ޤާސިމް އަދި އަމީންގެ ވެރިކަން ވެގެންދާނީ ތަރައްޤީއާއި ތަމައްދުންގެ އާފަތިހަކަށް އަލިވެލޭނެ ވެރިކަމަކަށް ކަމުގައި ޖުމްހޫރީ ޕާޓީގެ ރިޔާސީ ކެންޑިޑޭ ޤާސިމް އިބްރާހިމްގެ ތަރުޖަމާން އަމީން ވިދާޅުވެއްޖެއެވެ.
އަމީން މިހެން ވިދާޅުވީ ރިޔާސީ އިންތިޚާބުގައި ވާދަކުރުމަށް ގާސިމްއާއި އެމަނިކުފާނުގެ ރަނިންމޭޓް އަމީން އިބްރާހިމްގެ ފޯމު އިލެކްޝަނަށް ހުށަހެޅުމަށްފަހު ކުރެއްވި ޓުވީޓުގައެވެ. އަމީން ވިދާޅުވީ ޤާސިމްގެ ވެރިކަމަކީ ދިވެހި ރައްޔިތުންނަށް ތަރައްޤީއާއި ތަމައްދުން ގެނުވާނެ އުފާވެރި ވެރިކަމަކަށް ވާނެކަމަށެވެ. އަދި ޒުވާނުންނަށް އުފާވެރި މުސްތަގުބަލެއް ހޯދައި ދެއްވުމަށް ޤާސިމް ކުރައްވާ މަސައްކަތަކީ ނަތީޖާ ނެރޭނެ މަސައްކަތެއްކަމަށް އަމީން ވިދާޅުވިއެވެ.
ޤާސިމް އަދި އަމީންގެ ވެރިކަން ވެގެންދާނީ ތަރައްޤީއާއި ތަމައްދުންގެ އާފަތިހަކަށް އަލިވެލޭނެ ވެރިކަމަކަށް. ޒުވާންޖީލަށް އުއްމީދު ގެނެސްދޭނެ، ތަހައްމަލް ކުރަމުންމިދާ މާޔޫސްކަން ފިލުވައިދީ، ހާސްކަމެއްނެތް ޒަމާނަކަށް ދިވެހިން ގެންގޮސްދޭނެ ވެރިކަމަކަށް. ހާސްކަނޑާލާ! ހަމަޖެހޭނެ!
– އަމީން ވިދާޅުވިއެވެ.
ޤާސިމް އިބްރާހީމްގެ ކެންޑިޑަސީ ފޯމު ހުށައެޅުމަށް ވަޑައިގެންނެވިއިރު ޤާސިމްގެ އަރިހުގައި މިހާރު ޓްރާންސްޕޯޓް މިނިސްޓަރ އަދި އަނބިކަނބަލުން އައިޝަތު ނަހުލާއާއި، ރަނިންމޭޓް ޑރ އަމީން އިބްރާޙީމްވެސް ވަނީ ބައިވެރިވެޑައިގެންފައެވެ. ގާސިމް އިބްރާހީމްގެ ރަނިންމޭޓަކަށް ޑރ އަމީން ހަމަޖައްސަވާފައިވަނީ އިއްޔެގެ ވަގުތެއްގައެވެ.
ރިޔާސީ އިންތިޚާބުގައި ވާދަކުރެއްވުމަށް އިލެކްޝަންސް ކޮމިޝަނަށް ކެންޑިޑެސީ ފޯމް ހުށައެޅުއްވީ ގާސިމް އިބާރާހިމްއެވެ. އަދި މިފޯމާ ހަވާލުވެވަޑައިގަތީ އިލެކްޝަންސް ކޮމިޝަންގެ ރައީސް ފުއާދު ތަޢުފީޤެވެ.
މިއަހަރުގެ ރިޔާސީ އިންތިހާބުގައި ޖުމްލަ ފަސް ސިޔާސީ ޕާޓީއަކުން ވާދަކުރާއިރު އަމިއްލަ ގޮތުން 3 ފަރާތެއްވަނީ ވާދަކުރައްވާނެކަމަށް ހާމަކުރައްވާފައިވެ. ފޯމު ހުށައެޅުމުގެ ސުންގަޑި މިއަދުގެ 14:00 އަށް ހަމަވާނެއެވެ.
