އިދިކޮޅު ޕީއެންސީގެ ރިޔާސީ ކެނޑިޑޭޓް ޑރ. މުއިއްޒު މިއަދު ކުޅުދުއްފުއްޓަށް ވަޑައިގަތުމުން ކުޅުދުއްފުށިން އޭނާއަށް ހޫނު މަރުހަބާއެއް ކިޔައިފިއެވެ.

ޑރ. މުއިއްޒު މިއަދު ކުޅުދުއްފުއްޓަށް ވަޑައިގަތީ، އިދިކޮޅު ކެމްޕޭން ޓީމުން މިހާރު ބޮޑު ތިލަދުންމައްޗަށް ކުރައްވަމުން ގެންދަވާ ދަތުރުފުޅުގައި މިއަދު ހަވީރުއެވެ. ޑރ. މުއިއްޒުގެ އަރިހުގައި އޭނާގެ ރަނިންމޭޓް، ފަރެސްމާތޮޑާ ދާއިރާގެ މެމްބަރު ހުސެއިން މުހައްމަދު ލަތީފުވެސް ބައިވެރި ވެއެވެ.

އޭގެ އިތުރުން އިދިކޮޅުގެ ތިލަދުންމަތީ ދަތުރުގައި އިދިކޮޅު ލީޑަރޝިޕްގެ ބައެއް ބޭފުޅުންވެސް ދަނީ ބައިވެރިވަމުންނެވެ.

ކުޅުދުއްފުށިން "ޚަބަރު އޮންލައިން" އާއި ވާހަކަދެއްކި މީހަކު ބުނެފައިވަނީ، ޑރ. މުއިއްޒަށް މަރުހަބާ ކިޔުމަށް ބަނދަރު ސަރަހައްދަށް ޖަމާވެ ތިބި މީހުންނާ ސަލާމުކޮށް ނިންމުމަށް ގިނަ އިރުތަކެއް ހޭދަވިކަމަށެވެ.

ކުޅުދުއްފުއްޓަކީ އެމްޑީޕީގެ ކުރީގެ ރައީސް މުހައްމަދު ނަޝީދު އުފައްދަވާފައިވާ ދަ ޑިމޮކެރެޓްސް ޕާޓީއަށްވެސް ތާއީދުކުރާ ގިނަބަޔަކު ތިބޭ ރަށެއްކަން ފާހަގަ ކޮށްލެވެއެވެ.

އިދިކޮޅުން މިރޭ ކުޅުދުއްފުށީގައި ބޮޑު ޖަލްސާއެއް ބޭއްވުމަށް ވަނީ ހަމަޖެހިފައެވެ.