ފަލަސްތީނުގެ ޣައްޒާގައި ހުންނަ އިންޓަނޭޝަނަލް އެއިޑް ކެމްޕެއިން (އައިއޭސީ) ގެ ގުދަނަކަށް އިސްރާއީލުން ބޮން އަޅާ އެގުދަން އެކީ ހަލާކުވެގެން ދިޔަނަމަވެސް ޣައްޒާގެ ހާލުގައި ޖެހިފައިވާ ރައްޔިތުންނަށް އެހީވުމަށް އެޖަމިއްޔާއިން ކުރަމުން އަންނަ މަސައްކަތަކަށް ހުއްޓުމެއް ނާންނާނެ ކަމަށް އައިއޭސީން ބުނެފިއެވެ.
ޣައްޒާއަށް އެހީވުމަށް ރާއްޖޭގެ ޗެނަލްތައް ގުޅިގެން ކުރިޔަށް ގެންދާ ޓެލެތޯންގައި ވާހަކަ ދައްކަވަމުން އައިއޭސީގެ މީޑިއާ އެންޑް ޕީއާރު ހަޒާދު އަހުމަދު ވިދާޅުވީ ޣައްޒާގައި ހުންނަ އެ ޖަމިއްޔާގެ ގުދަނަށް ޔަހޫދީން ދިން ހަމަލާތަކުގައި އެގުދަނަށާއި ގުދަނުގައި ރައްކާ ކޮށްފައި ހުރި ތަކެއްޗަށް ގެލުންވެފައިވާ ކަމުގައެވެ. އޭނާ ވިދާޅުވީ އެ ގުދަނަށާއި ގުދަނުގައި ހުރި ތަކެއްޗަށް ބޮޑެތި ގެއްލުންތައް ލިބިފައިވި ނަމަވެސް އެ ޖަމިއްޔާގެ މަސައްކަތްތަކަށް ހުރަސް ނޭޅޭނެ ކަމުގައެވެ.
އިތުރަށް އޭނާ ވިދާޅުވީ ބޮން އެޅި ގުދަނަށް ގެންގޮސްފައި ހުރީ އެހީދިނުމަށް ބޭނުންވާ މަދު އެތިކޮޅެއް ކަމަށާއި، ޣައްޒާގެ ރައްޔިތުންނަށް ފޯރުކޮށްދިނުމަށް ގެންގޮސްފައިހުރި ގިނަ އެއްޗެތި ސަލާމަތުން އެބަހުރި ކަމުގައެވެ. އަދި މިހަމަލާ އަމާޒުވިނަމަވެސް، ޣައްޒާގެ ރައްޔިތުންނަށް އެހީތެރިކަން ފޯރުކޮށް ދިނުމަށް ކުރަމުންދާ ހިތްވަރަށް އެއްވެސް ބަދަލެއް ނާންނާނެކަމަށްވެސް އޭނާ ވިދާޅުވެފައި ވެއެވެ.
ހަޒާދު ވިދާޅުވީ އައިއޭސީން ފޯރުކޮށްދޭ ތަކެއްޗަކީ އެހީދޭ ފަރާތްތަކުގެ ފައިސާއިން ގަނެއްފައި ހުންނަ ތަކެއްޗަށް ވުމުން އެތަކެތި އަބަދުވެސް ބަހައްޓާފައި ހުންނަނީ ވަރަށްބޮޑަށް ރައްކާތެރި ގޮތުގައި ކަމުގައެވެ.
އޭނާ އިތުރަށް ވިދާޅުވީ ޔަހޫދީންގެ ހަމަލާއެއް އައިއޭސީގެ އުޅަނދެއް ދުއްވަމުންދިޔަ ސަރަހައްދަކަށް އަމާޒުވެ އެ އުޅަދަށް ގެއްލުންވި ކަމަށާއި އެ ހަމަލާގައި އެ ޖަމިއްޔާގެ ބައެއް މެމްބަރުންނަށް ކުދި ޒަޚަމްތައް ލިބުނު ކަމަށެވެ.
އުނދަގޫ ކަމެއް، އެހެންނަމަވެސް އުނދަގުލާ އެކީ އަޅުގަނޑުމެން ޢައްޒާ ތެރޭ މިކަން ކުރަން މި ޖެހެނީ، އިންޝާﷲ އަޅުގަނޑުމެންގެ މި މސައްކަތައް އިރާދަ ކުރެއްވިއްޔާ ކުޑަ ނަމަވެސް ހުއްޓުމެއް ނާންނާނެ. ދުއާއަކީ މިކަހަލަ ކަންތައްތައް ދިމާނުވެ އަޅުގަނޑުމެންގެ ސްޓާފުން ރައްކާތެރިކަމާއިއެކީ، އާއްޒާގެ ރައްޔިތުންވެސް ރައްކާތެރިކަމާއި އެކީ ތިބުން.
ޔަހޫދީން ޣައްޒާއަށް މެދުނުކެޑި ހަމަލާ ދެމުންދާއިރުވެސް، އެހީދޭ ޖަމިއްޔާތަކުން މެދުކެނޑުމެއްނެތި ޣައްޒާގެ ރައްޔިތުންނަށް އެހީތެރިކަން ފޯރުކޮށްދެމުންދާކަން ފާހަގަކޮށް ހަޒާދު ވިދާޅުވިއެވެ.
ދިވެހިން ފަލަސްތީނުގެ ޣައްޒާގެ ރައްޔިތުންނަށް އެހީ ފޯރުކޮށްދެނީ، މައިގަނޑު ގޮތެއްގައި އައިއޭސީ ޖަމާއަތަށެވެ. ފަލަސްތީނަށް އެހީވުމަށް އައިއޭސީން މިހާރު ވެސް ފަންޑެއް ހުޅުވާފައިވާ އިރު، މިހާތަނަށް އައިއިރު ފަންޑަށް ހަތް މިލިއަނަށް ވުރެ ގިނަ ރުފިޔާ ލިބިފައިވެއެވެ.
އައިއޭސީން ބުނީ އެ ޖަމިއްޔާގެ ގުދަނަކަށް ސީދާ އަމާޒުކޮށް، އިސްރާއީލްގެ ޔަހޫދީން ހަމަލާދީފައިވާ ކަމަށެވެ. އަދި މި ހަމަލާގައި ގުދަން އެއްކޮށް ހަލާކުވެފައިވާ ކަމަށްވެސް އައިއޭސީން ބުނެފައިވެއެވެ.
އެތަނުގައި ހުރި ތަކެތީގެ ތެރޭގައި 2،000 ރަޖާ އާއި ވަގުތުން ކެވޭ ގޮތަށް ތައްޔާރު ކުރެވިފައިވާ 1،000 ޕެކްގެ އިތުރުން، އަންނައުނު 3،000 ޕެކް ހިމެނޭ ކަމަށް އައިއޭސީން ބުނެފައިވެއެވެ. އަދި އެ ޖަމިއްޔާގެ މުވައްޒަފުން ދަތުރު ކުރަމުންދިޔަ ވެހިކަލަކަށް ހަމަލާދީފައިވާ ކަމަށް ވެސް އައިއޭސީން ބުނެފައިވެއެވެ.
