ދަ ޑިމޮކްރެޓްސްގެ ސަރުކާރެއްގައި ރައްޔިތުންގެ މަޖިލީހުގެ މެންބަރުންގެ އަދަދު 76 އަށް ކުޑަކޮށް އެވަރުގައި ހިފަހައްޓާނެ ކަމަށް އެ ޕާޓީން ބުނެފިއެވެ.

ޑިމޮކްރެޓުން އާންމު ކުރި ސިޔާސަތެއްގައި ބުނީ މަޖިލިހުގެ މެމްބަރުން 76 އަށް ކުޑަކޮށް އެވަރުގެ ހިފެހެއްޓުމަކީ ވައުދެއް ކަމަށެވެ. އަދި ކުދި ދާއިރާތަކުގެ ބަދަލުގައި މުޅި އަތޮޅުން މެމްބަރުން އިންތިހާބު ކުރަން ޖެހޭ ގޮތަށް ހަމަޖައްސާނެ އިރު، އަތޮޅުތަކުންނާއި މާލެ އިން އިންތިހާބު ކުރާ ޖުމްލަ ގޮނޑީގެ އަދަދު 55 އަށް ކަނޑައަޅާނެ ކަމަށް ވެސް ބުނެފައިވެއެވެ.

މީގެއިތުރުން އަންހެނުންނަށް ހާއްސަ، އުތުރު، ހުޅަނގު، މެދު އަދި ދެކުނު ރާއްޖޭގެ ޖުމްލަ 8 ގޮނޑި ކަނޑައަޅާނެ ކަމަށް ވެސް މެނިފެސްޓޯގައިވެއެވެ. ނުކުޅެދުންތެރިކަން ހުންނަ ފަރާތްތައް ތަމްސީލް ކުރުމަށް ރާއްޖެ އިން ދެ ގޮނޑި ކަނޑައެޅުމާއި ޕްރޮޕޯޝަނަލް ރެޕްރެޒެންޓޭޝަންގެ ތެރެއިން ޕާޓީތަކަށް ވޯޓު ލިބޭ ނިސްބަތުން ލިބޭ ގޮތަށް ނެޝަނަލް ލިސްޓްގެ 11 ގޮނޑި ކަނޑައަޅާނެ ކަމަށް ބުނެފައިވެއެވެ.

ޑިމޮކްރެޓްސް އިން ބުނީ ދައުރުގެ މެދު ތެރެއިން މެމްބަރަކު ވަކި ކުރުމަށް އެ މެމްބަރަކު އިންތިހާބު ކުރާ އިލެކްޓްރޭޓްގެ ރައްޔިތުންނަށް ފެނިއްޖެ ހިނދެއްގައި މެމްބަރުންގެ ރީކޯލް ވޯޓު ނެގޭނެ ގޮތަށް ގާނޫނުގައި ކަނޑައަޅާނެ ކަމަށެވެ.

މީގެއިތުރުން މަޖިލިހުގެ މެމްބަރުން މަސައްކަތަށް ހާޒިރުވާން ޖެހޭ ގަޑި ކަނޑައެޅި ހާޒިރު ނުވާ ނަމަ، ގަޑި ޖެހޭ ބައެއް ކަމުގައި ކަނޑައަޅާނެ ކަމަށް ބުނެފައިވެއެވެ. އަދި މެމްބަރު ކަމަށް ކުރިމަތިލާ މީހެއްގެ ކިބައިގައި ހުންނަން ޖެހޭ ފެންވަރާއި ޝަރުތުތައް ކަނޑައަޅާނެ ކަމަށް ބުނެފައިވެއެވެ.

އަންނަ އަހަރު ބޭއްވުމަށް ހަމަޖެހިފައިވާ ރައްޔިތުންގެ މަޖިލީހަށް 6 ދާއިރާއެއް އިތުރުވާކަމަށް އިލެކްޝަންސް ކޮމިޝަނުން ވަނީ ބުނެފައެވެ.

ރައްޔިތުންގެ މަޖިލީހުގެ ދާއިރާތައް ކަނޑައެޅިގެންދަނީ، އާބާދީގެ ނިސްބަތަށް ބަލައި، އަންނަ ބަދަލުތަކުގެ މައްޗަށެވެ. ޤާނޫނު އަސާސީގައި ކޮންމެ 5،000 މީހުން ހިމެނޭ ނަމަ އެދާއިރާއަކަށް ވަކި މެމްބަރެއް އިންތިޚާބު ކުރެއްވުމަށް ވަނީ ކަނޑައަޅުއްވާފައެވެ.

އިލެކްޝަންސް ކޮމިޝަންގެ ނައިބް ރައީސް އިސްމާއިލް ހަބީބް ވިދާޅުވީ، ރިޔާސީ އިންތިޚާބުގެ މަސައްކަތް ކުރައްވަމުންދާއިރު، ކުރިއަށް އޮތް 2024 ވަނަ އަހަރުގެ މަޖިލިސް އިންތިޚާބުގެ މަސައްކަތްތައްވެސް ކޮމިޝަނުން ކުރަމުންދާކަމަށެވެ.

ރައްޔިތުންގެ މަޖިލީހުގެ އިންތިޚާބީ ދާއިރާތައް ކަނޑައެޅުމާބެހޭ ޤާނޫނުގެ 8 ވަނަ މާއްދާގެ (ށ) ގައި ބަޔާންކުރާގޮތުގެ މަތީން، 2024 ވަނަ އަހަރުގެ ރައްޔިތުންގެ މަޖިލީހުގެ އިންތިޚާބީ ދާއިރާތަކަށް ގެނެވޭ ބަދަލު އިލެކްޝަންސް ކޮމިޝަންގައި ބޭއްވި ޖަލްސަގައި ވަނީ ފާސް ކުރައްވާފައެވެ. އިލެކްޝަންސް ކޮމިޝަނުން ވަނީ މަޖިލީހަށް އިތުރު 6 ދާއިރާއެއް އިތުރުވާނެކަމަށް ކަނޑައަޅުއްވާފައެވެ.

2024 ވަނަ އަހަރު ރައްޔިތުންގެ މަޖިލީހަށް އިތުރުވާ ގޮނޑިތައް:
• މާލޭ ސިޓީ އަށް 2 ގޮނޑި
• އައްޑޫ ސިޓީ އަށް 1 ގޮނޑި
• މާޅޮސްމަޑުލު ދެކުނުބުރިއަށް 1 ގޮނޑި
• މާލެ އަތޮޅަށް 1 ގޮނޑި
• ހުވަދުއަތޮޅު އުތުރުބުރިއަށް 1 ގޮނޑި

މިހާރު އޮތް ރައްޔިތުންގެ މަޖިލީހުގެ ދައުރު ހަމަވާނީ އަންނަ އަހަރުގެ މޭމަހުގެ 30 އަށެވެ. ރައްޔިތުންގެ މަޖިލީހަށް ދައުރަކަށްފަހު ދައުރެއްގައި މެމްބަރުން އިތުރުވުމަކީ ގިނަ ބައެއްގެ ކަންބޮޑުވުން އޮތް މައްސަލައެކެވެ. މަޖިލީހުގައި މިހާރު 87 މެމްބަރުން ތިއްބަވައެވެ. މި މައްސަލައަށް ހައްލު ގެނައުމަށް މިހިނގާ 19 ވަނަ މަޖިލީހަށްވެސް ހުށަހެޅި މައްސަލަ ކުރިއަށްދާ ގޮތެއް ނުވެއެވެ. މަޖިލީހުގެ ދާއިރާތަށް އިތުރުވާ އިތުރުވުމަށް ހައްލު ގެނެވޭނީ ޤާނޫނު އަސާސީއަށް އިސްލާހު ގެނެސްގެންނެވެ.