މިހާރު ހިނގަމުންދާ އިސްރާއީލް-ހަމާސް ހަނގުރާމާގައި އިސްރާއީލުން ޣައްޒާއަށް ދެމުންދާ އުދުވާންގައި، ޣައްޒާގައި ފަލަސްތީނުން ޝަހީދުވި މީހުންގެ އަދަދު 1900 އަށް އަރާފައިވާ ކަމަށް، ވަށާލާފައިވާ ޣައްޒާގެ ސިއްހަތާ ބެހޭ ވުޒާރާއިން ބުނެފިއެވެ. އަދި އޭގެ އިތުރުން މި ހަމަލާތަކުގައި މިހާތަނަށް ފަލަސްތީނުގެ 7،969 މީހުން ޒަޚަމްވެފައިވާކަމަށްވެސް ޣައްޒާގެ ހެލްތު މިނިސްޓްރީން ބުނެފައި ވެއެވެ.
ހަމާސް ޖަމާއަތާއި އިސްރާއީލުން ބަދަލުކުރަމުންދާ ހަމަލާތަކުގައި މިހާތަނަށް އިސްރާއީލުގެ 1،300 މީހުން މަރުވެ، 3،400 މީހުންނަށް ވަނީ އަނިޔާވެފައެވެ.
ފާއިތުވި 7 ދުވަހު ޣައްޒާއަށް އިސްރާއީލުން ދެމުންދާ ހަމަލާތަކަށް ހުއްޓުމެއް އައިސްފައި ނުވާއިރު، އިސްރާއީލުން ވަނީ ޣައްޒާއަށް ކާނާއާއި ތެލާއި އަދި ފެން ސަޕްލައި ކުރުން ހުއްޓުވާފައެވެ. އިސްރާއީލުން ބުނެފައިވަނީ އަސާސީ ޚިދުމަތްތައް ޣައްޒާގެ ރައްޔިތުންނަށް ދެން ލިބިގެންދާނީ ހާމަސް ޖަމާއަތުން ރަހީނު ކޮށްފައިވާ އެގައުމުގެ ރައްޔިތުން ދޫކޮށްލުމުން ކަމުގައެވެ.
އިސްރާއީލުގެ އަސްކަރިއްޔާއިން މިހާރުވަނީ ފަލަސްތީނުގެ ގާޒާގެ އުތުރުގައި ދިރިއުޅެމުންދާ 1.1 މިލިއަން ރައްޔިތުން އެ ސަރަހައްދު ދޫކޮށް ދިއުމަށް 24 ގަޑިއިރުގެ މުހުލަތެއް ދީފިއެވެ. އެހެންނަމަވެސް، ޣައްޒާގެ އުތުރުން 1.1 މިލިއަން މީހުން ގެދޮރު ދޫކޮށް ދިއުމަށް އިންޒާރުދީ އިސްރާއީލުނު ނެރުނު އަމުރަކީ ހަނގުރާމައިގެ އުސޫލާއި، އިންސާނިއްޔަތާ ހިލާފު އަމުރެއް ކަމުގައި އދ.ގެ އެއިޑް ޗީފް މާޓިން ގްރިފިތުސް ވަނީ ވިދާޅުވެފައެވެ.
ހަމާސް ޖަމާއަތުން އިސްރާއީލަށް ދިން ކުއްލި ހަމަލާތަކަށްފަހު އިސްރާއީލުގެ އެތައްހާސް ސިފައިންނެއް މިހާރުވަނީ ޣައްޒާގެ ބޯޑަރު ކައިރިއަށް ޖަމާކޮށްފައެވެ. މަސްރަހު ދިރާސާކުރާ ފަތާތްތަކުން ބުނަމުންދަނީ އިސްރާއީލުން ތައްޔާރުވަމުން ދަނީ އެއްގަމުން މަގުން ޣައްޒާއަށް އެރުމަށް ކަމުގައެވެ.
