ގދ.ގައްދޫ ކައުންސިލް ރައީސް އަހުމަދު މުހައްމަދު ހިމެނޭހެން ގިނަ ބަޔަކު ވެރިކަން ކުރާ މައި ޕާޓީ އެމްޑީޕީއަށް ސޮއިކޮށްފިއެވެ.
މިއަދު ހަވީރު މޫކައިގައި ބޭއްވި ޚާއްސަ ރަސްމިއްޔާތުގައި ގައްދޫ ކައުންސިލް ރައީސް އަހުމަދު މުހައްމަދާއި، ކައުންސިލް މެމްބަރު ޢަލީ ޝަރީފްވެސް ވަނީ އެމްޑީޕީއަށް ސޮއިކޮށްފައެވެ. މި ދެބޭފުޅުންނަކީވެސް ކުރިން އިދިކޮޅު ޕީޕީއެމްއަށް ނިސްބަތްވާ ދެ މެމްބަރުންނެވެ. މިދެމެމްބަރުން ޕީޕީއެމް ދޫކޮށް އެމްޑީޕީއާއި ގުޅުމުން، ގައްދޫ ކައުންސިލްގެ ސާފު މެޖޯރިޓީ ވަނީ އެމްޑީޕީއަށް ލިބިފައެވެ. މިހާރު ގައްދޫ ކައުންސިލްގައި ތިއްބަވަނީ އެމްޑީޕީގެ 3 މެމްބަރުންނާއި، ޕީޕީއެމް ދެ މެމްބަރުންނެވެ.
މިބޭފުޅުންގެ އިތުރުން ގައްދޫ ކައުންސިލް އަންހެނުންގެ ތަރައްޤީއަށް މަސައްކަތް ކުރާ ކޮމެޓީގެ ރައީސާވެސް އެމްޑީޕީއަށް ސޮއިކުރުމަށް ވަނީ ހަމަޖެހިފައެވެ. މީގެ އިތުރުން ކައުސިލްގެ އިދާރީ މަސައްކަތް ކުރާ މުވައްޒިފުންގެ ތެރޭގައި ހިމެނޭ ޕީޕީއެމްގެ ފިކުރަށް ތާއީދު ކުރާ ފުޒޫލް، އިއްސާގު އަދި މުއާވިޔަތުވެސް އެމްޑީޕީއަށް ސޮއި ކުރުމަށް ވަނީ ހަމަޖެހިފައެވެ.
ފިނޭންސް މިނިސްޓަރ އިބްރާހިމް އަމީރު ނިސްބަތްވާ ގައްދޫއަށް ރައީސް އިބްރާހިމް މުހައްމަދު ޞާލިހު ވަޑައިގެންނެވުމުން އެރަށުން ވަނީ ރައީސް ޞާލިހަށް ހޫނު މަރުހަބާއެއް ދަންނަވާފައެވެ. ގައްދޫގައި ތަރައްޤީގެ ގިނަ މަސައްކަތްތަކެއް މިހާރުވެސް ކުރަމުންދާއިރު، ގައްދޫ ރައްޔިތުންގެ އެންމެ ބޮޑު އުންމީދު ކަމުގައިވާ ހޮސްޕިޓަލުގެ މަސައްކަތް މިފެށޭ ހަފްތާގައި ފެށުމަށް ބިން ސާފު ކުރުމުގެ މަސައްކަތް ވަނީ ފަށާފައެވެ.
މީގެ އިތުރުން ގައްދޫ ކައިރީއޮތް މާވާރެލު އެއާޕޯޓްގައި ރޭގަނޑު ދަތުރު ކުރެވޭނެހެން ލައިޓް ހަރުކުރުންވެސް މިމަހުގެ ތެރޭގައި ކުރުމަށް ވަނީ ހަމަޖެހިފައެވެ.
ކޮމެންޓު ފޮނުވާ