ރައީސް ނަޝީދު މިފަދައިން ވިދާޅުވީ ދަ ޑިމޮކްރެޓްސްގެ މެނިފެސްޓޯ ލޯންޗުކުރުމަށް ރޭ ބޭއްވި ރަސްމިއްޔާތުގައި ވާހަކަ ދައްކަވަމުންނެވެ.

ރައީސް ނަޝީދު ވިދާޅުވީ ސަރުކާރަކުން ރައްޔިތުންނަށްވާ ވައުދު ފުއްދުމަށްޓަކައި ލެޖިސްލޭޓިވް އެޖެންޑާއެއް ނުވަތަ ގާނޫނީ އޮނިގަނޑެއް ބޭނުންވާނެކަމަށެވެ.

އެ ގާނޫނީ އޮނިގަނޑުން ތަކެތި ގަތުމަށާއި ހަރަދު ކުރުމަށާއި ޕްރޮކިއުމަންޓުގެ އިތުރުން ޓެންޑަރެއް ކުރުމަށް ޖާގަ ދޭކަން ފާހަގަކުރައްވާ ރައީސް ނަޝީދު ވިދާޅުވީ ޕްރޮޖެކްޓް ހިނގާނީ އެ ޓެންޑަރު ކުރީމައި ކަމަށެވެ. ރައީސް ނަޝީދު ވިދާޅުވިގޮތުގައި ދައުލަތެއް ހިންގުމަކީ ވަކި ތަރުތީބަކުން ވަކި ގޮތަކަށް ކުރަން ޖެހޭ ކަމެކެވެ.

އަދި އެ ނޫންގޮތަކަށް އެކަން ކުރަން އުޅެފި ނަމަ ރާއްޖޭގެ ރަށްތަކަށް ވެގެންދާނެ ގޮތް މިހާރު ފެންނަމުންދާ ކަމަށާއި ހުރިހާ ރަށެއް ވަނީ ފަސްގަނޑު ޖަހާފައިކަމަށްވެސް ރައީސް ނަޝީދު ވިދާޅުވިއެވެ.

"އެންމެ ޕްރޮޖެކްޓެއްވެސް ނިންމޭކަށް ނެތް، އެއްވެސް ޕްރޮޖެކްޓެއް ފެށީކީ ނިންމާކަށް ނޫން، ފަށާފައިހުރި ޕްރޮޖެކްޓްތަކަކީ ވީ ވައުދެއް ނޫން، ވެފައި ހުރި ވައުދުގެ ނެތް ޕްރޮޖެކްޓެއް، ފައިސާ ހޯދަން ވިދާޅުވީ އެއްވެސް މަގަކުން ފައިސާއެއް ނައި، ލޯނަކުން ބޮންޑަކުން އަދި ހިލޭ އެހީއަކުންވެސް ނައި، އެހެންވީމާ ޗާޕް ޖެހީ، ޖެހޭނެތާ އަތުގައި ޗާޕް މެޝިނެއް އޮތިއްޔާ، އެ ދިވެހި ފައިސާ ޖަހާ ނެގީ، މިދިޔަ ފަސް އަހަރު މިދިޔައީ ގެއްލިގެން" ސަރުކާރުން ކަންކުރަމުން އަންނަ ގޮތް ކަމަށް ފާހަގަކުރައްވާ ރައީސް ނަޝީދު ވިދާޅުވިއެވެ.