ފަހަތުން އަރައި ލީގު ޗެމްޕިއަން މާޒިޔާ 3-2 އިން ބަލިކޮށް ކްލަބް އީގަލްސް އިން ފުރަތަމަ ފަހަރަށް ޗެރިޓީ ޝީލްޑް ކާމިޔާބުކުރުމަކީ އެއްގޮތަކަވެސް އުންމީދުކުރި ނަތިޖާއެއް ނޫންކަމަށް އީގަލްސްގެ ކޯޗު މުހަންމަދު ޝިޔާޒް (މޯހަން) ބުނެފިއެވެ.
މެޗަށްފަހު ވާހަދައްކަމުން އީގަލްސްގެ ކޯޗު މުހައްމަދު ޝިޔާޒް (މޯހަން) ބުނީ މާޒިޔާ ކަހަލަ ވަރުގަދަ ސްކޮޑެއް އޮތް ޓީމެއް އަތުން ފަހަތުން އަރައި މި ގޮތަށް މޮޅުވުމަކީ އުއްމީދުކުރި ނަތީޖާއެއް ނޫން ކަމަށާއި އެހެން ނަމަވެސް ކުޅުންތެރިން ކުރި މަސައްކަތުން މި ލިބުނު މޮޅާ އެކީ ވަރަށް ހިތްހަމަޖެހޭ ކަމަށެވެ.
ހަގީގަތުގައި އެހާ ވެސް ރަނގަޅު ގޭމެއް މި ޓީމުގައި މި ތިބި ޒުވާން ކުޅުންތެރިން ކުޅެފި. ބިދޭސީ ކުޅުންތެރިއަކު ވެސް ނެތި މި ކުރި ހިތްވަރަށް ތައުރީފުކުރަން ބޭނުން.
– މޯހަން ބުނެފައިވެއެވެ.
އީގަލްސް އަކީ ކަޕް ވިނާސް ކަޕްގެ ބަދަލުގައި ކުޅެން ފެށި ޗެރިޓީ ޝީލްޑް މެޗު ކާމިޔާބުކުރި ހަ ވަނަ ޓީމެވެ.
އެފްއޭއެމް ފައުންޑޭޝަންގެ ހަރަކާތެއްގެ ގޮތުގައި ގެންދެވުނު ޗެރިޓީ ޝީލްޑް މެޗަށް ތިން ޕާޓްނަރުން ވަނީ ހަމަޖައްސައިފަ އެވެ. އެއީ އެޑްވޮކޭޓިން ފޯ ދަ ރައިޓްސް އޮފް ޗިލްޑްރެން (އާކް) އާއި މޯލްޑިވިއަން ބްލަޑް ޑޯނާސް އަދި ސްޕެޝިއަލް އޮލިމްޕިކްސް މޯލްޑިވްސް އެވެ. އޭގެ އިން ކޮންމެ ޖަމިއްޔާ އަކަށް ވަނީ 33،333.33 ރުފިޔާ ދީފަ އެވެ.
ކޮމެންޓު ފޮނުވާ