އިދިކޮޅު ޕީއެންސީން ރިޔާސީ އިންތިޚާބުގައި ވާދަކުރާ ކެނޑިޑޭޓް މާލެ ސިޓީ ކައުންސިލްގެ މޭޔަރު ޑރ.މުހައްމަދު މުއިއްޒުގެ ރަނިން މޭޓަކަށް ފަރެސްތޮޑާ ދާއިރާގެ މެމްބަރު ހުސެއިން މުހައްމަދު ލަތީފް ހަމަޖައްސައިފިއެވެ.
ހުސެއިން ރަނިން މޭޓަކަށް ހަމަޖައްސަވައި މުއިއްޒު ކުރެއްވި ޓުވީޓުގައި ވިދާޅުވީ މާތް ރަސްކަލާންގެ އިރާދަފުޅާ ވާގިފުޅުން ރައީސް ޔާމީނަށް މިއަހަރު އޮންނަ ރިޔާސީ އިންތިޚާބުގައި ވާދަކުރެވޭނެ ކަމަށެވެ. ރައީސް ޔާމީނަށް ވާދަކުރުމުގެ ފުރުސަތު ނުދީފިނަމަ، އެ މަނިކުފާނު ދެއްވާފައިވާ އިރުޝާދާއެކު، ވާދަކުރާނޭ "ބެކްއަޕް" ކެނޑިޑޭޓެއްގެ ގޮތުގައި ޕީ.އެން.ސީ ގެ ކެނޑިޑޭޓެއް ހޮވުމަށް ޕީ.އެން.ސީ ސެނެޓުގައި ބޭއްވުނު އިންތިޚާބުގައި ހޮވުމުން، ރަނިންގމޭޓުގެ ގޮތުގައި ބޭފުޅަކު ހަމަޖައްސާ، އެޕްލިކޭޝަން ތައްޔާރުކުރުމަކީ ކުރަންޖެހޭ ކަމެއްކަމަށް ދެކޭކަމަށެވެ.
މިއީ އަޅުގަނޑުގެ ޒިންމާއެއްކަމުގައި ދެކޭ ހިނދު، އަޅުގަނޑުގެ ރަނިންގމޭޓްގެ ގޮތުގައި ފަރެސްމާތޮޑާ ދާއިރާގެ ޢިއްޒަތްތެރި މެންބަރު ޙުސައިން މުޙައްމަދު ލަޠީފް (ސެންބެ) ހަމަޖައްސަން ނިންމިކަން ދަންނަވަން. އަޅުގަނޑުގެ ދުޢާއަކީ، 7 އޯގަސްޓުގެ ވަގުތު ހަމަވުމުގެ ކުރިން، އަޅުގަނޑުމެންގެ ކެނޑިޑޭޓް ރައީސް ޔާމީން އަށް ވާދަކުރުމުގެ ފުރުސަތު ލިބިގެން ދިޔުން. އަދި މި ތައްޔާރުކުރެވޭ "ބެކްއަޕް" އެޕްލިކޭޝަން ލާންނުޖެހުން.
– މުއިއްޒު ވިދާޅުވިއެވެ.
މުއިއްޒު ވިދާޅުވީ ހުސެއިންއަކީ، ޒުވާން، ތަޢުލީމީ، ޤާބިލް ޚިދްމަތްތެރިއެއް ކަމަށެވެ. ހުސެއިންއަކީ ރައީސް ޔާމީނާއި ވަރަށް އަރިސް ބޭފުޅެކެވެ. ހުސެންއަކީ ރައީސް ޔާމީން މިނިވަން ކުރުމަށް އަޑު އުފުލާ ހިންގާ ހަރަކާތްތަކުގައި އެންމެ އިސްކޮށް ހަރަކާތްތެރިވާ އެއް ބޭފުޅާއެވެ.
މުއިއްޒު ރިޔާސީ އިންތިޚާބަށް ވާންޖެހޭ ތައްޔާރީތައް ވަމުންދާއިރު، ރައީސް ޔާމީންގެ ދަރިކަލުން ޒޭންއާއި، ޕީޕީއެމް ޕީއެންސީގެ އިސްވެރިން ބުނަމުންދަނީ ޔާމީނަށް ވާދަނުކުރެވޭ ހާލަތުގައި ޕީޕީއެމްއިން ކެނޑިޑޭޓަކު ނެރޭނެކަމަށެވެ. އަދި މިއިއްޒުއަކީ އެކޯލިޝަންގެ ޕްލޭން ސީ ކަމަށެވެ.
އިދިކޮޅު ޕްރޮގްރެސިވް ކޯލިޝަންގައި އިންތިޚާބާއި ގުޅޭގޮތުން ޚިޔާލް ތަފާތުވެ ނެރޭނެ ކެނޑިޑޭޓަކާއިމެދު ބޮޑެތި ޚިޔާލް ތަފާތުވުން އުފެދިފައިވާއިރު، ރައީސް ޔާމީންގެ މައްސަލަ ސްޕްރީމް ކޯޓުން ނިންމަވާ ގޮތެއްގެ މަތީން އިތުރު ގިނަ ކަންތައްތަކެއް ހިނގާދާތަން ފެނުމަކީ ގާތްކަމެއްކަމެކެވެ. އިންތިޚާބުގައި ކުރިމަތި ލުމުގެ އެންނެ ފަހު ތާރީހަކީ އަންނަ ހޯމަ ދުވަހެވެ.
