މާލެ ސަރަހައްދު އަދި އަތޮޅުތެރޭގައި އެމްޓީސީސީން ފޯރުކޮށްދެމުންދާ އާންމު ބަހުގެ ޚިދުމަތާއި މާލެ ސަރަހައްދުގައި ފޯރުކޮށްދެމުންދާ ވިލިމާލެ އަދި ހުޅުމާލެ ފެރީ ޚިދުމަތުގައި ގުރޭޑް 12 އިން މައްޗައް ތަޢުލީމު ހާސިލްކުރަށްވަމުންގެންދަވާ ކޮލެޖް އަދި ޔުނިވާރސިޓީ ދަރިވަރުންނަށް ހިލޭ ދަތުރުކުރެވޭނެ އިންތިޒާމް ހަމަޖައްސައިފިއެވެ.
އެމްޓީސީސީއިން ބުނީ ދަރިވަރުން ތަޢުލީމް ހާސިލްކުރައްވަމުންގެންދަވާ ކޮލެޖެ ނުވަތަ ޔުނިވާރސިޓީއިން ދަރިވަރުންނަށް ދޫކޮށްފައިވާ ސްޓޫޑެންޓް ކާޑު ބޭނުންކުރަށްވައިގެން 1 ސެޕްޓެމްބަރ 2023 އިން ފެށިގެން އެ ކުންފުނީގެ އާންމު ދަތުރުފަތުރުގެ ޚިދުމަތްތަކުގައި ހިލޭ ދަރިވަރުންނަށް ދަތުރުކުރެވޭނެކަމަށެވެ.
އެމްޓީސީސީގެ ފަރާތުން ފޯރުކޮށްދެމުންދާ ހުރިހާ އާންމު ދަތުރުފަތުރުގެ ޚިދުމަތެއްގައިވެސް މިހާރުވެސް 65 އަހަރުން މަތީގެ މީހުންނަށާއި، 3 އަހަރުން ދަށުގެ ކުޑަކުދިންނަށް އައި.ޑީ. ކާޑު ބޭނުންކުރަށްވައިގެން ހިލޭ ދަތުރުކުރެވޭ އިންތިޒާމް ވަނީ ހަމަ ޖައްސާފައެވެ. ހަމައެހެންމެ ޚާއްސައެހީއަށް ބޭނުންވާ ފަރާތްތަކަށްވެސް ނޭޝަނަލް ސޯޝަލް ޕްރޮޓެކްޝަން (އެންސްޕާ) އިން ދޫކޮށްފައިވާ ކާޑު މެދުވެރިކޮށް ހިލޭ ދަތުރުކުރެވޭއިރު ޔުނިފޯރމް އަދި އެކްޓިވިޓީ ޔުނިފޯރމްގައި ތިބޭ ސްކޫލް ދަރިވަރުންނަށްވެސް ހިލޭ ދަތުރުކުރެވޭނެ އިންތިޒާމް އެމްޓީސީސިއިން މީގެ ކުރިން ވަނީ ހަމަ ޖައްސާފައެވެ.
އެމްޓީސީސީއިން ބުނީ މި ގޮތައް ދަތުރުތައް ބަދަލުކުރުމުގެ މައިގަނޑު މަޤްޞަދަކީ އެކަށީގެންވާ އަގެއްގައި ލުއިފަސޭހަކަމާއެކު ބޭނުންކުރެވޭ، ކަނޑާއި އެއްގަމުގެ ދަތުރުފަތުރުގެ ޚިދުމަތެއް ރައްޔިތުންނަށް ފޯރުކޮށްދިނުންކަމަށެއެވެ.
އެމްޓީސީސީއިން ވަނީ މާލެ ސަރަހައްދުގައި ދެމުން ގެންދާ ބަހުގެ ހިދުމަތުގެ ތެރެއިން މާލެ އާއި ހުޅުމާލެ ގުޅުވާލަދޭ ބަސް ދަތުރުތައް 24 ގަޑިއިރަށް ބަދަލުކޮށްފައެވެ.
އެމްޓީސީސީއަކީ ރާއްޖޭގައި އާންމު ދަތުރުފަތުރު ކުރުމަށް ހާއްސަ ހަމައެކަނި ކުންފުންޏެވެ. އެ ކުންފުނިން މާލެ ސަރަހައްދުގެ އިތުރުން ލާމު އަތޮޅާއި އައްޑޫ ސިޓީގެ އިތުރުން ފުވައްމުލަކު ސިޓީގައި ބަހުގެ ހިދުމަތް ފޯރުކޮށްދެމުންދެ އެވެ. އޭގެއިތުރުން ވިލިމާލެއާއި ހުޅުމާލޭގައި މީހުން ވަޒަންވެރިވެ ދިރިއުޅެން ފެށީއްސުރެ އެތަންތަނަށް ފެރީގެ ހިދުމަތް ދެމުން އަންނަނީ އެމްޓީސީސީންނެވެ.
