ވަޒީފާ ދިނުމާއި އެ ނޫންވެސް އެހެން ކަންކަމުގައި ވެސް، މީހާ އަޅާ ހެދުމެއްގެ ސަބަބުން ތަފާތު ކުރުން ނުގެންގުޅޭނެ ކަމަށް އިދިކޮޅު ރިޔާސީ ކެންޑިޑޭޓް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
މި ސަރުކާރުން ޓީޗަރުންގެ ސުލޫކީ މިންގަނޑަށް ގެނައި ބަދަލުގައި ކިޔަވައިދޭ ވަގުތު ޓީޗަރުން ތިބެން ޖެހެނީ ކާކުކަން އެނގޭ ގޮތަށް ކަމަށް އޮތުމުން މޫނު ބުރުގާ އަޅައިގެން ކިޔަވައިދިނުން މަނާވުމާއެކު ގިނަ ބައެއްގެ ނުރުހުން އަމާޒުވިއެވެ. އެކަމަކު ފާޑުކިޔުންތަކާއެކު، އިންތިހާބަށް މަދު ދުވަސްކޮޅަކަށް ވެފައި ވަނިކޮށް މިދިޔަ އަންގާރަ ދުވަހު އެޑިއުކޭޝަން މިނިސްޓްރީން ވަނީ އެ އުސޫލު ބަދަލުކޮށް މޫނުބުރުގާ އަޅައިގެން ކިޔަވައިދެވޭ ގޮތަށް ހަދާފައެވެ.
ރިޔާސީ އިންތިހާބުގެ ކެމްޕެއިނަށް ނ. އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން އެ އަތޮޅު ވެރިކަންކުރާ ރަށް މަނަދޫގައި މިއަދު މެންދުރުފަހު ބޭއްވި ޖަލްސާގައި މުއިއްޒު ވިދާޅުވީ އޭނާގެ ވެރިކަމެއްގައި ރައްޔިތުންނަށް ވަޒީފާ ދިނުމައާއި، ހިދުމަތް ކުރުމުގައި ވެސް ތަފާތު ނުކުރައްވާނެ ކަމަށެވެ. ގާނޫނުގައި ހިމަނައިގެން ވިޔަސް، އެމީހަކު ހެދުން އަޅާ ގޮތަކީ ދީނާ ހިލާފު ގޮތެއް ނޫންނަމަ ކުރާ ތަފާތުތައް ނައްތާލަންޖެހޭ ކަމަށް މުއިއްޒު ވިދާޅުވިއެވެ.
އެ ރައްޔިތަކު ހެދުން އަޅާ ގޮތް އެއީ ދީނާ ހިލާފު ނޫން ގޮތަކަށް ދީނުގައި އޮންނަ ހަމަތަކުގެ މަތިން ކޮންމެ ގޮތަކަށް ހެދުން އެޅިޔަސް، ސްކޫލުގައި ވަޒީފާ ދިނުން ކަމުގައިވިޔަސް، އެހެން ތަނެއްގައި ވަޒީފާ ދިނުން ކަމުގައި ވިޔަސް ތަފާތު ކުރެވިގެން ނުވާނެ.
– ޑރ. މުއިއްޒު ވިދާޅުވިއެވެ.
ރާއްޖެއަކީ 100 ޕަސެންޓް މުސްލިމް ގައުމަކަށް ވެފައި، އިސްލާމީ ޝަރީއަތާ އެއްގޮތަށް ހެދުން އަޅާ މީހުންނާ މެދު މިފަދައިން އެއްގޮތަކަށް ވެސް ކަން ކުރެވިގެން ނުވާނެ ކަން ފާހަގަކުރައްވައި މުއިއްޒު ވިދާޅުވީ މިއީ ގާނޫނެެއްގައި ބަޔާން ކުރެވިގެން ވިޔަސް ކަށަވަރުކަން ދޭން ޖެހޭ ކަމެއް ކަމަށެވެ.
