މި ސީޒަންގެ އަމާޒަކީ ރަނގަޅު ނަތީޖާތަކެއް ނެރެދީ މެނޭޖްމަންޓުން ކަނޑައަޅާފައިވާ ޓާގެޓަށް ވާސިލްވުން ކަމަށް ޔުނައިޓެޑް ވިކްޓަރީގެ ކެޕްޓަން މުހަންމަދު އާރިފް (ބަކާ) ބުނެފިއެވެ.
ލީގު ފެށުމުގެ ކުރިން އެފްއޭއެމުން ބާއްވާ ސިލްސިލާ ނޫސްވެރިންގެ ބައްދަލުވުމުގައި ބަކާ ބުނީ ވަރުގަދަ ސްކޮޑަކާ އެކީ ކުރިމަތިލާ ޔުނައިޓެޑް ވިކްޓްރީ (ޔޫވީ) އަށް ގަދަ ދިވެހި ޕްރިމިއާ ލީގުގެ ގަދަ ތިނެއްގެ ތެރޭގައި ނިންމާލެވޭނެ ކަމަށެވެ. މިފަހަރުގެ ސީޒަނުގައި ޔުނައިޓެޑް ވިކްޓްރީގެ ކެޕްޓަންކަން ކުރާނީ މިދިޔަ ސީޒަނުގައި ކްލަބް ގްރީން ސްޓްރީޓްސް އަށް ކުޅުނު ބަކާއެވެ. ބަކާ އަކީ ފުރަތަމަ ޑިވިޝަނުގެ ތަޖުރިބާ ބޮޑު ކުޅުންތެރިއެކެވެ.
ކޯޗާއި މެނޭޖްމަންޓުން އެ ބުނިހެން ޓާގެޓަކީ ގަދަ ތިނެއް. އަދި އަނެއްކާ ޔޫވީ ކުރިން ނުފެންނަ ވަރުގަދަ ކުޅުން ރީތި ކުޅުމަކާ އެކީ ގަދަ ތިނަކަށް ދާނެއް.
– ބަކާ ބުނެފައިވެއެވެ.
ޔުނައިޓެޑް ވިކްޓްރީގެ މެނޭޖަރު މުހައްމަދު ފަސީން ބުނީ އެ ޓީމުން އަބަދުވެސް ޓީމު ހަދަނީ ލިބޭނެ ބަޖެޓަކަށް ބަލައިގެން ކުޅުންތެރިންނަށް މުސާރަ ދެވޭނެ ކަމުގެ ޔަގީންކަމާ އެކުއެވެ. އަދި އެ ވިސްނުމުގައި މި ފަހަރުގެ ސީޒަނަށް ސްކޮޑު އެކުލަވާލައި ގަދަ ތިނަކަށް ޓާގެޓް ކުރާ ކަމަށް ފަސީން ބުނެފައިވެއެވެ.
މެނޭޖްމަންޓުން ހަމަ ހުރިހާ ބޭފުޅުން ވެސް ވާހަކަދައްކައިގެން ބެލީ ގަދަ ތިނަކަށް ފައިޓް ކުރެވޭވަރުގެ ޓީމެއް ހެދުމަށް. އަޅުގަނޑުމެން ބޭނުންވި ޕްލެޔާސް ލިބިއްޖެ. ޓީމާ ދޭތެރޭ އޯވަރޯލްކޮށް ހިތްހަމަޖެހޭ.
– ގަދަ ތިނެއްގެ ޓާގެޓް އޮތްކަން ހާމަކުރަމުން ކްލަބުގެ މެނޭޖަރު ބުނެފައިވެއެވެ.
ޔުނައިޓެޑް ވިކްޓްރީގެ ކޯޗު މުހައްމަދު އާދަމް ބުނީ ސީޒަނަށް ތައްޔާރުވާން ފެށިއިރު އެޓީމަށް ދަތިކަމެއް ކުރިމަތި ނުވާކަމަށާއި، އާ ކުޅުންތެރިންނާ އެކު އޭނާ ބޭނުންވި ގޮތަށް ޓީމު ވަރުގަދަވި ކަމަށެވެ. ހާއްސަކޮށް ބަކާ އާއި އީސަ އެޓީމާ ގުޅުމުން ޓީމު ވަރަށް ބޮޑަށް ވަރުގަދަވެފައިވާކަމަށް ކޯޗު ވަނީ ބުނެފައެވެ.
އާދީއްތަ ދުވަހު ހަވީރު ލީގު ހުޅުވާ މެޗުގައި މާޒިޔާއާ ދެކޮޅަން ނުކުންނަ އިރު މުހައްމަދު އާދަމް ބުނީ ޕްރެކްޓިސް ފެށުނީއްސުރެ އެޓީމުން ވިސްނަމުން އަންނަނީ މާޒިޔާ މެޗަށް ކަމަށެވެ.
ކޮމެންޓު ފޮނުވާ