ވެރިކަން ބަދަލުވެގެން ދިއުމާއެކު، އެމްޑީޕީ ވަރުގަދަ އިދިކޮޅު ޕާޓީއެއްގެ ގޮތުގައި އޮންނާނެ ކަމުގައި ރައީސް ސާލިހު ވިދާޅުވެއްޖެއެވެ.
ފާއިތުވެދިޔަ ރިޔާސީ އިންތިޚާބުން ބަލިވެވަޑައިގަތުމަށްފަހު ރައީސް ސާލިހު ބޭއްވި ފުރަތަމަ ނޫސްވެރިންގެ ބައްދަލުވުމުގައި ވާހަކަ ދައްކަވަމުން ރައީސް ސާލިހު އެމަނިކުފާނުގެ ސިޔާސީ މުސްތަގުބަލާއި ގުޅޭގޮތުން ވާހަކަ ދައްކަވަމުން ވިދާޅުވީ ސަރުކާރު ޖަވާބުދާރީ ކުރުވުމަށްޓަކާ އެމްޑީޕީ ވަރުގަދަ އިދިކޮޅު ޕާޓީއެއްގެ ގޮތުގައި އޮތުން މުހިންމު ކަމުގައެވެ.
އެގޮތުން އެމަނިކުފާނު ވިދާޅުވީ މުހިންމީ އެމަނިކުފާނު ހުންނަ މަގާމެއް ނޫން ކަމަށާއި، ރާއްޖޭގެ ޑިމޮކްރަސީ ހަރުދަނާ ކުރުމަށްޓަކާ އެމްޑީޕީ ވަރުގަދަ ޕާޓީއެއްގެ ގޮތުގައި ބާއްވާނެކަމަށާއި، އެކަމަށްޓަކާ ކުރާންޖެހޭ މަސައްކަތް މިހާރުވެސް ފައްޓަވާފައި ވާކަމަށެވެ. އަދި ރައީސް ވިދާޅުވީ އެގޮތުން ކުރައްވަމުން ގެންދަވާ އެންމެ މުހިންމު މަސައްކަތަކީ ކުރިޔަށް އޮތް ރައްޔިތުންގެ މަޖިލިހަށް ތައްރާރުވުން ކަމުގައެވެ.
މިއަދުގެ ނޫސްވެރިންގެ ބައްދަލުވުމުގައި ވާހަކަ ދައްކަވަމުން ރައީސް ސާލިހު ވިދާޅުވީ އެމަނިކުފާނުގެ ވެރިކަމުގެ ކާމިޔާބީ ވަޒަން ކުރާނީ ރައްޔިތުންކަމުގައެވެ.
ރައީސް ސާލިހު ވިދާޅުވީ އިންތިޚާބު ގެއްލުމުގެ ސަބަބުތައް ދެނެގަނެވޭނީ ރަގަޅު ދިރާސާއެއް ކޮށްގެން ކަމަށާއި، އެހެންނަމަވެސް ފުރަތަމަ ބުރު ނިމުމަށްފަހު ޕާޓީގެ އެތެރޭގެ ބައެއް ފަރާތްތަކުގެ ކޮންފިޑެންސް ގެއްލިގެން ދިޔަ ކަމުގައެވެ. އަދި ސަރުކާރާ ގުޅޭގޮތުން ދައްކަމުންދިޔަ ދޮގު ވާހަކަތަކަކީވެސް ސަރުކާރަށް ކުރިމަތިވި ގޮންޖެހުމެއްކަމުގައިވެސް ރައީސް ސާލިހު ވިދާޅުވިއެވެ.
ކޮމެންޓު ފޮނުވާ