އިންތިޚާބަކާއި ކުރިމަތިލާއިރު ރައްޔިތުންގެ އަޑު އަހުމަށް ރައްޔިތުންގެ ކައިރިއަށް ވަޑައި ނުގަނެ ރައްޔިތުންގެ އިހުސާސްތަކެއް ނެގޭނެކަމަށާއި، ކުރިއަށް އޮތް ރިޔާސީ އިންތިޚާބުގައި އެމްޑީޕީ ފިޔަވައި ރައްޔިތުންގެ އަޑުހައި ކެމްޕޭން ކުރާ ބަޔަކު ނުފެންނަ ކަމަށް އެމްޑީޕީގެ ރިޔާސީ ކެނޑިޑޭޓް ރައީސް ޞާލިހު ވިދާޅުވެއްޖެއެވެ.

ރިޔާސީ ކެމްޕޭންގައި ރައީސް ޞާލިހު، ށ.އަތޮޅުގެ ރަށްތަކަށް ކުރައްވާ ދަތުރުފުޅުގެ ތެރެއިން މިއަދު ށ.ފޭދޫ ރައްޔިތުންނާއި މުޚާތަބު ކުރައްވާ ވާހަކަ ދައްކަވަމުން ވިދާޅުވީ ރިޔާސީ އިންތިޚާބަކީ ރާއްޖޭގެ ހުރިހާ ރައްޔިތުންގެ ނިންމުމާއިއެކު ވެރިޔަކު އިންތިޚާބު ކުރުމަށް ބާއްވާ އިންތިޚާބު ކަމަށެވެ. މިއިންތިޚާބުގައި ރައްޔިތުންގެ ވެރިޔަކަށް އަންނަ މީހަކީ ރައްޔިތުންގެ ކައިރިއަށް ވަޑައިގެން ކެމްޕޭން ކުރައްވައި ރައްޔިތުންގެ އަޑު އަހާ މީހަކަށް ވާންޖެހޭކަމަށެވެ.

ނަމަވެސް މިއިންތިޚާބުގެ ކެމްޕޭންގައި މިހާތަނަށް ވާދަވެރިން ފެނިގެންދަނީ ކެމްޕޭނަށް ވަޑައިގެން ތިބި މަންޒަރުކަމަށެވެ. ރައްޔިތުން ކައިރިއަށް ވަޑައި ނުގެން ރައްޔިތުންގެ އިހުސާސްތައް ސާފު ނުވާނެކަމަށް ރައީސް ވިދާޅުވިއެވެ. އެމަނިކުފާނު ވިދާޅުވީ ވާދަވެރި ކެނޑިޑޭޓުން ގޭގޭގައި ތިއްބަވައި ހަދަ މެނިފެސްޓޯއަކަށް ރައްޔިތުން ވޯޓު ނުދެއްވާނެކަމަށެވެ. ރައްޔިތުން ބޭނުންވަނީ ދިމާވެފައިވާ މައްސަލަތައް އޮޅުން ފިލުވާ އިހުސާސްތައް ދެނެގަންނަ މީހުން އިންތިޚާބު ކުރުމަށް ކަމަށް ރައީސް ވިދާޅުވިއެވެ.

ރައްޔިތުންގެ އަޑު އައްސަވައިގެން ކަންކަން ކުރެވޭނީ. ތިހެން ތިބެ ހަދާ މެނިފެސްޓޯއަކުން އަލި ލިބޭނެ ވޯޓެއްނެތް. ގޭގޭގަ ސިޓިން ރޫމުގައި ތިބެ ކުރާ ކެމްޕޭނެއް ރައްޔިތުން ބަލައި ނުގަންނަނާނެ. އަޅުގަނޑު ވާދަވެރިންނަށް ގޮވާލަނީ ނިކުންނަވާށޭ. ކެމްޕޭން ކުރައްވާ ރައްޔިތުންގެ އަޑު އައްސަވާށޭ.

– ރައީސް ޞާލިހު ވިދާޅުވިއެވެ.

ފޭދޭ ތަރައްޤީއަށް ކުރަން ހުރި ބައެއް ކަންކަމަށް އިޝާރާތް ކުރައްވާ ރައީސް ވިދާޅުވީ ފޭދޫ، މަގު ހެދުމާއި، ހޭންޓްބޯޅަ ކޯޓާއި، ރަށް ގިރުމުގެ މައްސަލައަށް ކުރިއަށް އޮތް ފަސް އަހަރުގައި ހައްލު ހޯދައި ދެއްވާނެކަމަށެވެ. ރައީސް ވަނީ މިއަދު ވަޑައިގެން އެހެން ރަށްތަކަށްވެސް ގިނަ ވައުދުތަކެއް ވެވަޑައިގެންފައެވެ.

ރިޔާސީ ކެމްޕޭނަށް މިހާތަނަށް ކުރިމަތިލައްވާނެކަމަށް އިއުލާން ކުރެއްވި ކެނޑިޑޭޓުންގެ ތެރެއިން ކެމްޕޭން ކުރައްވާ ދެ ކެނޑިޑޭޓުންނަކީ ރައީސް ޞާލިހާއި، އެމްއެންޕީގެ ކާނަލް ނާޒިމްއެވެ. ޖޭޕީގެ ކެނޑިޑޭޓް ޤާސިމް އިބްރާހިމް އަދި ކެމްޕޭން ނުފައްޓަވައެވެ. ރައީސް ޔާމީން ޖަލުހުކުމެއް ތަންފީޒު ކުރައްވާތީ އެމަނިކުފާނަށް ކެމްޕޭންގައި ބައިވެރި ނުވެއެވެ. ނަމަވެސް ޕީޕީއެމްއާއި، ޖޭޕީންވެސް ދަނީ އަތޮޅު ތެރޭގައި ކެމްޕޭން ކުރަމުންނެވެ.