އާންމު ރައްޔިތުންނަށް ބޯހިޔާވަހިކަން ފޯރުކޮށް ދިނުމަށް މިސަރުކާރުން ކުރިޔަށް ގެންދާ "ބިންވެރިޔާ" ސްކީމުގެ ދަށުން ދިނުމަށް ނިންމާފައިވާ ހުރިހާ ގޯތިތަކެއް އަންނަ ނޮވެމްބަރުމަހުގެ 5 ވަނަ ދުވަހުގެ ކުރިން ހަވާލުކޮށް ނިންމަވާ ދެއްވާނެކަމުގައި ރައީސް ސާލިހު ވިދާޅުވެއްޖެއެވެ.
މިހާރު ކުރިޔަށްދާ ރިޔާސީ އިންތިޚާބުގެ ދެވަނުބުރުގެ ކެމްޕޭންގެ "އުފާވެރި އަމާން ރާއްޖެ" އެންމެ ފަހުގެ ޖަލްސާގައި ރޭ ވާހަކަ ދައްކަވަމުން ރައީސް ސާލިހު ވިދާޅުވީ މާލޭގެ ރައްޔިތުންނަށް ކުރިމަތިވެފައިވާ ބޯހިޔާވަހިކަމުގެ މައްސަލައަށް 40 އަހަރު ފާއިތުވެގެންދިޔަ ފަހުން ހައްލެއް ހޯދާދިނީ މި ސަރުކާރުން ކަމުގައެވެ.
ރައީސް ސާލިހު ވިދާޅުވީ މާލޭގެ ރައްޔިތުންނަށް ކުރިމަތިވެފައިވާ ބޯހިޔާވަހިކަމުގެ މައްސަލައަށް ހައްލު ހޯދައި ދިނުމަށް މި ސަރުކާރުން ވެފައިވާ ވައުދުތައް ފުއްދާ ދެމުން ކަމަށާއި، މި ދައުރު ނިމުމުގެ ކުރިން ބިން ކަނޑާ ގޯތި ހަވާލު ކޮށްދެއްވާނެ ކަމުގައެވެ.
އަޅުގަނޑުމެން މި ރޭ ވެސް މި ޔަގީން ކަން އަރުވަނީ މި ދައުރުގެ ތެރޭގައި ފަހެއް ނޮވެމްބަރަށް އަޅުގަނޑުމެން މިހާރު މި ދޫކޮށްފައި ހުރި ހުރިހާ ގޯތިތަކެއްގެ އިން ވަކިކޮށް ބިން ކަނޑައި އެ ބޭފުޅުންނަށް ރަޖިސްޓްރީ ހަވާލު ކުރާނަން.
ރޭގެ ޖަލްސާގައި ވާހަކަ ދައްކަވަމުން ރައީސް ސާލިހު ވިދާޅުވިއެވެ.
ރޭގެ ޖަލްސާގައި އިތުރަށް ވާހަކަ ދައްކަވަމުން ރައީސް ސާލިހު ވިދާޅުވީ މި ސަރުކާރުން ހަމައެކަނި ގޯތި ހަވާލުކޮށް ދެއްވާނީ ނޫން ކަމަށާއި، އެތަންތަނުގައި ގެ އިމާރާތް ކުރެވޭނޭ މަގުތައްވެސް ހައުސިން ބޭންކެއް ގާއިމް ކުރައްވައިގެން ފަހިކޮށް ދެއްވާނޭ ކަމުގައެވެ.
ހައުސިން ބޭންކުގެ ތެރެއިން ފައިސާ ރައްޔިތުންނަށް ލިބޭނެ ގޮތް ހަދާ ދޭނަން.
ރައީސް ސާލިހު ވިދާޅުވިއެވެ.
ސަރުކާރުން ކުރިޔަށް ގެންދާ "ބިންވެރިޔާ" ސްކީމްގެ ފުރަތަމަ ފިޔަވަހީގެ ދަށުން 18،955 މީހަކު ގޯއްޗަށް ޝަރުތު ހަމަވާއިރު، ހައުސިން މިނިސްޓްރީން ބުނެފައިވަނީ އެއީ 9003 ގޯތި ކަމަށެވެ.
ސަރުކާރުން މިހާރުވަނީ މާލޭގައި ދިރިއުޅޭތާ 20 އަހަރު ވެފައިވާ ފަރާތްތަކަށް ވެސް ގޯތި ދިނުމަށް ނިންމާފައެވެ.
