ގއ. ދެއްވަދޫގެ ރައްޔިތުންގެ ފުރިހަމަ އިތުބާރާއި އެކު ފުރުސަތު ދެއްވައިފި ނަމަ، ނަތީޖާ ނެރެ ބާރު ސްޕީޑު ތަރައްގީ ގެނެސްދެއްވާނެކަމަށް ޕީއެންސީގެ ރިޔާސީ ކެންޑިޑޭޓު ޑރ. މުހައްމަދު މުއިއްޒު ވިދާޅުވެއްޖެއެވެ.
ކެމްޕެއިނަށް މިއަދު ގއ. ދެއްވަދޫއަށް ވަޑައިގަތުމުން އެ ރަށުން މުއިއްޒަށް ވަނީ ހޫނު މަރުހަބާއެއް ކިޔާފަ އެވެ. ރައްޔިތުން ކީ ހޫނު މަރުހަބާއަށް ޝުކުރު އަދާކުރައްވައި، މުއިއްޒު ވިދާޅުވީ ބައެއް މަޝްރޫއުތައް ރަށުގައި ކުރިޔަށް ދާއިރު ރައްޔިތުން ބޭނުންވާއިރު އެއީ ރައްޔިތުން އެދޭ ސްޕީޑެއް ނޫން ކަމަށެވެ. އެކަމަކު ޕީޕީއެމް/ޕީއެންސީގެ އަބަދުވެސް ސިޔާސަތަކަށް ވާނީ ރަށުގެ ތަރައްގީ ބާރު ދުވެލީގައި ކުރިޔަށް ގެންގޮސް ތަންފީޒު ކުރުންކަމަށް މުއިއްޒު ވިދާޅުވި އެވެ.
ދެއްވަދޫގެ ކުރިމަގަށްޓަކައި ރައްޔިތުން ގޮތް ނިންމައި ރިޔާސީ އިންތިހާބުގައި ފުރުސަތު ދެއްވުމަށް އެދިވަޑައިގެން މުއިއްޒު ދެއްވީ ބަދަލު ދައްކައި ތަރައްގީ ގެންނާނެކަމުގެ ޔަގީންކަމެވެ. ރަށުގެ ރައްޔިތުންގެ ފަރާތުން ވެސް ބަނދަރުގެ ޝަކުވާތައް ލިބުނުއިރު މުއިއްޒު ވިދާޅުވީ ލޯންޗު ފަޅުތެރެއަށް ވަނުމާއި އެކު އެންމެ ފުރަތަމަ ފާހަގަކުރެވުނު މައްސަލައަކީ ވެސް އެއީ ކަމަށެވެ. މުއިއްޒު ވައުދުވީ ރަށުގެ ބަނދަރު ޒަމާނީ ފެންވަރަށް ތަރައްގީކޮށް، ބަދަލު ގެނައުމަށެވެ.
އިރާދަކުރެއްވިއްޔާ ދެއްވަދޫގެ ތަރައްގީއަޓަކައި ކުރަންޖެހޭ ހުރިހާ މަސައްކަތަކަށް ވެސް އަޅުގަނޑުމެންގެ ފުރިހަމަ އެއްބާރުލުން ލިބޭނެ. މި ރަށަކީ ވަރަށް ޒަމާންވީ، ވަރުގަދަ ތާރީހެއް އޮންނަ، ވަރަށް ހިދުމަތްތެރި ރައްޔިތުންތަކެއް ދިރިއުޅޭ ރަށެއް. އެކަން އަޅުގަނޑު އެކަން އުފަލާއި އެކު ފާހަގަކުރަން.
– މުއިއްޒު ވިދާޅުވިއެވެ.
މުއިއްޒު ވިދާޅުވީ ރަށްތަކުގެ ރައްޔިތުންގެ ފަރާތުން ބޮޑު ތާއީދެއް ލިބެމުންދާކަމަށާއި، އުންމީދަކީ ދެވަނަ ބުރަކަށް ނޮގޮސް އެއް ފަހަރުން މި އިންތިހާބު ކާމިޔާބު ކުރުމުގެ ފުރުސަތު ލިބިގެން ދިއުން ކަމަށެވެ.
PPM PNC ge Riyaasy Candidate Dr. Mohamed Muizzu Ga. Dhevvadhoo ah vadaigathumun hoonu maruhabaa eh @MMuizzu#Vote4Muizzu#DrMuizzuSembe2023#DhiveheengeRaajje#FreePresidentYameen pic.twitter.com/qJAVR26eaY
— Progressive Party of Maldives (@ProgressPartyMV) August 28, 2023
އަންނަ މަހުގެ 09 ގައި ބާއްވާ ރިޔާސީ އިންތިހާބުގެ ކެމްޕެއިނަށް މުއިއްޒު މިއަދު ވަޑައިގަތުމަށް ހަމަޖެހިފައި ވަނީ ގއ. އަތޮޅުގެ ރަށްތަކަށެވެ. އެއަށް ފަހު މާދަމާ ރ، ބ، ޅ ގެ އަތޮޅުތަކުގެ ދަތުރު ފައްޓަވާނެއެވެ.
