވާއިރު، ކޭޓްރިން ޕާޓްނަރުންނަކީ އޮރެންޖް ޑެކް އަދި ކާނިވަލްއެވެ. މުބާރާތުގެ އެޑް ބޯޑަރުންގެ ގޮތުގައި ހަމަޖައްސާފައިވަނީ އިންކްވެލް، ޗާންދަލިޔާ ބުކްޝޮކް އަދި ސީންއެވެ. އެކޮމަޑޭޝަން ޕާޓްނަރަކަށް ބަރާބަރު ހަމަޖައްސާފައިވާއިރު ޓްރެވަލް ޕާޓްނަރަކީ ބީ ޓްރެވަލްސްއެވެ.

ޒިގްޒެގުން ވަނީ މުބާރާތް ކާމިޔާބު މުބާރާތަކަށް ހެދުމަށް މިފަރާތްތަކުން ދިން އެހީތެރިކަމާއި އެއްބާރުލުން ފާހަގަކޮށް ޚާއްސަ ހަނދާނީ ފިލާއެއްވެސް ދީފައެވެ. ޒިގުޒެގުގެ އަމާޒަކީ މިމުބާރާތް އިތުރަށް ފުޅާކޮށް، އަންނަ އަހަރުވެސް ބޭއްވުމެވެ. އެކުލަބުން ހާމަކޮށްދިން އެއްކަމަކީ އަދި ޔަގީންކޮށް ދިން ކަމަކީ ކުޅުދުއްފުށީފައި މިއަށްވުރެވެސް ބޮޑުކޮށް ފުޅާކޮށް މިފަދަ މުބާރާތްތައް ބޭއްވި ދާނެކަމެވެ.