އާ ސީޒަންގެ މީޑިޔާ ޕާޓްނަރަކީ ޕީއެސްއެމް

މިއަހަރުގެ ފުޓްބޯޅަ ސީޒަންގެ މީޑިއާ ޕާޓްނަރަކަށް ޕީއެސްއެމް ހަމަޖައްސައިފިއެވެ.

މީޑިއާ ޕާޓްނަރަކަށް ޕީއެސްއެމް ހަމަޖައްސައި، މިކަމަށްޓަކައި ޓީވީއެމްގައި ބޭއްވި ހާއްސަ ރަސްމިއްޔާތުގައި، މެޗްތަށް ލައިވް ކުރުމުގެ އެއްބަސްވުމުގައި ވަނީ ސޮއިކޮށްފައެވެ. މިއެއްބަސްވުމުގައި ޕީއެސްއެމްގެ ފަރާތުން ސޮއިކުރީ ކުންފުނީގެ މެނޭޖިންގ ޑިރެކްޓަރ އަލީ ޙާލިދުއެވެ. ދި އެފްއޭއެމްގެ ފަރާތުން ސޮއިކުރީ އެފްއޭއެމްގެ ރައީސް ބައްސާމް އަދީލް ޖަލީލެވެ.

ޕީއެސްއެމް މެދުވެރިކޮށް މެޗްތައް ލައިވް ކުރުމަށް މިވެވުނު އެއްބަސްވުމުގެ ދަށުން މާލޭގެ އިތުރުން ރާއްޖޭގެ ހުރިހާ ކަންކޮޅުތަކަށްވެސް މެޗްތަށް ފެންނާނެކަމުގެ ޔަގީންކަން ލިބިގެން ގޮސްފިކަމަށް ބައްސާމް ވިދާޅުވިއެވެ.

މެޗްތައް ލައިވް ކުރާ ގަޑީގައި ނުފެންނަ ފަރާތްތަކަށް ފަހުން މެޗްތަކުގެ އުސްއަލިތަށްވެސް ބެލޭނެ އިންތިޒާމް މިއެއްބަސްވުމުގެ ދަށުން ޕީއެސްއެމްއިން ހަމަޖެހިގެންދާނެ. މިއީ ބެލުންތެރިންނަށް ލިބިގެންދިޔަ ވަރަށް ބޮޑު އުފަލެއްކަން ފާހަގަކޮށްލެވޭ.

– އެފްއޭއެމްގެ ރައީސް ބައްސާމް ވިދާޅުވިއެވެ.

މެޗްތައް ލައިވް ކުރުމަށް އެފްއޭއެމުން ޕީއެސްއެމްއާއި އެކު ކުރިއަށް ދިއުމަށް ނިންމާފައިވާތީ އެކަމަށްޓަކައި ޕީއެސްއެމްގެ މެނޭޖިންގ ޑިރެކްޓަރ އަލީ ހާލިދުވަނީ އެފްއޭއެމްގެ ރައީސް ބައްސާމް އަދީލް ޖަލީލަށް ޝުކުރު އަދާކުރައްވާފައެވެ.

ޕީއެސްއެމްއިން މެޗްތަށް ލައިވް ކުރި ނަމަވެސް އެހެން ޗެނަލްތަކަށްވެސް މެޗްގެ ފީޑް ވަކި އުސޫލެއްގެ ދަށުން ލިބޭނެ އިންތިޒާމް ހަމަޖެހިގެންދާނެ. ދިވެހި ފުޓްބޯޅަ ކުރިއެރުވުމަށް ޕީއެސްއެމްއިން އަބަދުވެސް މަސައްކަތް ކުރާނަން.

ޕީއެސްއެމްގެ މެނޭޖިންގް ޑިރެކްޓަރ ޢަލީ ޚާލިދު ވިދާޅުވިއެވެ.

މިއެއްބަސްވުމުގެ ދަށުން މިއަންނަ އަންގާރަ ދުވަހު، ސީޒަން ފެށުމުގެ ގޮތުން ކުޅޭ ޝެރިޓީ ޝީލްޑް މެޗް ލައިވް ކުރުމުގެ އިތުރުން، ދިވެހި ޕްރިމިއަރ ލީގްގެ 42 މެޗާއި އެފްއޭކަޕްގެ 7 މެޗާއި ޕްރެޒިޓެންޑް ކަޕްގެ 14 މެޗާއި، ދެވަނަ ޑިވިޝަންގެ 3 މެޗާއި، ގައުމީ ޓީމްގެ 10 މެޗް އިތުރުން ޔޫތު ފުޓްބޯޅަ މުބާރާތް، އަންހެން ފުޓްބޯޅަ މުބާރާތް އަދި އިންޓަރ ސްކޫލްގެ 59 މެޗް ޕީއެސްއެމްއިން ލައިވް ކުރުމަށް ހަމަޖެހިފައިވެއެވެ.

އަންގާރަ ދުވަހު ފަށާ ރާއްޖޭގެ ފުޓްބޯޅަ ސީޒަނުގެ ހުރިހާ މެޗެއް ޕަބްލިކް ސަރވިސް މީޑިއާ (ޕީއެސްއެމް) ގެ “ޔެސް ޓީވީ” އިން ވަގުތުން ދައްކާނެކަމުގެ ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ހާމަކުރެއެވެ.

މިދިޔަ ސީޒަނުގެ ލީގު މެޗުތައް ދުރަށްދެއްކީ ވީޓީވީ އިންނެވެ. އެކަމަކު އެ އެއްބަސްވުމުގެ ދަށުން ވަގުތުން ދުރަށްދެއްކީ ހަމައެކަނި ހަވީރު ކުޅުނު މެޗުތަކެވެ.