ރާއްޖޭގައި މިހާރު އޮތް ވެރިކަން ިދވެހި ރައްޔިތުން ބަދަލު ކުރާނެކަމަށާއި، އެކަމާއިމެދު އެއްވެސް ޝައްކެތް ނެތްކަމަށް ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ (އިންތި) ވިދާޅުވެއްޖެއެވެ.

އިންތިހާބުތަކަށް ނުފޫޒު ފޯރުވާތީ އެކަން ހުއްޓުވުމަށް ގޮވާލައި މަޖިލީހަށް މިއަދު ހުށަހެޅި ޤަރާރުގެ ބަހުސްގައި ވާހަކަ ދައްކަވަމުން އިންތި ވިދާޅުވީ ދިވެހި ރައްޔިތުން ތިބީ މިސަރުކާރު ބަދަލު ކުރަން ކެތް މަދުވެފައި ކަމަށެވެ. އިންތިޚާބުގެ ފުރަތަމަ ބުރުން ދިވެހި ރައްޔިތުން މިސަރުކާރަށް ދިނީ ވަރުގަދަ މެސެޖެއް ކަމަށާއި، މިވެރިކަން ދިވެހި ރައްޔިތުން ބަދަލު ކުރާނެ ކަމީ ޝައްކެއް އޮތްކަމެއް ނޫންކަމަށް އިންތި ވިދާޅުވިއެވެ.

ރާއްޖޭގެ ރައްޔިތުން ޝައްކެއް ނެތް އިބްރާހިމް މުހައްމަދު ސޯލިހުގެ ވެރިކަން ބަދަލުކުރާނެ.

– އިންތި ވިދާޅުވިއެވެ.

އިންތި ވިދާޅުވީ ސަރުކާރުން އިންތިޚާބަށް ނުފޫޒު ފޯރުވާ މިންވަރާއި، ބިރު ދެއްކުމާއި އެނޫން ކަންކަން އޮތް މިންވަރު ރާއްޖެއައި ބޭރުގެ އޮބްޒާވަރުން ފާހަގަ ކުރިކަމަށެވެ. އެގޮތުން ދައުލަތުގެ މީޑިއާ ޕީއެސްއެމްއިން ޕްރައިމް ޓައިމްގައި ރައީސް ސޯލިހު ޕްރޮމޯޓް ކުރުމަށް ޓަކައި މަސައްކަތްކުރި ކަން ބޭރުގެ އޮބްޒާވަރުން ވެސް ފާހަގަ ކޮށްފައިވާ ކަމަށް އޭނާ ވިދާޅުވިއެވެ.

ރައީސް ސޯލިހު ރިޔާސީ ބަހުސްއަށް ނޭރުއްވުމުން ޕީއެސްއެމްއިން އެ ބަހުސް ކެންސަލް ވެސް ކުރެއްވިކަން ފާހަގަ ކުރެއްވިއެވެ. އެހެންކަމުން އެ ބަހުސްގައި ބައިވެޜިވާން ބޭނުންވި އެހެން ހުރިހާ ކެނޑިޑޭޓުންނަށް އެވުނީ ވަރަށް ބޮޑު ބޭއިންސާފެއް ކަމަށެވެ.

އެހެންކަމުން ރައީސް ސޯލިހުގެ ވެރިކަން ބަދަލުކުރަން ޖެހޭ ކަމަށާއި ވެރިކަން ބަދަލުކުރުމުގެ އަލާމާތްތައްވެސް އޮތީ މިހާރު ފެންނަން ކަމަށާއި ފުރަތަމަ ބުރުންވެސް ބޮޑު ތަނުން އިންތިހާބު ނާކާމިޔާބުވި ކަމަށް އޭނާ ވިދާޅުވި އެވެ. އަދި ހުރިހާ ބާރަކާއެކު 38 ޕަސެންޓަށް ނަތީޖާ ލިބުމުން މިހާރު ރައީސް ސޯލިހު ވަންނަންވީ ގެއަަށް ކަމަށެވެ.