ކުރިޔަށް އޮތް ރިޔާސީ އިންތިޚާބުގައި ވާދަކުރައްވާ އިދިކޮޅު ޕީއެންސީގެ ރިޔާސީ ކެނޑިޑޭޓް ޑރ. މުއިއްޒުގެ މައި ކެމްޕޭން ޖަގަހަ މާލޭގައި ހުޅުވައިފިއެވެ. ޑރ. މުއިއްޒުގެ ކެމްޕޭން މައި ޖަގަހަ ހުޅުވާފައިވަނީ ހެންވޭރުގައި ހުންނަ ސްކައި ވިއުގެ ތިރީގައެވެ.
މިރޭ ޑރ. މުއިއްޒުގެ މައި ކެމްޕޭން ޖަގަހަ ހުޅުވުމުގެ ރަސްމިއްޔާތުގައި އިދިކޮޅު ރިޔާސީ ކެންޑިޑޭޓް ޑރ. މުއިއްޒުވަނީ ވާހަކަ ދައްކަވާފައެވެ. ޑރ. މުއިއްޒުގެ ވާހަފުޅުގައި އޭނާވަނީ، ރައީސް ޔާމިން މިނިވަންކުރުމަށް ގޮވާލާފައެވެ.
މިރޭގެ ކެމްޕޭން ޖަހަ ހުޅުވުމުގެ ރަސްމިއްޔާތުގައި، ރައްޔިތުންގެ މަޖިލީހުގެ އިގުރައިދޫ ދާއިރާގެ ކުރީގެ މެމްބަރު އިބުރާހިމް ފަލާހު ވަނީ ޕީޕީއެމްއާއި ގުޅިވަޑައިގަންނަވާފައެވެ. ޕީޕީއެމްއަށް ގުޅިވަޑައިގަތުމަށްފަހު މިރޭގެ ޖަލްސާގައި ވާހަކަ ދައްކަވަމުން ފަލާހު ވިދާޅުވެފައިވަނީ، ރައީސް ޔާމިން މިނިވަންކުރުމަށް މަގުމައްޗަށް ނިކުންނަން ޖެހިއްޖެނަމަ އެކަމަށްވެސް އޭނާ ހުންނެވީ ތައްޔާރަށް ކަމުގައެވެ. އަދި އޭނާ ވިދާޅުވީ ކުރިޔަށް އޮތް ރިޔާސީ އިންތިޚާބުގައި ރާއްޖޭގެ ރައީސުލްޖުމްހޫރިއްޔާގެ މަގާމަށް ޑރ. މުއިއްޒު އިންތިޚާބުވެވަޑައިގަތުމަށްފަހު ތަންފީޒު ކުރައްވާނީ ރައީސް ޔާމިންގެ ތަރައްގީގެ ސިޔާސަތުކަމަށާއި، ރާއްޖެ ދެންވެސް ތަރައްގީވެގެންދާނީ އެ ސިޔާސަތު ތަންފީޒު ކޮށްގެން ކަމުގައެވެ.
މިރޭގެ ޖަލްސާގައި ޕީއެންސީގެ ރައީސް އަބުދުއްރަހީމްވެސް ވަނީ ވާހަކަ ދައްކަވާފައެވެ، އަބުދުއްރަހީމްގެ ވާހަކާގައި އޭނާ ވިދާޅުވެފައިވަނީ މި ސަރުކާރުން އުއްމީދު ކުރީ އިދިކޮޅު ބައިބައިކޮށް، އަދި ރައީސް ޔާމިންއަށް އަނިޔާ ވެރިވުމަށް ކަމުގައެވެ.
އަދި އަބުދުއްރަހީމް ވިދާލުވީ އަންނަ ހޮނިހިރު ދުވަހުންވެސް ޑރ. މުއިއްޒުގެ ކެމްޕޭން ޓީމްތައް ރާއްޖޭގެ 20 އަތޮޅަށް ދަތުރުތައް ފަށާނެ ކަމުގައެވެ.
