އަންނަ އަހަރަށް ލަފާކޮށް މަޖިލީހަށް ހުށަހަޅާ ބަޖެޓް މަޖިލީހުން ފާސް ކުރުމުގައާއި، ސަރުކާރު އެކުލަވާލުމަށްޓަކައި މަޖިލިސް ތެރެއިން ދޭންޖެހޭ އެއްބާރުލުން ދޭނެކަމަށް މަޖިލީހުގެ ސުޕަ މެޖޯރިޓީ ޕާޓީ އެމްޑީޕީން ބުނެފިއެވެ.
އެމްޑީޕީގެ ޕީޖީ ގްރޫޕްގެ ލީޑަރު މުހައްމަދު އަސްލަމް މިއަދު ރައްޔިތުންގެ މަޖިލީހުގައި ބޭއްވި ނޫސްވެރިންގެ ބައްދަލުވުމުގައި ވިދާޅުވީ އެމްޑީޕީން މަޖިލީހުގައި މަސައްކަތް ކުރާނީ ޒިންމާދާރު އިދިކޮޅު ޕާޓީއެއްގެ ދައުރު ކަމަށެވެ. އެއީ މަޖިލީހުގައި ކަމަށްވިޔަސް އަދި މަޖިލީހުން ބޭރުގައި ކަމަށްވިނަމަވެސް އެމްޑީޕީގެ ދައުރަކަށް ވާނީ ސަރުކާރު ޒިންމާދާރުކޮށް ޖަވާބުދާރީ ކުރުވުން ކަމަށެވެ.
އަސްލަމް ވިދާޅުވީ މަޖިލީހުން ކުރަން އޮތް އެންމެ މުހިންމު މަސައްކަތަކީ އަންނަ އަހަރަށް ލަފާކުރާ ދައުލަތުގެ ބަޖެޓް ފާސް ކުރުން ކަމަށެވެ. ބަޖެޓް ފާސް ކުރުމުގައި އަލަން އިންތިޚާބު ވެފައިވަ ރައީސުލްޖުމްހޫރިއްޔާއާއި އާ ސަރުކާރުން ބޭނުންވާ ބަދަލު ތަކާއިއެކު ބަޖެޓް ފާސް ކުރުމަށް އެއްބާރުލުން ދެއްވާނެ ކަމަށެވެ. އަދި މަޖިލީހުން ފާސްކުރަންޖެހޭ އެހެންވެސް މުހިންމު ކަންކަން ފާސްކޮށް އާ ސަރުކާރަށް އެއްބާރުލުން ދޭނެކަމަށް އަސްލަމް ވިދާޅުވިއެވެ.
ޑރ. މުއިއްޒުގެ ސަރުކާރު އެކުލަވާލައި އައްޔަން ކުރައްވާ ވަޒީރުންގެ މަޖިލީހުގެ މެމްބަރުންނަށް ރުހުން ދެއްވަނީ ރައްޔިތުންގެ މަޖިލީހުންނެވެ. ކެބިނެޓަށް ރުހުން ދެއްވުމާއި އަދިވެސް މަޖިލިސް ތެރެއިން ޤާނޫނު ތަކަށް ގެންނަންޖެހޭ ބަދަލުތައް ގެނައުމުގައި އިންތިޚާބީ ރައީސް ޑރ. މުއިއްޒު ވަނީ މަޖިލީހުގެ އެއްބާރުލުން ލިބިގެންދާނެކަމަށް އުންމީދު ކުރައްވާކަމަށް ވިދާޅުވެފައެވެ.
އަންނަ އަހަރަށް ލަފާކުރާ ދައުލަތު ބަޖެޓް އެކުލަވާލުމުގައި އިންތިހާބީ ރައީސް ޑރ. މުހައްމަދު މުއިއްޒުގެ ފަރާތްޕުޅުން މަސައްކަތް ކުރާނެ ކޮމިޓީއެއް އުފައްދައި، މަސައްކަތްވަނީ ފަށާފައެވެ. އިންތިގާލީ މަރުހަލާގެ ތަތުޖަމާނު މުހައްމަދު ފިރުޒުލް ނޫސްވެރިން ގާތު މިއަދު ވިދާޅުވީ، އަންނަ އަހަރަށް ލަފާކުރާ ދައުލަތުގެ ބަޖެޓް ތައްޔާރު ކުރުމަށް އިންތިހާބީ ރައީސްގެ ފަރާތްޕުޅުން މަސައްކަތް ކުރުމަށް އެކުލަވައިލީ ހަތް މެންބަރުންގެ ކޮމިޓީއެއް ކަމަށެވެ. ކޮމިޓީގައި ތިއްބަވާ ބޭފުޅުންގެ މައުލޫމާތު އަދި ހާމައެއް ނުކުރެއެވެ.
