ސަރުކާރު ބަދަލުވުމުގެ ކަންކަން ކުރިއަށް ދަނިކޮސް، ދެޤައުމަކަށް ސަފީރުން އައްޔަންކުރެއްވުމަށް މަޖިލީހަށް ސަރުކާރުން ފޮނުވުން، އިންތިޚާބީ ރައީސްގެ އޮފީހުން ކަންބޮޑުވުން ފާޅުކޮށްފިއެވެ.
އަންނަ މަހުގެ 17 ވަނަ ދުވަހަށް މިހާރު އޮތް ވެރިކަމުގެ ދައުރު ހަމަވާން ދަނިކޮށް އިތުރު ދެ ޤައުމަކަށް ސަފީރުން އައްޔަން ކުރުމަށް ރައްޔިތުންގެ މަޖިލީހަށް ވަނީ ހުށައަޅާފައެވެ.
އެކުވެރި އަރަބި އިމާރާތަށް ރާއްޖެއިން ކަނޑައަޅުއްވާ ސަފީރު ކަމަށް މއ. ރުއްކުރި، މަރްޔަމް މިދްފާ ނައީމް އަދި ބަންގްލަދޭޝަށް ރާއްޖެއިން ކަނޑައަޅުއްވާ ސަފީރު ކަމަށް ސ. ހުޅުދޫ، އަސަރީގެ، ޝިއުނީން ރަޝީދު އައްޔަންކުރަން ރައީސުލްޖުމްހޫރިއްޔާ ފޮނުއްވެވި މައްސަލަ ދިރާސާކޮށް ގޮތެއް ނިންމުމަށް ރައްޔިތުންގެ މަޖިލީހުގެ މިއަދުގެ ޖަލްސާގައި ވަނީ ހާރިޖީ ގުޅުންތަކުގެ ކޮމިޓީއަށް ފޮނުވާފައެވެ.
އެކުވެރި އަރަބި އިމާރާތަށް ރާއްޖެއިން ކަނޑައަޅުއްވާފަ ހުންނަވާ ސަފީރުކަމުގެ މަގާމުގައި މިހާރު ހުންނެވީ ހ. މިސްޓްރީލޮޖް، އާމިނަތު ޝަބީނާއެވެ. ބަންގްލަދޭޝަށް ރާއްޖެއިން ކަނޑައަޅުއްވާފައިވާ ސަފީރުކަމުގެ މަގާމުގައި މިހާރު ހުންނެވީ ޝިރުޒިމަތު ސަމީރުއެވެ.
މިދެބޭފުޅުން ސަފީރު ކަމަށް އައްޔަން ކުރުމަށް މަޖިލީހަށް ހުށަހަޅަފައިވައިރު އިއްޔެވެސް ވަނީ ދެ ސަީރަކަށް ރުހުން ހޯދުމަށް މަޖިލީހަށް ހުށަހަޅާފައެވެ.
އެކަންބޮޑުވުން މިއަދުވެސް ފާޅުކުރައްވަމުން އިންތިޤާލީ މަރުހަލާގެ ތަރުޖަމާން މުޙައްމަދު ފިރުޒުލް ވިދާޅުވީ، ވެރިކަން ބަދަލުކުރުމަށް ކުޑަ ދުވަސްކޮޅަކަށްވެފައިވަނިކޮށް، ސަފީރުން އައްޔަން ކުރުން ފަދަ ކަންކަން ކުރުމަކީ އަލަަށް އަންނަ ސަރުކާރަށް ހުރަސްތައް ކުރިމަތިވާނެ ކަމެއްކަމަށެވެ.
އެހެންކަމުން އެކަން ނުކުރުމަށް އިންތިޚާބީ ރައީސްގެ އޮފީހުން ވަނީ އެދިފައެވެ.
