އަންނަ އަހަރުގެ އޭއެފްސީ ކަޕުގެ ގްރޫޕް ސްޓޭޖުގެ ފުރުސަތު ބަޝަންދުރާ ކިންގްސްއަށް ދޭން ބަންގްލަދޭޝްގެ ފުޓްބޯޅަ ފެޑެރޭޝަނުން ނިންމައިފިއެވެ.
ބަޝަންދުރާ ކިންގްސްއަށް ގްރޫޕް ސްޓޭޖުގެ ފުރުސަތު ދޭން ނިންމުމުން، ދެކުނު އޭޝިޔާ ގްރޫޕުގެ ހަތަރު ޓީމުގެ ތެރެއިން ތިން ޓީމު ކަށަވަރުވީއެވެ. އެއީ ރާއްޖޭގެ މާޒިޔާއާ، އިންޑިޔާގެ އޭޓީކޭ މޯހަން ބަގާން އަދި ބަންގްލަދޭޝްގެ ބަޝަންދުރާ ކިންގްސްއެވެ. ބަޝަންދުރާ ކިންގްސްއަށް އަންނަ އަހަރުގެ ގްރޫޕް ސްޓޭޖުން ފުރުސަތު ދޭން ނިންމީ، ކޮވިޑާ ގުޅިގެން މި އަހަރުގެ ސީޒަން ކެންސަލްކޮށްފައިވާތީ، ކުރީ ސީޒަންގެ ނަތީޖާތަކަށް ބަލައިގެންނެވެ.
ގުރޫޕް ސްޓޭޖުގެ ޕްލޭ އޮފްގައި ވާދަކުރާނީ ރާއްޖޭން ކްލަބު އީގަލްސްއާ، އިންޑިޔާއިން ބެންގަލޫރު އެފްސީ އަދި ބަންގްލަދޭޝްއިން ޑާކާ އަބަހާނީ ލިމިޓެޑްވެ. މި ތިން ޓީމާ ވާދަކުރުމަށް ޕްރިމިލިނަރީ ސްޓޭޖުގައި ލަންކާ، ބޫޓާން އަދި ޕާކިސްތާނާ ނޭޕާލުގެ ކްލަބުތަކުން ވާދަކުރާނެއެވެ. ޕާކިސްތާނާ ލަންކާގެ ކްލަބުތައް އަދި ކަނޑަނޭޅެއެވެ. ބޫޓާނުން ތިމްޕޫ ސިޓީ ވާދަކުރާއިރު ނޭޕާލުން ވާދަކުރާނީ މަޗިންދްރާ ޔުނައިޓެޑްއެވެ.
މިއަހަރުގެ އޭއެފްސީ ކަޕް ބަޝަންދުރާ ކިންގްސްއިން އޭއެފްސީ ކަޕު ކެންސަލް ކުރުމުގެ ކުރިން ކުޅުނު ހަމަ އެކަނި މެޗުގައި ވާދަކުރީ ރާއްޖޭގެ ޓީސީ ސްޕޯޓްސްއާއެވެ. އެ މެޗު ފަސް ލަނޑު އެއް ލަނޑުން ކާމިޔާބުކުރީ ބަޝަންދުރާ ކިންގްސްއެވެ.
އަންނަ އަހަރު މުބާރާތް މުބާރާތް ކޮންމެވެސް އެއްގައުމެއްގައި ބޭއްވުމަށް އޭއެފްސީ އަންނަނީ މަޝްވަރާކުރަމުންނެވެ. އޭއެފްސީ މަސައްކަތް ކުރަމުންދަނީ އަންނަ އަހރުގެ މުބާރާތް މެލޭޝިޔާގައި ބޭއްވުމަށެވެ.
ކޮމެންޓު ފޮނުވާ