ރާއްޖެ އެދޭ ހަގީގީ ތަރައްޤީގެ ބަދަލު ގެނެވޭނީ ޖުމްހޫރީީ ޕާޓީގެ ރިޔާސީ ކެންޑިޑޭޓް ޤާސިމް އިބްރާހިމަށް ކަމުގައި އެމަނިކުފާނުގެ ތަރުޖަމާނު އަދި ކުރީގެ ހެލްތު މިނިސްޓަރ އަމީން ވިދާޅުވެއްޖެއެވެ.
ރިޔާސީ ކެމްޕޭންގައި މިރޭ ކުޅުދުއްފުށީގައި ބޭއްވި ޖަލްސާގައި ވާހަކަ ދައްކަވަމުން އަމީން ވިދާޅުވީ ރާއްޖޭގެ ރައްޔިތުން އެދޭ ތަރައްޤީ ހާސިލް ނުވަނީ އެކަން ކުރެވޭނެ ޤާބިލް ހަރުދަނާ ބަޔަކު ގައުމުގެ ހުންގާނުގައި ނެތުމުންކަމަށެވެ. މަލްޓިޕާޓީ ނިޒާމުގެ ތެރެއިން އެކި ޕާޓީތަކާއި އެކި ވެރިންނާއި ވެރިކަން ހަވާލު ކުރެވުނު ނަމަވެސް ރައްޔިތުން ބޭނުންވި ބަދަލު ފެނިފައި ނުވާކަމަށް އަމީން ވިދާޅުވިއެވެ.
އަމީން ވިދާޅުވީ ރާއްޖޭގައި ހުރި މައްސަކަތަކާއި ރައްޔިތުން އެދޭ ތަރައްޤީ ގެނެވޭނީ އެކަންކަމުގެ ތަޖުރިބާ ހުރި އެކަން ކުރަން އެގޭވަރުގެ ބޭފުޅަކަށް ކަމަށެވެ. ޖުމްހޫރީ ޕާޓީގެ ލީޑަރަކީ އަބަދުވެސް ޤައުމުގެ ހިންގުމާއި ކުރިއެރުމާއި ތަރައްޤީއަށް ބޮޑެތި ޚިދުމަތްކެއް ކޮށްދެއްވަމުންދާ ލީޑަރެއް ކަަމަށް އަމީން ވިދާޅުވިއެވެ.
އަމީން ވިދާޅުވީ ޤާސިމަކީ ޓެސްޓް ކުރެވި ނަތީޖާ ނެރުއްވާފައިވާފައިވާ ބޭފުޅެއްކަމަށެވެ. ތަރައްޤީގައި މިހާތަނަށް ރާއްޖެ ދެކުނު ކޮންމެ ކަމެެއްގައި އެންމެބޮޑު ހިއްސާ އެއްއޮތް ބޭފުޅަކީ ގާސިމް ކަމަށް އަމީން ވިދާޅުވިއެވެ. އަމީން ވިދާޅުވީ ދިވެހި ރައްޔިތުން އެދޭފަދަ ސިއްޚީ ފަރުވާއާއި، ތައުލީމާއި އުމްރާނީ ތަރައްޤީ ގެނެވޭނީ އެކަންކަމަށް ބޭނުންވާ ދުޅަހެޔޮ އިޤްތިޞާދެއް އޮވެގެން ކަމަށެވެ. އެކަން ކުރުމުގެ ސިޔާސަތަކާއި ތަސައްވަރެއް އޮތް ހަމައެކަނި ކެންޑިޑޭޓަކީ މިފަހަރު ޤާސިމް ކަމަށް އަމީން ވިދާޅުވިއެވެ.
އަމީން ވިދާޅުވި ޤާސިމް ހާމަކުރައްވާފައިވާ މެނިފެސްޓޯގައި މުޅި ގައުމަށް ބޭނުންވާ ހަމަޖެހުމާއި ތަރައްޤީ އެކުލެވިގެން ވާކަމަށެވެ. އެމެނިފެސްޓޯ ތަންފީޒު ކުރުމުގެ ފުރުސަތު ލިބިއްޖެނަމަ ދިވެހި ޤައުމަށް އާރޯކަމާއި ތަނަވަސްކަން ލިބިގެންދާނެ ކަމީ ޝައްކު ކުރައްވާ ކަމެއް ނޫންކަމަށް އަމީން ވިދާޅުވިއެވެ.
