ރައްޔިތުންގެ މަޖިލިހުގެ އިނގުރައިދޫ ދާއިރާގެ ކުރީގެ މެމްބަރު އިބުރާހިމް ފަލާހު މިރޭ ޕީޕީއެމްއަށް ސޮއި ކުރައްވައިފިއެވެ. ފަލާހު މިރޭ ޕީއެމްއަށް ސޮއި ކުރެއްވީ، އިދިކޮޅު ޕީއެންސީގެ ރިޔާސީ ކެނޑިޑޭޓް ޑރ. މުއިއްޒުގެ މައި ކެމްޕޭން ޖަގަހަ ހުޅުވުމަށް މިރޭ ބޭއްވި ޚާއްސަ ރަސްމިއްޔާތުގައެވެ.

މިރޭ ޕީޕީއެމްއަށް ސޮއި ކުރެއްވުމަށްފަހު، މިރޭގެ ޖަލްސާގައި ވާހަކަ ދައްކަވަމުން ފަލާހުވަނީ އެންމެ ފުރަތަމަވެސް ރައީސް ޔާމިންގެ އަރިހުން މާފަށް އެދިފައެވެ. އަދި އޭނާ ވިދާޅުވެފައިވަނީ އޭނާގެ ސިޔާސީ ހަޔާތް ފެށިގެން އައީ ރައީސް ޔާމިންގެ އަރިއަހުން ކަމަށާއި، އަދި ޕީޕީއެމްއާއި ދުރަށް ވަޑައިގެންނެވުނީތީ ރައީސް ޔާމިންގެ އަރިހުންނާއި އަދި ޕީޕީއެމްގެ ސަޕޯޓަރުންގެ އަރިހުންވެސް މާފަށް އެދޭ ކަމުގައެވެ.

އޭނާ ވިދާޅުވީ، ވަގުތާއި ހާލަތުގެ ގޮތުން ކުޑަ ދުވަސްކޮޅަކަށް ޕީޕީއެމްއާ ދުރަށް ދިޔަ ނަމަވެސް އޭނާއަކީ ރައީސް ޔާމިންއާއި މެޑަމް ފާތުންއާވެސް ވަރަށް ގާތްކަން ބޭއްވި ބޭފުޅެއް ކަމަށާއި، ޕީޕީއެމްއާއި ދުރުގުގައި ހުންނެވިއިރުވެސް، އެހެން އެއްވެސް ސިޔާސީ ހަރަކާތެއްގައި ބައިވެރި ވެފައި ނޯންނާނެ ކަމުގައެވެ.

ޕީޕީއެމްއާ ގުޅިވަޑައިގަތުމަށްފަހު މިރޭގެ ޖަލްސާގައި ވާހަކަ ދައްކަވަމުން ފަލާހު ވިދާޅުވެފައިވަނީ، ރައީސް ޔާމިން މިނިވަންކުރުމަށް މަގުމައްޗަށް ނިކުންނަން ޖެހިއްޖެނަމަ އެކަމަށްވެސް އޭނާ ހުންނެވީ ތައްޔާރަށް ކަމުގައެވެ.

އަދި އޭނާ ވިދާޅުވީ ކުރިޔަށް އޮތް ރިޔާސީ އިންތިޚާބުގައި ރާއްޖޭގެ ރައީސުލްޖުމްހޫރިއްޔާގެ މަގާމަށް ޑރ. މުއިއްޒު އިންތިޚާބުވެވަޑައިގަތުމަށްފަހު ތަންފީޒު ކުރައްވާނީ ރައީސް ޔާމިންގެ ތަރައްގީގެ ސިޔާސަތުކަމަށާއި، ރާއްޖެ ދެންވެސް ތަރައްގީވެގެންދާނީ އެ ސިޔާސަތު ތަންފީޒު ކޮށްގެން ކަމުގައެވެ.