ލެސްޓާ އެއްވަނައިގަ ދެވަނަ ބުރަށް

ޔޫރޮޕާ ލީގުގައި އިނގިރޭސި ކުލަބު ލެސްޓާ ސިޓީން ގުރޫޕްގެ ފަހު މެޗު ކާމިޔާބުކޮށް އެއްވަނައިގަ ގުރޫޕްގެ މެޗުތައް ނިންމާލައިފިއެވެ.

މެޗަށް ނުކުތްއިރު ވެސް މުބާރާތުގެ ދެވަނަ ބުރު ޔަގީންކޮށްފައިވާ ލެސްޓާއިން މެޗު ކާމިޔާބުކުރީ އަމިއްލަ ދަނޑުގައި ކުޅެ އޭއިކޭ އެތެންސްއާ ވާދަކޮށް 2-0 ލަނޑުންނެވެ. ފުރަތަމަ ފަނަރަ މިނިޓުގެ ތެރޭގެ ދެލަނޑު ފެނިގެންދިޔަ މެޗުގެ ލަނޑުތައް ލެސްޓާ އަށް ކާމިޔާބުކޮށްދިނީ ސެންގިޒް އަންޑާ އާއި ހާވިއޭ ބާންސްއެވެ. ބާންސް ވަނީ ލެސްޓާއަށް ސީޒަންގައި މިހާތަނަށް 6 ލަނޑު ކާމިޔާބުކޮށްފައެވެ. އޭނާ ވަނީ އެންމެފަހުން ލެސްޓާއަށް ކުޅުނު ހަތަރު މެޗުގައި ތިންލަނޑު ކާމިޔާބުކޮށްފައެވެ.

ރޭގައި އޭނާ ޖެހި ލަނޑުވެގެން ގޮސްފަވަނީ ލެސްޓާ ސީޓީގެ ކިންގް ޕަވާރ ސްޓޭޑިއަމްގައި ކާމިޔާބުކުރި 700 ވަނަ ލަނޑަށެވެ. އެންމެ ފުރަތަމަ ލެސްޓާއިން މި ދަނޑުގައި ލަނޑެއް ކާމިޔާބުކުރީ 2002 ވަނައަހަރުއެވެ.

މިއީ ގުރޫޕްގައި ލެސްޓާއިން ކުޅުނު 6 މެޗުގެ ތެރެއިން އެޓީމުން ކާމިޔާބުކުރި 4 ވަނަ މެޗެވެ. އެންމެފަހުން އޭއީކޭ އެތެންސް ޔޫރަޕުގައި ކުޅުނު 12 މެޗުގެ ތެރެއިން 11 މެޗުން ވަނީ ބަލިވެފައެވެ. މި ގުރޫޕުން ލެސްޓާއެކު ދެވަނަ ބުރުން ޖާގަހޯދީ ސްޕޯޓިން ބްރާގާއެވެ.

ރޭ މުބާރާތުގައި ރެއާލް ސޮސެއިޑާޑް ވަނީ ނަޕޯލީއާ 1-1 އެއްވަރުކޮށް ތިންވަނަ ފަހަރަށް މުބާރާތުގެ ދެވަނަބުރުން ޖާގަހޯދާފައެވެ. އެ ގުރޫޕުން ދެން މުބާރާތުގެ ދެވަނަ ބުރަށް ދިޔައީ ނަޕޯލީއެވެ. މުބާރާތުގެ ދެވަނަ ބުރުގެ ގުރުއަތުލުން އޮންނާނީ ހޯމަ ދުވަހުއެވެ. ދެވަނަ ބުރުގެ މެޗުތައް ފަށާނީ އަންނަ ފެބްރުވަރީ މަހުގައެވެ.