ފުވައްމުލަކުގައި 400 ހައުސިން ޔުނިޓް އެޅުމަށް ވަރަށް އަވަހަށް ބަޔަކާއި ހަވާލު ކުރާނެކަމަށް އެ ސިޓީގެ މޭޔަރު އިސްމާއީލް ރަފީގް (އިއްސެ) ވިދާޅުވެއްޖެއެވެ.
ކުރީގެ ރައީސް ޔާމިންގެ ވެރިކަމުގައި ކުރިޔަށް ގެންދިޔަ "ގެދޮރުވެރިކުރުން" ޕްރޮގްރާމްގެ ދަށުން ފުވައްމުލަކުގައި 200 ފްލެޓް އިމާރާތް ކޮށްފައި ވެއެވެ. އެހެންނަމަވެސް އެ ފްލެޓްތައް ހަވާލު ކޮށްފައިވަނީ މި ވެރިކަމުގައެވެ.
ފުވައްމުލަކު ސިޓީ މޭޔަރު އިއްސެ ވިދާޅުވެފައިވާ ގޮތުގައި، އެ ސިޓީގައި 400 ހައުސިން ޔުނިޓް އެޅުމަށް ޓެންޑަރ ބޯޑުން މިހާރުވަނީ އިއުލާން ކޮށްފައެވެ. އޭނާ ވިދާޅުވީ ހައުސިން ޔުނިޓް އެޅުމަށް ބޭނުންވާ ބިންތައްވެސް މިހާރު ކައުންސިލުންވަނީ ކަނޑައަޅާފައެވެ.
ރައީސް ސާލިހުގެ ސަރުކާރުންވަނީ ފުވައްމުލަކުގައި ތަރައްގީގެ ގިނަ މަޝްރޫޢުތަކެއް ކުރިޔަށް ގެންގޮސްފައެވެ. އޭގެ ތެރޭގައި ފުވައްމުލަކު ވަށައިގެން ރިންގްރޯޑް މަގު ހެދުމާއި ފުވައްމުލަކު ސްކޫލް މަލްޓި ޕާޕަސް ހޯލާއި ހޮސްޕިޓަލް އަޕްގްރޭޑް ކުރުމާއި، ފުޓްބޯޅަ އާއި ފުޓްސަލް އަދި އެހެނިހެން ބައެއް ކުޅިވަރުތައް ކުޅޭ ދަނޑުތައް ތަރައްގީ ކުރުން ހިމެނެއެވެ.
އޭގެ އިތުރުންވެސް ރަށުގެ އެތެރޭގެ މަގުތައް ހެދުމާއި، ގޮނޑުދޮށް ހިމާޔަތް ކުރުމާއި، ހޮސްޕިޓަލް ތަރައްގީކުރުމުގެ މަސައްކަތްވެސް ދަނީ ކުރިޔަށެވެ.
13،499 މީހުންގެ ބޮޑު އަބާދީއެއް އޮންނަ ފުވައްމުލަކަކީ، ކޮންމެ ވެރިކަމެއްގައިވެސް ތަރައްގީގެ މަޝްރޫޢޫތައް ކުރިޔަށް ގެންދިއުމަށް ވަރަށްބޮޑަށް އިސްކަންދޭ ރަށެކެވެ.
