އިދިކޮޅު ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓް ޑރ.މުހައްމަދު މުއިއްޒުގެ ރަނިން މޭޓް ހުސެއިން މުހައްމަދު ލަތީފް ހުވަދު އަތޮޅުގެ ރަށްތަކަށް ކުރައްވާ ދަތުރުފުޅުގައި ފުރާ ވަޑައިގެންފިއެވެ.
ހުވަދު އަތޮޅު ދެކުނުބުރީ ފަރެސްމާތޮޑާއަށް އުފަން ސެމްބެ އާއިއެކު މިދަތުރުގައި ލީޑަރޝިޕްގެ އިސް ބޭފުޅުން ވަނީ ބައިވެރިވެފައެވެ. މިދަތުރުގައި ޕީޕީއެމްގެ ދެ ނައިބް ރައީސުން ކަމުގައިވާ ޣައްސާން މައުމޫނާއި، އަހުމަދު ސިޔާމް ބައިވެރިވެ ވަޑައިގަންނަވައެވެ. މިދަތުރުގައި ހުވަދު އަތޮޅުގެ ގިނަ ރަށްތަކަށް ދިއުމަށް ވަނީ ހަމަޖެހިފައެވެ.
ރަނިންމޭޓް ހުސެއިން މުހައްމަދު ލަތީފް (ސެމްބެ) މިމަހުގެ 15 އިން 19 އަށް ވަޑައިގަތުމަށް ހަމެޖެހިފައިވަނީ ގއ. އަދި ގދ. ގެ ރަށްތަކަށް ވަޑައިގަންނަވާއިރު، ރިޔާސީ ކެންޑިޑޭޓް ޑރ. މުއިއްޒު މިމަހުގެ 17 އިން 19 އަށް ވ.މ.ފ. އަދި ދ. އަތޮޅަށް ވަޑައިގަތުމަށް ހަމަޖެހިފައެވެ.
އަންނަ ރިޔާސީ އިންތިޚާބުގެ ކެމްޕެއިންގައި ޕީޕީއެމް/ޕީއެންސީގެ ރިޔާސީ ކެނޑިޑޭޓް ޑރ. މުއިއްޒު މިހާރު ގެންދަވަނީ ހއ.ގެ ރަށްތަކަށް ދަތުރު ކުރައްވަމުންނެވެ. މިގޮތުން ރޭ ހއ. އިހަވަންދޫގައި ޕީޕީއެމް/ޕީއެންސީއިން ބޮޑު ޖަލްސާއެއް ބާއްވާފައިވާއިރު، މިރޭވަނީ ހއ. ދިއްދޫގައި ބޮޑު ޖަލްސާއެއް ބާއްވާފައެވެ.
އިދިކޮޅު ކެނޑިޑޭޓް ޑރ. މުއިއްޒު އުތުރުގެ އަތޮޅުތަކަށް ކުރައްވަމުން ގެންދަވާ ދަތުރުފުޅުތަކުގައި ރަށްތަކުން މުއިއްޒުއަށް މަރުހަބާ ދެންނެވުމަށް ގިނަ އަދަދެއްގެ ބަޔަކު ނިކުންނަމުން ދާކަން ފާހަގަ ކޮށްލެވެއެވެ.
