ހައިކޯޓުގެ ފަނޑިޔާރު އަލްއުސްތާޛު އަޙްމަދު ޝަކީލް ރިޓަޔަރކުރަން ފުރުޞަތު ދިނުމަށް ޖޭއެސްސީން ނިންމައިފިއެވެ.
ޖޭއެސްސީން ބުނީދިވެހިރާއްޖޭގެ ފަނޑިޔާރުންގެ ގާނޫނުގެ 66 ވަނަ މާއްދާގެ (ނ) އާއި، ފަނޑިޔާރުންގެ ރިޓަޔަރމެންޓް ގަވާއިދުގެ 2 ވަނަ މާއްދާގެ (ނ)ގެ ދަށުން، ސިއްހީ ސަބަބާހުރެ ފަނޑިޔާރުކަމުން ރިޓަޔަރވުމަށް އެދި ހައިކޯޓުގެ ފަނޑިޔާރު އަލްއުސްތާޛު އަޙްމަދު ޝަކީލް، ގަވާއިދުގައި ބަޔާންކޮށްފައިވާ ފަދައިން ބައްޔާބެހޭ ސްޕެޝަލިސްޓް ޑޮކްޓަރުގެ ލިޔެކިއުމާއެކު ހުށަހެޅުމުން، އެ ލިޔެކިއުމަށް ރިއާޔަތްކޮށް ފަނޑިޔާރު އަލްއުސްތާޛު އަޙްމަދު ޝަކީލް ފަނޑިޔާރުކަމުން ރިޓަޔަރކުރުމަށް، އިއްޔެ ބޭއްވި އެ ކޮމިޝަންގެ ޖަލްސާގައި ވޯޓްގައި ބައިވެރިވި މެމްބަރުންގެ އިއްތިފާގުން ނިންމާފައިވާކަމަށެވެ.
ފަނޑިޔާރު އަލްއުސްތާޛު އަޙްމަދު ޝަކީލަށް ކުރިމަތިވެފައި ވަނީ ހިތުގެ ބައްޔެއްކަމުގައިވާ Sick Sinus Syndrome އަށްކަމަށް ޖޭއެސްސީން ބުންޏެވެ. މި އާލާސްކަންފުޅާ ގުޅިގެން ދެ ފަހަރެއްގެ މަތިން ޕޭސްމޭކަރ ލައްވާފައިވެއެވެ. މި ބައްޔާހުރެ ފަނޑިޔާރު އަލްއުސްތާޛު އަޙްމަދު ޝަކީލަށް މިހާރު ކުރިމަތިވަމުންދާ އުނދަގޫތަކާ ގުޅިގެން ޑޮކްޓަރު ދެއްވާފައިވާ ރެކަމަންޑޭޝަންތަކަށް، މި ކޮމިޝަނުން ގޮތެއް ނިންމުމުގައި ބުރަވެފައި ވާނެކަމަށް ޖޭއެސްސީން ބުންޏެވެ.
ފަނޑިޔާރު އަލްއުސްތާޛު އަޙްމަދު ޝަކީލު ފަނޑިޔާރުކަމުގެ މަސައްކަތުގައި 20 އަހަރު ހިދުމަތްކުރައްވާފައިވެއެވެ.
ސިއްހީ ސަބަބާހުރެ ފަނޑިޔާރުން ރިޓަޔަރކުރުމަކީ ގާނޫނާއި ގަވާއިދުގައި ކަނޑައަޅާފައިވާ ގޮތުގެ މަތިން އެ ކޮމިޝަނުން އަދާކުރަމުންދާ މަސްއޫލިއްޔަތެކެވެ. ސިއްހީ ސަބަބަށްޓަކައި މި އަހަރު މިހައިތަނަށް ހަތަރު ފަނޑިޔާރަކު ރިޓަޔަރކޮށްފައި ވެއެވެ.
