މާލެ ސަރަހައްދުން ގޯތި ދިނުމަށް މި ސަރުކާރުން ހިންގާ "ބިންވެރިޔާ" ސްކީމްގެ ދަށުން ހުޅުމާލެއިން ގޯތި ލިބޭ މީހުންނަށް ގޯތި ކެނޑުމުގެ މަސައްކަތް މިއަދު ފެށުމަށް ހައުސިން މިނިސްޓްރީން ނިންމައިފިއެވެ.
"ބިންވެރިޔާ" ސްކީމްގެ ދަށުން ގޯތި ލިބޭ މީހުންގެ ދާއިމީ ލިސްޓުގައި 18،955 މީހުން ހިމެނެއެވެ. ހައުސިން މިނިސްޓްރީން ވަނީ މި ހުރިހާ އެންމެންނަށް ހުޅުމާލެ އާއި ގުޅީފަޅާއި ގިރާވަރު ފަޅުން ގޯތި ދިނުމަށް ނިންމައިފައެވެ.
ދާއިމީ ލިސްޓުގައި ހިމެނޭ މީހުންނަށް ގޯތި ލިބޭ ތަނެއް ކަނޑައަޅަނީ ގުރު ނަގައިގެންނެވެ. ހައުސިން މިނިސްޓްރީން ވަނީ ގަލޮޅު ދަނޑުގައި ގުރު ނެގުމަށް ހާޢްސަ އިންތިޒާމުތަކެއް ހަމަޖައްސައިފައެވެ.
ގުރު ނެގުމުގެ މަސައްކަތް ގަލޮޅު ދަނޑުގައި ފެށި އިރު، ކުރިން ސަރުކާރުން ނިންމާފައި އޮތީ އިއްޔެ ހަވީރު ހުޅުމާލެ އިން ގޯތި ލިބޭ މީހުންނަށް ގޯތި ކެނޑުމަށެވެ. އެކަމަކު، ގުރުލުމުގެ މަސައްކަތް ފެށުން ލަސްވުމާ ގުޅިގެންނާއި އިއްޔެގެ ގުރުލުން ނުނިމި ގިނަ އިރުތަކެއް ވުމާ ގުޅިގެން ހުޅުމާލެ އިން ގޯތި ކެނޑުން ފަސް ކުރީއެވެ.
މިހާރު ހައުސިން މިނިސްޓްރީން ކަނޑައަޅާފައި ވަނީ މިއަދު މެންދުރު ގޯތި ކެނޑުމަށެވެ.
ހައުސިން މިނިސްޓްރީން ކުރިން ބުނެފައިވާ ގޮތުގައި، ގޯތި ލިބޭ ތަނެއް ކަނޑައަޅަން ގުރު ނަގަން ދާން ޖެހޭ ދުވަހާއި ވަގުތު އަންގާނީ ހައުސިން މިނިސްޓްރީގެ ޕޯޓަލް މެދުވެރިކޮށެވެ. ކޮންމެ މީހަކަށް ވެސް ގުރު ނެގުމަށް އަންނަން ގަޑިއެއްގެ އިރު ލިބޭނެއެވެ. މިއަދުގެ ނިޔަލަށް ގަލޮޅު ދަނޑުގައި ގުރު ނަގާއިރު މާދަމާ އިން ފެށިގެން ގުރު ނަގާނީ ހެންވޭރު ދަނޑުގައެވެ. ގުރު ނަގަން ނާދެވޭ މީހުން ބަދަލުގައި އާދެވޭނެ މީހަކު ޕޯޓަލް މެދުވެރިކޮށް ހަމަޖެއްސޭނެއެވެ. އަދި ގުރުލާ ތަނަށް ގަޑިއަށް ހާޒިރު ނުވާ ނަމަ، ހައުސިން މިނިސްޓްރީގެ މުވައްޒަފުން ގުރު ނަގައި ދިނުމުގައި ބައިވެރިވާނެއެވެ.
ހައުސިން މިނިސްޓްރީން މީގެ ކުރިން ބުނެފައިވާ ގޮތުގައި ގޯތި ލިބޭ އެންމެންނަށް ގޯތީގެ ދާއިމީ ރަޖިސްޓްރީ 11 ނޮވެމްބަރުގެ ކުރިން ހަވާލުކޮށް ނިމޭނެއެވެ.
