މިހާރު ކުރިޔަށްދާ، 2023 ގެ ރިޔާސީ ކެމްޕޭންގައި މިއަދު ހަވީރު ހއ. އިހަވަންދުއަށް ވަޑައިގެން، އިދިކޮޅު ޕީޕިއެމް/ޕީއެންސީއަށް ރިޔާސީ އިންތިޚާބު ކާމިޔާބު ކުރެއްވިއްޖެނަމަ، އެރަށުގެ ތަރައްގީއަށް ގިނަގިނަ ގުނަ ވައުދުތަކެއް އިދިކޮޅު ކެނޑިޑޭޓް ޑރ. މުއިއްޒު ވެވަޑައިގެންފިއެވެ.
އިދިކޮޅު ކެނޑިޑޭޓް ހއ. އަށް މިހާރު ކުރައްވަމުން ގެންދަވާ ކެމްޕޭން ދަތުރުފުޅުގައި މިއަދު ހަވީރު ހއ. އިހަވަންދުއަށް ވަޑައިގެން އެރަށުގެ ޕީޕީއެމް ކެމްޕޭން ޖަގަހަ ރަސްމީކޮށް ހުޅުއްވާ ދެއްވުއްފަހު ވާހަކަ ދައްކަވަމުން ޑރ. މުއިއްޒު ވިދާޅުވީ އިހަވަންދޫ އާއި ދިގުފަރު ގުޅާލުމަށްފަހު ރައްޔިތުން އެދޭ ގޮތަށް އެރަށުގައި ސިނާއީ މަސައްކަތް ކުރެވޭނެ ގޮތް ހަދައިދޭނެ ކަމަށެވެ.
މި ޖަލްސާގައި އިތުރަށް ވާހަކަ ދައްކަވަމުން ޑރ. މުއިއްޒު ވިދާޅުވީ ފާއިތުވި 5 އަހަރު މި ސަރުކާރުން އިހަވަންދުއަށް ތަރައްގީ ގެނެސްދީފައި ނުވާކަމަށާއި، ތަރައްގީ ގެނެސްދޭނެ ގޮތް ފެނިފައިވަނީ ރައީސް ޔާމިންގެ ސަރުކާރުގައި ކަމުގައެވެ.
ތަރައްގީ ރައީސް ޔާމީންގެ ދައުރުގައި ވަނީ ފެނިފަ، ދިވެހި ރައްޔިތުން ބޭނުންވަނީ އެފަދަ ދުވަސްތަކެއް އަނެއްކާވެސް ރާއްޖެއަށް އަންނަން.
މިރޭ އިހަވަންދޫގައި ބޭއްވުނު ކެމްޕޭން ޖަލްސާގައި ވާހަކަ ދައްކަވަމުން ޑރ. މުއިއްޒު ވިދާޅުވިއެވެ.
ކުރިޔަށް އޮތް ރިޔާސީ އިންތިޚާބު އިދިކޮޅަށް ކާމިޔާބު ކުރެއްވިއްޖެނަމަ އިހަވަންދޫއަށް ކޮށްދެއްވާނެ ކަންކަމުގެ އިތުރު ތަފްސީލުތަކަށް ވަޑައިގަންނަވަމުން ޑރ. މުއިއްޒު ވިދާޅުވީ އެރަށުގެ ކުނި މެނޭޖުކުރެވޭނެ ނިޒާމެއް ޤާއިމުކޮށް ކުނީގެ މައްސަލައަށް ހައްލެއް ހޯދައި ދިނުމުގެ އިތުރުން، މަސްވެރިކަމުގެ ސިނާއަތް އެރަށުގައި ނަގާ ކޮޅަށް ޖަހާނެ ކަމުގައެވެ.
އަޅުގަނޑުމެން އިރާދަކުރެއްވިއްޔާ މަސްވެރިކަމުގެ ސިނާޔަތް ކޮޅަށް ޖަހައިދޭނަން، ދިގުފަރު ހިއްކާ މިރަށުގެ ރައްޔިތުން އެދޭ ގޮތަށް އެރަށުގައި ސިނާއީ މަސައްކަތް ކުރެވޭނެގޮތް ހަދައިދޭނަން، މަސްވެރިންނަށް ފިޝްކަލެކްޝަން ސެންޓަރަކާއި އައިސް ޕްލާންޓެއް ޤާއިމުކޮށްދޭނަން.
ޑރ. މުއިއްޒު ވިދާޅުވިއެވެ.
އަދި އޭގެ އިތުރުންވެސް ރިޔާސީ އިންތިޚާބު ކާމިޔާބު ކުރެއްވިއްޖެނަމަ، އިހަވަންދޫގެ މަގުތައްވެސް ތަރައްގީ ކޮށްދެއްވާނެ ކަމަށާއި، އެރަށުގައި ރަނގަޅު ފެނަވަރުގެ ހޮސްޕިޓަލެއް ޤާއިމުކޮށްދެއްވާނެކަމަށްވެސް ޑރ. މުއިއްޒު ވިދާޅުވިއެވެ. އަދި އިހަވަންދޫގައި މިހާރު ހުރި ޔޫތު ސެންޓަރުން އެކަށީގެންވާ ޚިދުމަތްތަކެއް ފޯރުކޮށް ދެމުން ނުދާތީ، އެރަށުގައި މަލްޓި ސްޕޯޓްސް ކޮމްޕްލެކްސެއް ޤާއިމުކޮށްދެއްވާނެ ކަމުގެ ޔަގީންކަންވެސް މުއިއްޒު ދެއްވިއެވެ.
އޭގެ އިތުރުންވެސް، ފަސޭހައިން ލޯން ލިބޭނެ އިންތިޒާމް ހަމަޖެއްސުމާއި އަދި ރައްިތުންގެ އާމްދަނީ އިތުރު ކުރުމަށް ވެވަޑައިގަންނަވަމުން ގެންދަވާ ވައުދުތަކަކީ މުޅިރާއްޖެއަށް އާންމުކޮށް ވަމުންދާ ވައުތަކެއްކަން ފާހަގަ ކުރައްވަމުން ޑރ. މުއިއްޒު ވިދާޅުވީ އެ ވައުދުތައް އެގޮތަށް ވާންޖެހެނީ ކުރިޔަށް އޮތް 25 ދުވަހުގެ ތެރޭގައި ހުރިހާ ރަށަކަށް ވަޑައި ނުގެންނެވިދާނެތީ ކަމުގައެވެ.
