މިހާރު އޮތް ވެރިކަން ބަދަލު ކުރަން މާބޮޑަށްވެސް ލަސްވެއްޖެ ކަމަށާއި، އިންތިޚާބުގެ ދެވަނަ ބުރަށް ދާންވެސް މިސަރުކާރަށް ޖާގަ ދީގެން ނުވާނެކަމަށް ޖުމްހުރީ ޕާޓީގެ ރިޔާސީ ކެންޑިޑެޓް ޤާސިމް އިބްރާހިމް ވިދާޅުވެއްޖެއެވެ.
ރިޔާސީ ކެމްޕޭންގައި ބ.އަތޮޅަށް ކުރައްވާ ދަތުރުފުޅުގައި ބ.ތުޅާދޫ އަށް ވަޑައިގެން އެރަށުގެ ރައްޔިތުންނާއި މުޚާތަބް ކުރައްވާ ވާހަކަފުޅު ދައްކަވަމުން ޤާސިމް ވިދާޅުވީ ރިޔާސީ އިންތިޚާބުގައި ދިވެހިންގެ އެންމެ ބޮޑަށް ސަމާލުކަންދޭންވީ ކަމަކީ ދިވެހިންގެ މިނިކަން ދިފާއު ކުރުމަށް ކަމަށެވެ. އިންޑިއާގެ ނުފޫޒުން ދިވެހިން މިނިވަންވެ އެމީހުންގެ އަޅުވެތިކަމުން މިޤައުމު ސަލާމަތް ކުރުމަކީ މިއަދު ކުރަންޖެހޭ އެންމެ ބޮޑު މަސައްކަތް ކަމަށް ޤާސިމް ވިދާޅުވިއެވެ.
އިންޑިއާގެ ނުފޫޒު ރާއްޖޭގެ މައްޗަށް އޮތް މިންވަރާއި، އިންޑިއާގެ ސިފައިން ރާއްޖޭގެ އެކި ކަންކޮޅު ތަކުގައި ތިބި ތިބުމަށް ކަންބޮޑުވުން ފާޅުކޮށް ޤާސިމް ވިދާޅުވީ އެވާހަކަ ތަކުރާރުކޮށް ދައްކަން ޖެހެނީ ހަގީގަތުގައިވެސް ކަމުގެ ސީރިއަސްކަން އޮތް މިންވަރު އެނގިވަޑައި ގަންނަވާތީކަމަށެވެ. މިވެރިކަން ދެމި އޮވެއްޖެނަމަ ރާއްޖޭގެ މިނިވަންކަން ގެއްލުމުގެ ބިރު އިންތިހާއަށް އޮތްކަމަށް ޤާސިމް ވިދާޅުވިއެވެ.
މިއީ އަޅުގަނޑުމެން ވަރަށް ވިސްނަންޖެހޭ ވަގުތެއް. މިހާރު މިހުރި މީހާއަށް ދެވަނަ ދައުރެއް ދޭންޖެހޭ އެއްވެސް ސަބަބެއް ނެތް. ދެވަނަ ބުރަށް ދާންވެސް ފުރުސަތު ދީގެން ނުވާނެ. ތިބޭފުޅުން މިމީހުންނަށް ފުރުސަތު ދީފައި ދެން ފަހުން ހިތާމަ ކުރައްވަން ނަހައްދަވާތި.
– ޤާސިމް ވިދާޅުވިއެވެ.
ޤާސިމް ވިދާޅުވީ މިއިންތިޚާބުގެ ކެމްޕޭންގައިވެސް އަދި އޭގެ ކުރިންވެސް އިންޑިއާ ސިފައިން ރާއްޖޭގައި ތިބި ތިބުމާއި ގުޅޭގޮތުން ވާހަކަ ދައްކަނީ ޤައުމުގެ ހައްގުގައި ކަމަށެވެ. މިވާހަތައް ރައީސް ނަޝީދަށް ދައްކަން ނުކެރެނީ ނަޝީދަކީވެސް އިންޑިއާގެ މީހަކަށް ވާތީކަމަށް ޤާސިމް ވިދާޅުވިއެވެ. ނަމަވެސް ނަޝީދަށް ރައީސް ޔާމީންގެ ވެރިކަމުގައި ޗައިނާގެ ލޯނުތައް ބޮޑުވެގެން އެވާހަކަ ހުއްޓާ ނުލާ ދެކެވުނު ކަމަށާއި ނަމަވެސް މިވެރިކަމުގައި އިންޑިއާއިން މަތިމައްޗަށް ލޯނު ނަގައި ދަރަނިވެރިވެ އަޅުވެތިކަމަށް ދާއިރުވެސް އަނގަވެސް ހުޅުނުލާކަމަށެވެ.
ޤާސިމް ވިދާޅުވީ އެއްފުޅަން މަތިން ފުއްމާލި ބަކަރި އަނެއް ފުޅައްމަތިންވެސް ފުއްމާލާނެކަމަށެވެ. އެހެންކަމުން ދެވަނަ ފުރުސަތެއް ދީނަމަ އެއީ ދިވެހި ރައްޔިތުން ހަދާނެ އެންމެ ބޮޑު ގޯސްކަމަށް ޤާސިމް ވިދާޅުވިއެވެ.
