ޕީއެންސީގެ ރައީސަކަށް އިންތިޚާބީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އަދި އެޕާޓީގެ ނައިބް ރައީސަށް އިންތިޚާބީ ނައިބް ރައީސް ހުސެއިން މުހައްމަދު ލަތީފް އިންތިޚާބު ކޮށްފިއެވެ.

މިރޭ ކުރިއަށް ދިޔަ ޕީއެންސީގެ ކައުންސިލް ބައްދަލުވުމުގައި ވަނީ އެޕާޓީގެ ރައީސް ކަމުގެ މަޤާމަށް ރިޔާސީ އިންތިޚާބުގައި ވާދަ ކުރެއްވި ޑރ. މުހައްމަދު މުއިއްޒަށް ދެއްވުމަށް ވަނީ ފާސް ކުރައްވާފައެވެ. އަދި ނައިބް ރައީސް ކަމަށް އެޕާޓީގެ ކައުންސިލް ވަނީ ސެމްބެ ހަމަ ޖެއްސުމަށް ފާސް ކުރައްވާފައެވެ.

މިއާއިއެކު އަބްދުއްރަހީމް ވަނީ ޕީއެންސީގެ ޗެއާޕާސަންގެ މަޤާމަށް ހަމަޖައްސާފައެވެ. އަބްދުއްރަހީމް ހުންނެވީ މިހާތަނަށް ޕީއެންސީީގެ ރައީސް ކަމުގެ މަޤާމުގައެވެ.

ޕީއެންސީ ހިންގުމުގައި ތިއްބެވި ބޭފުޅުންނަށް މިބަދަލު ގެނައީ ރާއްޖޭގެ ރައީސް ކަމުގެ މަޤާމަށާއި ނައިބް ރައީސް ކަމުގެ މަޤާމަށް އެޕާޓީއަށް ނިސްބަތްވާ ދެބޭފުޅުން އިންތިޚާބުވެ އެބޭފުޅުންނަށް އި އިޚުތުރާމާއި ގަދަރު ދެއްވުމުގެ ގޮތުންނެވެ. މިބަދަލު ގެނައީ އެޕާޓީގެ އަސާސީގެ ގަވާއިދަށްވެސް ބަދަލު ގެނެސްގެންނެވެ.

މިރޭގެ ކައުންސިލް ބައްދަލުވުމުގައި އިންތިޚާބީ ނައިބް ރައީސް ހުސެއިން މުހައްމަދު ލަތީފް ބައިވެރިވެ ވަޑައިގެންނެވިއެވެ. އަދި މިހާރު އިންތިޚާބީ ނައިބް ރައީސްވެސް ވަނީ ކައުންސިލަށް ވަޑައިގެން ކައުންސިލް މެމްބަރުންނާއި ބައްދަލު ކުރައްވާފައެވެ. ރާއްޖޭގައި ޢާންމުކޮށް ވެރިކަން ކުރާ ރައީސަކީ ތަމްސީލް ކުރާ ޕާޓީގެ އެންމެ އިސް ފަރާތްކަމުގައި ކޮންމެ ޕާޓީއަކުންވެސް ކަނޑައަޅައެވެ. ޕީއެންސީގެ ރައީސަކަށް ޑރ. މުއިއްޒު ހަމަޖެއްސެވިއިރު، ޕީޕީއެމްގެ ރައީސަކީ ރައީސް ޔާމީނެވެ.

އިންތިޚާބީ ރައީސް ޑރ. މުއިއްޒާއި، ނައިބް ރައީސް ސެމްބެ ހުވާ ކުރައްވާނީ އަންނަ މަހުގެ 17 ވަނަ ދުވަހުއެވެ.