ފަރެސްމާތޮޑާ ދާއިރާގެ އެމްޑީޕީ ނައިބް ރައީސް ހުސެއިން ރަޝީދާއި، އެރަށު އެމްޑީޕީގެ ގިނަ ޒުވާނުންތަކެއް މިއަދު އެމްޑީޕީން ވަކިވެ ޕީޕީއެމްއާއި ގުޅިއްޖެއެވެ.
ރިޔާސީ އިންތިޚާބުގެ ދެވަނަ ބުރު މިމަހުގެ 30 ވަނަ ދުވަހު އޮންނަ އިރު، ގިނަ ރަށްތަކެއްގެ އެމްޑީޕީއަށް ނިސްބަތްވާ މެމްބަރުންތައް ދަނީ ޕީޕީއެމްއާއި ގުޅެމުންނެވެ. ފަރެސްމާތޮޑާ އަކީ ޕީޕީއެމް/ޕީއެންސީއަށް ޚާއްސަ ރަށެކެވެ. އެއީ މިފަހަރު އިންތިޚާބުގައި ޕީޕީއެމް/ޕީއެންސީގެ ރިޔާސީ ކެންޑިޑޭޓް ޑރ. މުއިއްޒުގެ ރަނިންމޭޓަކީ ފަރެސްމާތޮޑާ އަށް އުފަން، އެދާއިރާގެ މެމްބަރު ހުސެއިން މުހައްމަދު ލަތީފެވެ.
ސެމްބެ އަކީ އޭނާގެ ދާއިރާގެ މީހުންނާއި ވަރަށް ގާތް ގުޅުމެއް ބާއްވާ، ރައްޔިތުންގެ ތާއީދު އޮންނަ ބޭފުޅެކެވެ. ސެމްބެއަކީ ޒުވާނުންނާއި ގުޅޭ ޒުވާނުންގެ ކަންކަމަށް އިސްކަންދެއްވާ ބޭފުޅެކެވެ. މިފަހަރުގެ އިންތިޚާބުގައި ސެމްބެގެ އެންމެ ބޮޑު އަމާޒަކީވެސް ޒުވާނުންގެ ހުރި ކަންބޮޑުވުންތަކަށް ހައްލު ގެނެސް މުޅި ރާއްޖެއަށް އުފާވެރި އުންމީދީ ދުވަސްތަކެއް ހޯދައި ދެއްވުމެވެ.
ފަރެސްމާތޮޑާއަށް ސެމްބެ ވަނީ މިކެމްޕޭންގައި ދެފަހަރެއްގެ މަތީން ވަޑައިގެންފައެވެ. އެދެފަހަރުވެސް ސެމްބެއަށް ފަރެސްމާތޮޑާއި ވަނީ ވަރަށް ހޫނު މަރުޚަބާއެއް ދަންނަވާފައެވެ.
