އިއްޔެ އޮތް ރިޔާސީ އިންތިޚާބުގެ ދެވަނަބުރު ކާމިޔާބު ކުރައްވާ، ރާއްޖޭގެ ރައީސްކަމަށް އިންތިޚާބުވެވަޑައިގެންނެވި ޑރ. މުހައްމަދު މުއިއްޒުއަށް އިންޑިއާގެ ބޮޑުވަޒީރު ނަރެންދުރަ މޯޑީ މަރުހަވާ ވިދާޅުވެއްއެވެ.
މޯޑީ މިއަދު ކުރެއްވި ޓުވީޓެއްގައި ވިދާޅުވީ އިންތިޚާބީ ރައީސަށް މަރުހަބާ ވިދާޅުވާ ކަމަށާއި، އެތައް ގޮންޖެހުމެއްގެ ތެރެއިންވެސް މިއަދާއިހަމަޔަށް ދެމިއޮތް އިންޑިއާ-ރާއްޖޭގެ ގުޅުން އެގޮތުގައި ދެމެހެއްޓުމަށް އިންޑިއާ ތައްޔާރަށް އޮތް ކަމުގައެވެ.
https://x.com/narendramodi/status/1708304499717369955?s=20
މޯޑީގެ ޓުވީޓުގައި އިތުރަށް ވިދާޅުވީ ދެގައުމުގެ ދެމެދުގައި އޮތް ގާތް ގުޅުމުގެ އިތުރުން، އިންޑިއާ ކަނޑުގެ ސަރަހައްދުގައި އިތުރަށް ގުޅުން ބަދަހި ކުރުމަށް އިންޑިއާއިން ބޭނުންވާ ކަމުގައެވެ.
މޯޑީ އިންތިޚާބީ ރައީސް ޑރ. މުއިއްޒުއަށް މަރުހަބާ ވިދާޅުވިއިރު، ރިޔާސީ އިންތިޚާބުގެ ކެމްޕޭންގަވެސް އަދި އޭގެ ކުރިންވެސް މުއިއްޒު ވިދާޅުވަމުން ގެންދަވާފައިވަނީ ރާއްޖޭގައި އޮތް އިންޑިއާގެ ނުފޫޒު ނައްތަވާލައްނޭކަމަށާއި، ރާއްޖޭގައި ތިބިކަމަށް ބުނާ އިންޑިއާ ސިފައިން ރާއްޖެއިން ފޮނުވާލާނޭ ކަމުގައެވެ.
އިބުރާހިމް މުހައްމަދު ސާލިހުގެ ވެރިކަމުގައި ރާއްޖޭގައި އިންޑިއާއިން އެހީތެރިކަން ފޯރުކޮށްދީގެ ތަރައްގީގެ މުހިންމު މަޝްރޫޢުތަކެއް ހިންގަމުންނެވެ. އޭގެ ތެރޭގައި ހިމެނޭ އެންމެ މުހިންމު މަޝްރޫޢަކީ ތިމަލާލެ ބުރިޖް މަޝްރޫއެވެ.
އިއްޔެ ބޭއްވުނު، ރިޔާސީ އިންތިޚާބުގެ ދެވަނަ ބުރު ޑރ. މުއިއްޒު ކާމިޔާބު ކުރެއްވީ 127607 ވޯޓު ކާމިޔާބު ކުރައްވައިގެންނެވެ. އެއީ ވޯޓުލީ މީހުންގެ %54 އެވެ. ރައީސް ސާލިހަށް ކާމިޔާބު ކުރެއްވުނީ 108،696 ވޯޓެވެ. އެއީ ވޯޓުލީ މީހުންގެ %46 އެވެ.
