ކުރިއަށް އޮތް ފަސް އަހަރަށް ރާއްޖޭގެ ރައީސް ހޮއްވަވާއިރު، އެންމެންގެ އިސްވާޖިބަކަށް ވާންވާނީ، ދިވެހި ގައުމުގެ މިނިވަންކަމާއި އަމިއްލަވަންތަ ކަމުގެ ވިސްނުން ކުރިއަށް ނެރެ، ޤައުމުގެ މިނިވަންކަން ދިފާއު ކުރުންކަމުގައި އެމްއެންޕީގެ ރައީސް މުހައްމަދު ނާޒިމްް އިލްތިމާސްކުރައްވައިފިއެވެ.

ދެވަނަ ބުރުގައި އެއްވެސް ޝަރުތަކާއި ނުލައި މުއިއްޒަށް ތާއީދުކޮށް ކެމްޕޭންގައި ބުރަކަށް މަސައްކަތް ކުރައްވާފައިވާ ނާޒިމް ވިދާޅުވީ ދިވެހިންގެ ނިންމުން މާދަމާ ނިންމާއިރު އެންމެ އިސްވާޖިބަކަށް ވާންވީ ދިވެހިންގެ މިނިވަންކަން ހިމާޔަތް ކުރުންކަމަށެވެ. މިނިވަން ކަމާއި އިސްތިގުލާލު ނެތި އަޅުވެތި ކަމެއްގައި ތިބެގެން ލިބޭނެ މަންފާއެއް ހޯދޭނެ ކުރިއެރުމެއް ނޯންނާނެކަމަށެވެ.

މާދަމާގެ ވޯޓަށް ނިކުންނައިރު، ރާއްޖެ މިއޮތީ އަމިއްލަވަންތަކަން ނެތިގޮސް މިނިވަންކަން ގެއްލޭ ހިސާބުގައި ކަމަށް ނާޒިމް ވިދާޅުވިއެވެ. ދަރަނި ބޮޑުވެގެން ގޮސް، ދަރަނި ނުދެއްކޭ ހިސާބުގައި ކަމަށްވެސް ވިދާޅުވިއެވެ. އުފަންވާ ކޮންމެ ކުއްޖެއްގެ ބޮލުގައި ދެލައްކައަށްވުރެ ގިނަ ރުފިޔާގެ ދަރަންޏެއް އެޅިފައިވާ ކަމަށް ނާޒިމް ވިދާޅުވިއެވެ. އޭނާ ވިދާޅުވީ ވިސްނުންތެރިކަމާއި ހިކުމަތްތެރިކަމާއެކު މަސައްކަތް ނުކުރެވިއްޖެނަމަ، މުސްތަގްބަލު ވިއްކާލައިގެން މެނުވީ ސަލާމަތް ނުކުރެވޭނޭ ވަރަށް ރާއްޖެ ނިކަމެތިވެފައިވާ ކަމަށެވެ.

މޮޅާއި ދެރައިގެ ތަފާތުކުރުންތައް އިންތިހާއަށްގޮސް، ގައުމުގެ މާލީ ހާލަތަށްނޭދެވޭ އަސަރުކުރަން ފަށާފައި. މާދަމާގެ ދަރިންގެމުދާ ނުއަގުގައި ވިއްކަމުންގޮސް، ރަށްތަކާއި ފަޅުތަކުގެ ސްޓޮކް ހުސްވާންފަށާފައި. ހަމަހަމަކަން ގެއްލި، އިޖްތިމާއީ އަދާލަތު ގެއްލިފައި. ގާނޫނާއި ގަވާއިދު ނުހިނގާތާނގައި، އެތައް މަސައްކަތަކުން ހުކުމްކުރެވޭ މީހުން ސިޔާސީ ބޭނުންތަކަށްޓަކައި ދޫކުރުން އާދައަކަށް ހަދާފައި.

– ނާޒިމް ވިދާޅުވިއެވެ.

ނާޒިމް ވިދާޅުވީ ކުޑަކުދިންނާއި އަންހެނުންގެ އިއްފަތް ފޭރިގަތުން ފަދަ މުޑުދާރު އަމަލުތަކަކީ މައްސަލައަކަށްނުވެ، މުޖްރިމުންނަށް މިނިވަންކަމާއެކު އުޅުމުގެ ފުރުސަތު ދީފައިވާ ކަމަށެވެ. އިންސާފު ލިބޭނޭ ގޮތެއް މިއަދު ނެތިފައިވާ ކަމަށާއި، ގާނޫނުއަސާސީގެ ބާރުކަނޑުވާލާފައިވާ ކަމަށް ވިދާޅުވިއެވެ.

ނާޒިމމް ވަނީ ވިހާވެސް ހެނދުނާ ނިކުމެ ހުރިހާ ރައްޔިތުންވެސް ޤައުމުގެ ދިފާއުގައި ޑރ. މުއިއްޒަށް ވޯޓުދީ ރައްޔިތުންގެ ނިންމުން ޤައުމުގެ ހައްގުގައި ނިންމަށް އިލްތިމާސް ކުރައްވާފައެވެ.