ޗެރިޓީ ޝީލްޑް މެޗުން ބަލިވީ އުންމީދުކުރިވާރާ ގާތަށްވެސް ނުކުޅެވިގެން ކަމަށް މާޒިޔާގެ ކޯޗު މުހަންމަދު ނިޒާމް ބުނެފިއެވެ.
މެޗަށްފަހު ވާހަދައްކަމުން ނިޒާމް ބުނީ ފެށުނުއިރު ދެ ގޯލު ޖެހުނު ކަމުގައި ވިޔަސް މާޒިޔާ އިން ޕްރީ ސީޒަނުގައި ކުޅުނު ޕްރެކްޓިސް މެޗުތަކާ ގާތަށް ވެސް މި މެޗުގައި ނުކުޅެވޭ ކަމަށެވެ.
މިއީ ކުޅުންތެރިންނަށް ލިބުނު ރަނގަޅު މެސެޖެއް. މިއާ އެކު ލީގުގައި ދާނީ ރަނގަޅަށް އިރާދަކުރެއްވިއްޔާ. މިއީ ރަނގަޅު ސްޓާޓަކަށް ލިބުނު ފުރުސަތެއް. ދެން މީގައި ކުޅުންތެރިން ސަމާލުވެގެން މަސައްކަތް ކޮށްފިއްޔާ ރަނގަޅު ނަތީޖާ ނެރެވޭނެ.
– މި ސީޒަނަށް ޓީމާ ހަވާލުވި ކޯޗު ބުނެފައިވެއެވެ.
އަނިޔާގެ ސަބަބުން މާޒިޔާގެ ބައެއް ކުޅުންތެރިން ނުލައި މި މެޗުގައި ކުޅުނުއިރު، އީގަލްސްގެ ބިދޭސީ ކުޅުންތެރިން އަދި އެ ޓީމާ ނުގުޅޭތީ އެ ޓީމުން އެއްކޮށް ކުޅުނީ ދިވެހި ކުޅުންތެރިން ލައިގެންނެވެ. މިހާތަނަށް ތިން ފަހަރު ޝީލްޑް އުފުލާލާފައިވާ މާޒިޔާ ރޭގެ މެޗުން މޮޅުވިނަމަ އެންމެ ގިނަ ފަހަރަށް ޝީލްޑް ކާމިޔާބުކުރުމުގެ ރެކޯޑް ލިބޭނެ އެވެ.
ކޮމެންޓު ފޮނުވާ