ހދ. މަކުނުދޫ އެއަރޕޯޓު އެޅުމަށް ބޭނުންވާ ބިން ހިއްކުމުގެ މަޝްރޫޢު ވަގުތީގޮތުން މަޑުޖައްސާލައިފިއެވެ. މި މަސައްކަތް ވަގުތީގޮތުން މަޑުޖައްސާލާފައިވަނީ އިއްޔެ އަރަށުގައި ހިނގި ގޭސް ސިލިންޑަރެއް ގޮވުމުގެ ހާދިސާގައި ދެ ބިދޭސީއަކު މަރުވުމާއި ގުޅިގެންނެވެ.
ހދ. މަކުނުދޫގައި ސިލިންޑަރެއް ގޮވައިގެން ދެމީހަކު މަރުވި ހާދިސާ ފުލުހުންނާއި ސިފައިން ގުޅިގެން މިހާރި ގެންދަނީ ތަހުގީގު ކުރަމުންނެވެ. ފުލުހުންގެ ފަރާތުން ހާމަ ކޮށްފައިވާ ގޮތުގައި އެ މުވައްސަސާގެ ފޮރެންސިކް ޓީމަކާއި ތަހުގީގު ޓީމެއް މިހާރު ދަނީ މަކުނުދޫގައި ހަރަކާތްތެރި ވަމުންނެވެ. އެމްއެންޑީއެފްއިން ބުނެފައިވަނީ ފުލުހުންނާއި ގުޅިގެން އެ ހާދިސާ ތަހުގީގު ކުރަމުން ދާކަމުގައެވެ.
މި ހާދިސާގައި މަރުވީ އިންޑިއާގެ ދެ ރައްޔިތުން ކަމުގައިވާ، މުހައްމަދު ރާޖާ އަންސާރީ, 27, އަދި ސުދީރާ ސެތީ, 25, އެވެ. މި ދެ ބިދޭސީންނަކީވެސް މަކުނުދޫ އެއާޕޯޓު އަޅަން ބޭނުންވާ ބިން ހިއްކުމާއި ގޮނޑުދޮށް ހިމާޔަތް ކުރަން ކުރިއަށްގެންދާ މަޝްރޫއުގައި މަސައްކަތްކުރާ ދެ މީހުންނެވެ. އެ ދެމީހުންނަކީ ބިގް ފިޝް ކުންފުނީގެ ދެ މުވައްޒަފުންނެވެ.
މަކުނޫ މަސް މާރުކޭޓުގައި އިއްޔެ ހިނގި ހާދިސާގައި، ގޭސް ސިލިންޑަރު ގޮވާ ފިހުނު ދެމީހުންގެ ހަށިގަޑުގެ ކުދިކުދި ވުމުގެ ސަބަބުން މަރުވި ދެ ބިދޭސީންވެސް ކާކުކަން ނޭގޭވަރަށް އަދާފައިވެއެވެ. މިގޮތުން މަރުވި ދެމީހުންގެ ހަށިގަޑުގެ ބައެއް ބައިތަށް ސިލިންޑަރު ގޮވި ހާދިސާގެ 150 ވަރަކަށް ފޫޓަށް ދުރަށް ބުރައިގެން ގޮސްފައިވާކަމަށްވެސް އެރަށުން ވާހަކަ ދެއްކި ބައެއް މީހުން ކިޔައިދީފައި ވެއެވެ.
މަރުވި ދެ މީހުންގެ ހަށިގަނޑު މިއަދު މާލެ ގެނައުމަށް ވަނީ ނިންމާފައެވެ.
މަކުނުދޫ ބިން ހިއްކުމުގެ މަސައްކަތުގެ އިތުރުން އެ ރަށުގެ ގޮނޑުދޮށް ހިމާޔަތްކުރުމުގެ މަސައްކަތް ވެސްވަނީ ބިގްފިޝް މޯލްޑިވްސް ޕްރައިވެޓް ލިމިޓެޑްއާ ހަވާލުކޮށްފައެވެ.
މި މަޝްރޫއުގެ ދަށުން އެރަށު އެއާޕޯޓަށް އެޅުމަށް ބޭނުންވާ 43.12 ހެކްޓަރުގެ ބިން ހިއްކާ، 3493 މީޓަރުގެ ސަރަހައްދެއްގައި ރިވެޓްމެންޓް ޖެހުމަށް ވަނީ ހަމަޖެހިފައެވެ. މި މަޝްރޫއުގެ އަކަކީ 16،000،000 ޑޮލަރެވެ. މި މަސައްކަތް 366 ދުވަސް ތެރޭގައި ނިންމަން ޖެހެއެވެ.
ކޮމެންޓު ފޮނުވާ