އަމިއްލަ މީހުންގެ ގޭގޭގައި ކަސްޓަމްސްގެ ބޮންޑެޑް ވެއާހައުސްތައް ނުހިންގޭ ގޮތަށް ހަދައިފިއެވެ.
ހޯމްލޭންޑް މިނިސްޓަރު އަލީ އިހުސާން "އެކްސް" ގައި ކުރެއްވި ޕޯސްޓެއްގައި ވިދާޅުވީ ޒަމާންތަކެއް ވަންދެން ބޮންޑެޑް ވެއާހައުސް މާލޭގެ އެކި ގެތަކުގައި ހިންގަމުން އައިސްފައިވާ ކަމަށެވެ. މި ތަންތަނުގައި ދެ ތަޅު ހަރުކޮށް އެއް ތަޅުގެ ތަޅުދަނޑި ބަލަހައްޓަނީ ކަސްޓަމްސްގެ ފަރާތުން ކަމަށް އިހުސާން ވިދާޅުވިއެވެ. ގޭގެތަކުގައި ބޮންޑެޑް ވެއާހައުސް ހިންގުމަކީ ސަލާމަތީ ގޮތުން އަދި ކޮންޓްރޯލް ކުރުމަށް އެންމެ ރަނގަޅު ގޮތް ނޫން ކަމަށް ވެސް އިހުސާން ވިދާޅުވިއެވެ.
އިހުސާން އެގޮތަށް ވިދާޅުވި އިރު، މާލޭގެ ގެއެއްގެ ބޮންޑެޑް ވެއާހައުސްއަކުން ސިނގިރޭޓް ކާޓޫނުތަކެއް މަދުވެގެން ފުލުހުން ތަހުގީގެއް ވަނީ ފަށައިފައެވެ.
ދުންފަތުގެ ބާވަތްތަކުން ނަގާ ޑިއުޓީ ބޮޑުކުރުމަށްފަހު މަދުވެފައިވާ މި ސިނގިރޭޓްތަކުގެ ތެރޭގައި 575 ކޭސް ނުވަތަ 34،000 ކާޓޫނު ހިމެނޭކަމަށް މީޑިއާތަކުން ވަނީ ރިޕޯޓުކޮށްފައެވެ. މި ސިނގިރޭޓްތަކަށް ދައްކަންޖެހޭ ކަސްޓަމްސް ޑިއުޓީގެ އަދަދު 47 މިލިއަން ރުފިޔާއަށް އަރާކަމަށް މައުލޫމާތު ލިބެއެވެ.
އިހުސާން ވިދާޅުވީ ބޮންޑެޑް ވެއާހައުސްއަކީ މިގޮތަށް ގެއެއްގައި ހަދާފައި ހުރި ތަނެއް ކަމަށެވެ. ކަސްޓަމްސް އިން ބެލި ބެލުމުން އެކަން ޔަގީން ވެފައިވާތީ ވެއާހައުސްގައި ހުރި ކަމަށް ރެކޯޑުތަކުން ދައްކާ މުދަލަށް ޑިއުޓީ ދެއްކުމަށް އަންގާފައިވާ ކަމަށް އިހުސާން ވިދާޅުވިއެވެ.
އިހުސާން ވިދާޅުވީ ބޮންޑެޑް ވެއާހައުސް ހިންގޭނީ ހަމައެކަނި ކަސްޓަމްސްގެ ފުލް ކޮންޓްރޯލް އޮންނަ ސަަރަހައްދުގައި އެކަނި ކަމަށް ނިންމައި އެކަން ތަންފީޒު ކުރަން ސަރުކާރުން ފަށާފައިވާ ކަމަށެވެ.
އަދި މިކަން ހިނގިގޮތް ބަލާ ގާނޫނީ ފިޔަވަޅު އެޅުމަށް ކަސްޓަމްސް އާއި ފުލުހުން މަސައްކަތް ކުރަމުންދާ ކަމަށް މިނިސްޓަރު ވަނީ ވިދާޅުވެފައެވެ.
