އެތުލިޓިކޯ މޮޅުވެ އެއްވަނައަށް، މެޑްރިޑަށް މުހިންމު މޮޅެއް

ސްޕެނިޝް ލަލީގައި ރެއާލް މެޑްރިޑާއި އެތުލިޓިކޯ މެޑްރިޑް މޮޅުވެއްޖެއެވެ.

ރަށުން ބޭރުގައި ރެއާލްއިން މޮޅެއް ހޯދީ ސެވިއްޔާއާ ވާދަކޮށް 1-0 ލަނޑުންނެވެ. މެޗުގައި ހަމައެކަނި ފެނިގެންދިޔަ ލަނޑަކީ ސެވިއްޔާގެ ކީޕަރު ޔާސިން ބޮއުނޯއު އަތުން ބައިކޮޅަށް ވަތްލަނޑެކެވެ. މިއީ މި ސީޒަންގައި ލީގުގައި ކީޕަރެއްގެ އަތުން ލީގުގައި ބައިކޮޅަށް ލެނޑެއް ވަތް ފުރަތަމަ ފަހަރުއެވެ. އަދި މިއީ 29 އަހަރު ތެރޭގައި ސެވިއްޔާގެ ކީޕަރެއްގެ އަތުން ބައިކޮޅަށް ލަނޑެއްވަތް ފުރަތަމަފަހަރުއެވެ.

މެޗުގައި ސެވިއްޔާ އަށް މެޑްރިޑްގެ ގޯލާ އަމާޒުކޮށް ފޮނުވާލެވުނީ އެންމެ ދެހަމަލާއެކެވެ. މެޗުގައި ލަނޑުޖަހާނެ ގިނަ ފުރުސަތުތަކެއް މެޑްރިޑްގެ ބެންޒީމާއަށް ލިބި ވަނީ ބޭކާރުވެފައެވެ. މިއީ މެޑްރިޑުން ލީގުގެ އެންމެފަހުން ކުޅުނު ތިންމެޗުގައިވެސް މޮޅެއް ނުހޯދިނު އިރު އެޓީމުން ތިން މެޗަށްފަހު ހޯދި ފުރަތަމަ މޮޅުވެ.

ލީގުގައި ރޭ އެތުލިޓިކޯ ކުޅުނު މެޗު ކާމިޔާބުކޮށް އެޓީމުން ތާވަލުގެ އެއްވަނައަށް ވަނީ ޖެހިލާފައެވެ. އެތުލިޓިކޯ މެޗު ކާމިޔާބުކުރީ އަމިއްލަ ދަނޑުގައި ރެއާލް ވަލަޑޮލިޑްއާ ވާދަކޮށް 2-0 ލަނޑުންނެވެ. މެޗުގައި އެތުލެޓިކޯއަށް ލަނޑުތައް ކާމިޔާބުކޮއްދިނީ ތޯމަސް ލެމާގެ އިތުރުން މާކޯސް ލޮރެންޓޭއެވެ.

މި ނަތީޖާ އެކު އެތުލިޓިކޯ ލީގުގެ އެއްވަނައގަ އޮތީ 10 މެޗުން ހޯދި 26 ޕޮއިންޓާއެކުއެވެ. ސޮސެއިޑާޑް ދެވަނައިގަ އޮތީ 24 ޕޮއިންޓާއެކުއެވެ. ލީގުގެ ތިންވަނައިގަ ރެއާލް މެޑްރިޑް އޮތީ 20 ޕޮއިންޓާއެކުއެވެ. ވިޔަރެއާލްއަށް ހަތަރުވަނަ ލިބެނީ ހަމަ މިއަދަދަށް ޕޮއިންޓް ހޯދައިގެންނެވެ.