ރައްޔިތުންގެ މަޖިލީހުގެ ޕާޓީތަކުގެ ދަފްތަރުގައި ހިމެނުމަށް މިހާތަނަށް ހުށަހަޅާފައިވަނީ ޑިމޮކްރެޓްސް ޕާޓީގެ އެންމެ ތިން މެންބަރުން ކަމަށް މަޖިލީހުގެ ރައީސް މުހައްމަދު ނަޝީދު މިއަދު ވިދާޅުވެއްޖެއެވެ.

މަޖިލީހުގެ ރައީސް މުހައްމަދު ނަޝީދު ޖަލްސާ ވިދާޅުވީ ވަކިޕާޓީއަކަށް ނިސްބަތްނުވާ ތިން މެމްބަރަކު ޑިމޮކްރެޓްސްއާ ގުޅުނުކަން އަންގާފައިވާ ކަމަށެވެ. އެ މެމްބަރުންނަކީ މެދުހެންވޭރު ދާއިރާގެ މެމްބަރު އަލީ އާޒިމް، މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ، އަދި މަޑަވެލި ދާއިރާގެ މެމްބަރު ހުސެއިން ފިރުޝާންއެވެ.

އެ މެމްބަރުން ދަ ޑިމޮކްރެޓްސްއާ ގުޅިވަޑައިގެން އެ ޕާޓީގެ ނަމުގައި މަޖިލީހުގައި ތަމްސީލު ކުރެއްވުމަށް ވަނީ އެދިވަޑައިގެންފަ. އަދި މަޖިލީހުގެ ގަވާއިދުގައި ބަޔާންކުރާ ލިޔުންތައް ވަނީ މަޖިލީހަށް އިނގިފައި. ނަޝީދު ވިދާޅުވިއެވެ.

މަޖިލީހުގެ ރައީސް ނަޝީދަކީ ވެސް ޑިމޮކްރެޓްސްގެ މެމްބަރެކެވެ. ނަމަވެސް ޕާޓީއާ ގުޅިވަޑައިގެންނެވިކަން އެމަނިކުފާ ވެސް އޮތީ އިދާރާއަށް ނާންނަގަވައެވެ. ނަޝީދު ވަނީ ޕާޓީއަށް އަލަށް ގުޅިވަޑައިގަންނަވާ މެންބަރުން ލަސް ނުކުރައްވާ އެކަން މަޖިލީހުގެ އިދާރާއަށް އެންގެވުމަށް އެދިވަޑައިގެންފައެވެ.

މަޖިލީހުގެ ގަވައިދުގައިވާ ގޮތުން މެންބަރަކު ޕާޓީ ބަދަލުކުރެއްވި ނަމަވެސް، އެ ބަދަލު މަޖިލީހުގެ ޕާޓީތަކުގެ ދަފްތަރަށް އަންނާނީ އެ މެންބަރުން އަމިއްލައަށް މަޖިލީހަށް ސިޓީއަކުން އެންގެވުމުންނެވެ.

ނަޝީދު ހިމެނިވަޑައިގަންނަވާހެން، 14 މެންބަރަކު ވަނީ އަލަށް އުފެއްދި ޑިމޮކްރެޓްސް އަށް ސޮއިކުރައްވައިފައެވެ. ދާއިމީ ކޮމިޓީތައް ފާސްކުރި ފަހުން، އޭރު މިނިވަން މެންބަރުންގެ ގޮތުގައި ތިއްބެވި ބައެއް މެންބަރުން އެ ޕާޓީއަށް ސޮއިކުރެއްވުމާ ގުޅިގެން އާ ދައުރުގެ ފުރަތަމަ ޖަލްސާގައި ވެސް ތާވަލުކޮށްފައި އޮތީ ދާއިމީ ކޮމިޓީތަކުގެ މައްސަލައެވެ. ނަމަވެސް ޑިމޮކްރެޓްސްއަށް ދެން ސޮއިކުރެއްވި މެންބަރުން އެކަން އަންގަވާފައިނުވާތީ، ދާއިމީ ކޮމިޓީތަކުގެ މައްސަލަ އަނެއްކާ ވެސް ދިގުލައިގެން ދާނެއެވެ.

ޑިމޮކްރެޓްސްއާ ގުޅި މަޖިލީހަށް ނާންގާ މެމްބަރުން:

– މަޖިލީހުގެ ރައީސް މުހައްމަދު ނަޝީދު
– މަޖިލީހުގެ ނައިބު ރައީސް އީވާ
– ހެންވޭރު ހުޅަނގު ދާއިރާގެ މެމްބަރު ހަސަން ލަތީފު
– މައްޗަންގޯޅި އުތުރު ދާއިރާގެ މެންބަރު މުހައްމަދު ރަޝީދު
– މާފަންނު މެދު ދާއިރާގެ މެމްބަރު އިބްރާހިމް ރަޝީދު
– އުނގޫފާރު ދާއިރާގެ މެމްބަރު މުހައްމަދު ވަހީދު
– ތޮއްޑޫ ދާއިރާގެ މެމްބަރު ހަސަން ސިޔާން
– ވިލުފުށީ ދާއިރާގެ މެމްބަރު ހަސަން ލަތީފު
– ގައްދޫ ދާއިރާގެ މެމްބަރު އަހުމަދު ޒާހިރު
– ހުޅުދޫ ދާއިރާގެ މެމްބަރު އިލްޔާސް ލަބީބު
– ހިތަދޫ މެދު ދާއިރާގެ މެމްބަރު އަހުމަދު ރަޝީދު

މި ހުރިހާ މެންބަރުންނަކީވެސް ވެރިކަންކުރާ މައި ޕާޓީ އެމްޑީޕީ ދޫކުރުމަށްފަހު ޑިމޮކްރެޓްސް ޕާޓީ އުފައްދާ އެ ޕާޓީއާ ގުޅުނު މެމްބަރުންނެވެ. މީގެއިތުރުން ކުޅުދުއްފުށީ އުތުރު ދާއިރާގެ މެމްބަރު ޔާސިރު އަބްދުލް ލަތީފުވެސް އެމްޑީޕީ ދޫކުރައްވާ ޑިމޮކްރެޓުންނާ ގުޅިވަޑައިގަތެވެ. ނަމަވެސް ފަހުން އަނެއްކާ ވެސް ޔާސިރު ވަނީ އެމްޑީޕީއަށް ސޮއިކުރައްވާފައެވެ.

މަޖިލީހުގައި މިހާރު ހިމެނެނީ އެމްޑީޕީގެ 56، ޑިމޮކްރެޓްސްގެ 3، ޕީޕީއެމްގެ 5، ޕީއެންސީގެ 3، އެމްއެންޕީގެ 3، ޖުމްހޫރީ ޕާޓީގެ 2، އެމްޑީއޭގެ 2 އަދި ވަކި ޕާޓީއަކަށް ނިސްބަތްނުވާ 11 މެންބަރުންނެވެ.