ޕީއެންސީގެ ރިޔާސީ ކެންޑިޑޭޓް ޑރ.މުހައްމަދު މުއިއްޒުގެ އެސިސްޓެންޓް ކެމްޕޭން މެނޭޖަރަކަށް ހެންވޭރު ދެކުނު ދާއިރާގެ އެމްޑީޕީގެ ކުރީގެ މެމްބަރު މުހައްމަދު އަބްދުލްކަރީމް (ރުކުމާ) ހަމަޖައްސަވައިފިއެވެ.
މުއިއްޒުގެ ސްޕޯކްސް ޕާސަން މުހައްމަދު ތޮލާލް ވިދާޅުވީ މުއިއްޒުގެ އެސިސްޓެންޓް ކެމްޕޭން މެނޭޖަރުންގެ ގޮތުގައި ރުކުމާގެ އިތުރުން މުއާޒު މުހައްމަދު ރަޝީދު ހަރަކާތްތެރިވާނެކަމަށެވެ. މިހާތަނަށް މުއިއްޒުގެ ކެމްޕޭން މެނޭޖަރުގެ ގޮތުގައި ހަރަކާތްތެރިވަނީ ރައީސް ޔާމީންގެވެސް ކެމްޕޭން މެނޭޖަރު މުހައްމަދު އަމީނެވެ.
ރިޔާސީ ކެމްޕޭން ފޯރީގައި މުއިއްޒު ކުރައްވަމުންދާއިރު، މުއިއްޒާއިއެކު ޕީޕީއެމް، ޕީއެންސީގެ ލީޑަރޝިޕްގެ ބޭފުޅުން ދަނީ ހަރަކާތްތެރިވަމުންނެވެ. މުއިއްޒު އިތުރުގެ ރައްތަކުގައި ކެމްޕޭން ކުރައްވަމުންދާއިރު ރަނިންމޭޓް ހުސެއިން މުހައްމަދު ލަތީފް އާއި ޓީމުން ހަރަކާތެރި ވަމުންދަނީ ދެކުނުގައެވެ.
ރިޔާސީ އިންތިޚާބުގައި މިފަހަރުވެސް ވާދަކުރާނެ ކަމަށް ބެލެވެނީ ޕީޕީއެމްއާއި އެމްޑީޕީއެވެ. މިއިންތިޚާބު އެއްބުރުން ކާމިޔާބު ކުރުމަށް ދެޕާޓީންވެސް މަސައްކަތް ކުރާއިރު، މިހާތަނަށް ދެ ކެންޑިޑޭޓުންނަށް ރާއްޖޭގެ އެކި ކަންކޮޅުތަކުން އޮތް ތާއީދު ދަނީ ފެންނަމުންނެވެ.
