މިއަދު ހެނދުނުން ފެށިގެން ކުރިޔަށްދާ، ޕީއެންސީގެ މަޝްވަރާ މަޖިލިހުގެ ބައްދަލުވުމުގައި، އެޕާޓީން ކުރިޔަށް އޮތް ރިޔާސީ އިންތިޚާބުގައި ވާދަކުރާގޮތަށް މަޝްވަރާ މަޖިލިހުގެ މެޖޯރިޓީން ނިންމައިފިއެވެ.
ޕީއެންސީން ރިޔާސީ އިންތިޚާބުގައި ވާދަކުރާގޮތަށް ފާސްކުރީ މިހާރު ކުރިއަށްދާ އެޕާޓީގެ މަޝްވަރާ މަޖިލިހުގެ ބައްދަލުވުމުގައި ބައިވެރިވި 47 މެމްބަރުންގެ ތެރެއިން 44 މެމްބަރުންގެ ތާއީދާއެކުވެ. ޕީއެންސީގެ މަޝްވަރާ މަޖިލިހުގައި ތިއްބަވަނީ 47 މެމްބަރުންނެވެ.
އިދިކޮޅު ޕީޕީއެމްގެ ރިޔާސީ ކެނޑިޑޭ، ކުރީގެ ރައީސް ޔާމިންއަށް ކުރިޔަށް އޮތް ރިޔާސީ އިންތިޚާބުގައި ވާދަ ނުކުރެއްވޭ ގޮތް ވެއްޖެ ހާލަތެއްގައި، އިދިކޮޅު ކެނޑިޑޭޓެއްގެ ގޮތުގައި، ޕީއެމްސީގެ ކެނޑިޑޭޓަކު ނެރުމަށްޓަކާ ބާއްވާ، އެޕާޓީގެ މަޝްވަރާ މަޖިލިހުގެ ޚާއްސަ ބައްދަލުވުން ކުރިޔަށް ދަނީ މިއަދު ހެދުނު 10:00 އިން ފެށިގެންނެވެ.
ޕީއެންސީގެ މިއަދުގެ ބައްދަލުވުމުގައި، ކުރިޔަށް އޮތް ރިޔާސީ އިންތިޚާބުގައި ޕީއެންސީއިން ވާދަކުރުމަޓަކާ އެޕާޓީ އަސާސީ ގަވާއިދަށް އިސްލާހު ގެނައުމަށް ނިންމާފައިވާއިރު، ޕީއެންސީގެ މަޝްވަރާ މަޖިލިހުގެ މި ބައްދަލުވުން މިހާރު ބެލެވެމުންދަނީ، އެޕާޓީގެ ރިޔާސީ ޓިކެޓް ހޯދުމަށް ކުރިޔަށް ދާނެ، ޓިކެޓަށް މިހާރު ޝައުގުވެރިކަން ފާޅު ކޮށްފައިވާ ދެ ކެނޑިޑޭޓުން ކަމަށްވާ، މާލޭ ސިޓީގެ މޭޔަރު ޑރ. މުއިއްޒުއާއި ރައްޔިތުންގެ މަޖިލިހުގެ މަޑުއްވަރި ދާއިރާގެ މެމްބަރު އާދަމް ޝަރީފް އާ ދެބޭފުޅުންގެ ގަދަ ހިފުމެއްގެ ގޮތުގައެވެ.
ޕީއެންސީގެ މަޝްވަރާ މަޖިލިހުގެ ބައްދަލުވުމުގައި އެންމެ ފުރަތަމަ ކުރިޔަށް ގެންދިއުމަށް ހަމަޖެހިފައިވަނީ، އެޕާޓީގެ ރިޔާސީ ޓިކެޓަށް އިދިކޮޅު ޕީޕީއެމްގެ ލީޑަރޝިޕަށްވެސް ވާދަ ކުރެވޭގޮތަށް ބަދަލު ގެނައުމެވެ. އޭގެ އެއް ސަބަބަކީ، ޕީއެންސީގެ ޓިކެޓަށް ޕީޕީއެމްގެ ނާއިބު ރައީސް ޑރ. މުއިއްޒުވެސް ވާދަކުރެއްވުމަށް ނިންމަވާފައި ވުމެވެ.
މިގޮތުން ޕީއެންސީގެ އަސާސީ ގަވާއިދަށް ބަދަލު ގެނައުމަށްފަހު، އެޕާޓީގެ ރިޔާސީ ޓިކެޓް، ޕްރައިމަރީއަކަށް ނުގޮސް ދިނުމަށްޓަކާ އަސާސީ ގަވާއިދަށް ގެންނަންޖެހޭ ބަދަލުތައްވެސް މަޝްވަރާ މަޖިލިހުގެ ތާއީދާއެކީ ގެނައުމަށް ވަނީ ހަމަޖެހިފައެވެ.
ޕީއެންސީގެ މިއަދުގެ މަޝްވަރާ މަޖިލިހުގެ ބައްދަލުވުމުގެ ރިޔާސަތު ބަލަހައްޓަވާނީ އެޕާޓީގެ ރައީސް އަބުދުއްރަހީމްއެވެ.
އިދިކޮޅު ރިޔާސީ ކެނޑިޑޭޓެއްގެ ގޮތުގައި ކުރީގެ ރައީސް ޔާމިނަށް ވާދަކުރެވޭ ގޮތް ނުވެއްޖެ ހާލަތެއްގައި އިދިކޮޅު ކެނޑިޑޭޓަކު ޕީއެންސީން ނެރުމަށް މިހާރު ވާދަކުރަމުން ދަނީ ޑރ. މުއިއްޒުއާއި ރައްޔިތުންގެ މަޖިލިހުގެ މަޑުއްވަރި ދާއިރާގެ މެމްބަރު އާދަމް ޝަރީފުއެވެ.
"ޚަބަރު އޮންލައިން"އަށް މައުލޫމާތު ލިބިފައިވާ ގޮތުގައި، ޕިއެންސީގެ ޓިކެޓަށް ވާދަ ކުރުމުގެ ޝައުގުވެރިކަން، ޕީޕީއެމްގެ ނާއިބު ރައީސް ޢައްސާން މައުމޫން ގެންގުޅުއްވި ނަމަވެސް އޭނާ މިހާރުވަނީ އެ ވިސްނުން ދޫކޮށްލައްވާފައެވެ. އަދި ޓިކެޓަށް ވާދަކުރެއްވުމުގެ ވިސްނުން ގެންގުޅުއްވި، ނައިފަރު ދާއިރާގެ މެމްބަރު އަހުމަދު ޝިޔާމްވެސް ފަހުން އެވިސްނުން ދޫކޮށްލައްވާފައިވާއިރު، ޝިޔާމްއާއި ޢައްސާންގެ އިތުރުން، މާލޭ ސިޓީ ކައުންސިލްގެ މެމްބަރު އިބުރާހިމް ޝުޖާއާއި، މަހިބަދޫ ދާއިރާގެ މެމްބަރު އަހުމަދު ތާރިގުވެސް ކެމްޕޭން ކުރައްވަމުން އާދަމްޝަރީފުއަށް ކަމަށްވެސް ވަނީ މައުލޫމާތު ލިބިފައެވެ.
އެހެންނަމަވެސް، ޚަބަރު އޮންލައިނަށް މައުލޫމާތު ލިބިފައިވާ ގޮތުގައި، ޕީއެންސީގެ ސެނެޓްގެ ގިނަ މެމްބަރުންނާއި، ޕީޕީއެމްގެ ލީޑަރޝިޕްގެ ގިނަ ބޭފުޅުންގެ ތާއީދު އަދިވެސް އޮތީ ޑރ. މުއިއްޒުއަށެވެ. އަދު މިއަދު ޕީއެންސީގެ ސެނެޓްގައި ނެގުމަށް ހަމަޖެހިފައިވާ ވޯޓު، ބޮޑު ތަފާތުން ޑރ. މުއިއްޒު ކާމިޔާބު ކުރައްވާނެކަމަށްވެސް ވަނީ މައުލޫމާތު ލިބިފައެވެ.
